Ashes 2025-26: Australia Clinch Series 4-1 with Sydney Test Win
స్వదేశంలో జరిగిన 2025–26 యాషెస్ టెస్ట్ సిరీస్ను ఆస్ట్రేలియా 4-1 తేడాతో ఘనంగా కైవసం చేసుకుంది. సిడ్నీ వేదికగా జనవరి 8న ముగిసిన ఐదో టెస్ట్లో ఆసీస్ జట్టు ఇంగ్లండ్పై 5 వికెట్ల తేడాతో విజయం సాధించి సిరీస్ను విజయవంతంగా ముగించింది.
ఇంగ్లండ్ నిర్దేశించిన 160 పరుగుల స్వల్ప లక్ష్యాన్ని ఆసీస్ జట్టు 5 వికెట్లు కోల్పోయి ఛేదించింది. లక్ష్య ఛేదనలో ఆస్ట్రేలియా తొలి దశలో కొంత ఇబ్బంది పడినప్పటికీ, చివరకు ధైర్యంగా గెలుపు సాధించింది. హెడ్ (29), వెదరాల్డ్ (34), లబూషేన్ (37), స్టీవ్ స్మిత్ (12), ఖ్వాజా (6) వరుసగా పెవిలియన్కు చేరారు.
అయితే చివర్లో అలెక్స్ క్యారీ (16 నాటౌట్), క్యామెరూన్ గ్రీన్ (22 నాటౌట్) నిలకడగా ఆడి జట్టును విజయతీరాలకు చేర్చారు. ఇంగ్లండ్ బౌలర్లలో టంగ్ 3 వికెట్లు తీసి ఒత్తిడి సృష్టించగా, జాక్స్ ఒక వికెట్ పడగొట్టాడు. అంతకుముందు ఐదో రోజు ఆటలో ఇంగ్లండ్ ఓవర్నైట్ స్కోర్కు మరో 40 పరుగులు జోడించి రెండో ఇన్నింగ్స్ను 342 పరుగుల వద్ద ముగించింది.
నాలుగో రోజే సెంచరీ చేసిన జేకబ్ బేతెల్ 150 పరుగులు పూర్తి చేసిన వెంటనే ఔటయ్యాడు. ఆస్ట్రేలియా బౌలర్లలో స్టార్క్, వెబ్స్టర్ తలో మూడు వికెట్లు తీసి ఇంగ్లండ్ను కట్టడి చేశారు. మ్యాచ్కు ముందు ఆసీస్ తొలి ఇన్నింగ్స్లో భారీగా 567 పరుగులు చేసింది. హెడ్ (163), స్టీవ్ స్మిత్ (138) అద్భుత సెంచరీలతో జట్టును భారీ స్కోర్ దిశగా నడిపించారు.
చివర్లో వెబ్స్టర్ (71 నాటౌట్) విలువైన ఇన్నింగ్స్ ఆడాడు. ఇంగ్లండ్ బౌలర్లలో కార్స్, టంగ్ తలో 3 వికెట్లు, స్టోక్స్ 2 వికెట్లు, జాక్స్, బేతెల్ చెరో వికెట్ తీశారు. ఈ మ్యాచ్లో ముందుగా బ్యాటింగ్ చేసిన ఇంగ్లండ్ తొలి ఇన్నింగ్స్లో 384 పరుగులు చేసింది.
జో రూట్ (160) అద్భుత సెంచరీతో జట్టును ఆదుకోగా, హ్యారీ బ్రూక్ (84) అర్ధ సెంచరీతో సహకరించాడు. ఆసీస్ బౌలర్లలో నెసర్ 4 వికెట్లు తీయగా, స్టార్క్, బోలాండ్ తలో రెండు వికెట్లు, గ్రీన్, లబూషేన్ చెరో వికెట్ పడగొట్టారు. మొత్తంగా ఐదు టెస్ట్ల సిరీస్లో ఇంగ్లండ్ నాలుగో టెస్ట్లో మాత్రమే విజయం సాధించగా, మిగతా నాలుగు టెస్ట్లను ఆస్ట్రేలియా గెలుచుకుని యాషెస్ సిరీస్పై సంపూర్ణ ఆధిపత్యం చాటింది.
మరిన్ని వార్తలు చదవండి: ముంబై, ఢిల్లీ ఆటగాళ్లకే ఛాన్స్? రాబిన్ ఊతప్ప షాకింగ్ కామెంట్స్