Ashes 2025 Australia vs England 1st test Day 1 Highlights: Ben Stokes’ Five-Wicket Haul Puts England Ahead on Day 1

యాషెస్ తొలి టెస్టులో బౌలర్లు అదరగొట్టారు. తొలి రోజే 19 వికెట్లు పడటం విశేషం. ఇంగ్లండ్ 172 పరుగులకు ఆలౌట్ అయ్యింది. ఆస్ట్రేలియా పేసర్ మిచెల్ స్టార్క్ ఏకంగా 7 వికెట్లు తీశాడు. తొలి రోజు ఆట ముగిసే సరికి ఆస్ట్రేలియా 9 వికెట్లు కోల్పోయి 123 పరుగులు చేసింది. బెన్ స్టోక్స్ 5 వికెట్లతో ఆకట్టుకున్నాడు. రెండు జట్ల తొలి ఇన్నింగ్స్‌లు తొలి రోజే దాదాపు పూర్తవడం ఉత్కంఠ రేపింది.

యాషెస్ సిరీస్ తొలి టెస్టు మొదటి రోజే బౌలర్లు నిప్పులు చెరిగారు. ఒకటి కాదు, ఏకంగా 19 వికెట్లు కూలడంతో బ్యాటర్లు వరుసగా పెవిలియన్‌కి పరుగులు తీశారు. స్టార్క్ స్పెల్‌కి ఇంగ్లండ్ కుప్పకూలితే, స్టోక్స్ వేగానికి ఆస్ట్రేలియా బ్యాటర్లబరిదెబ్బతిన్నారు. చారిత్రాత్మక యాషెస్ మొదటి రోజు నుంచే రసవత్తరంగా మారింది.

పెర్త్ వేదికగా ఆస్ట్రేలియా–ఇంగ్లండ్ తొలి టెస్టు ప్రారంభమైంది. టాస్ గెలిచిన ఇంగ్లండ్ కెప్టెన్ బెన్ స్టోక్స్ బ్యాటింగ్ ఎంచుకున్నాడు. అయితే పిచ్ బౌలింగ్‌కు అండగా ఉండడంతో ఆస్ట్రేలియా పేసర్ మిచెల్ స్టార్క్ ఒకే ఒక్కడిగా ఇంగ్లండ్‌పై దాడి చేసి కీలక వికెట్లు దక్కించుకున్నాడు. లంచ్ తర్వాత బంతి ఇంకా స్వింగ్ కావడంతో రెండో సెషన్ ముగిసేలోపే ఇంగ్లండ్ ఆలౌట్ అయింది.

ఇంగ్లండ్ తరఫున హ్యారీ బ్రూక్ 52 పరుగులు, ఓలీ పోప్ 46 పరుగులు చేశారు. యువ వికెట్ కీపర్ జెమీ స్మిత్ బాజ్‌బాల్ స్టైల్లో 22 బంతుల్లో 33 పరుగులు బాదాడు. దీంతో ఇంగ్లండ్ 32.5 ఓవర్లలో 172 పరుగులకు కుప్పకూలింది. స్టార్క్ 7 వికెట్లు, బ్రెండన్ డాగెట్ 2, కామెరూన్ గ్రీన్ ఒక వికెట్ తీశారు.

బ్యాటింగ్‌కు వచ్చిన ఆస్ట్రేలియాకు ఆరంభంలోనే షాక్ తగిలింది. ఓపెనర్ జేక్ వెథరాల్డ్‌ను జోఫ్రా ఆర్చర్ అద్భుతంగా ఎల్‌బీడబ్ల్యూ చేశాడు. టీ బ్రేక్ తర్వాత ఇంగ్లండ్ బౌలర్లు మరింత పుంజుకుని లబుషేన్, స్టీవ్ స్మిత్, ఉస్మాన్ ఖ్వాజా వికెట్లు వరుసగా తీశారు. దీంతో ఆస్ట్రేలియా 31 పరుగులకే నాలుగు వికెట్లు కోల్పోయింది.

ట్రావిస్ హెడ్, కామెరూన్ గ్రీన్ కొంతసేపు ఇన్నింగ్స్‌ను నిలబెట్టే ప్రయత్నం చేసినప్పటికీ బెన్ స్టోక్స్ ఆ ఇద్దర్నీ త్వరగానే పెవిలియన్‌కి పంపించాడు. స్టార్క్ కొంతసేపు నిలకడగా ఆడినా స్టోక్స్ బౌలింగ్‌కు బలయ్యాడు. తొలి రోజే ఇరు జట్ల ఇన్నింగ్స్‌లు పూర్తవుతాయని అనిపించినా, చివరికి ఆస్ట్రేలియా 123/9తో రోజు ముగించింది.

తొలి ఇన్నింగ్స్‌లో ఆసీస్ 49 పరుగుల వెనుకబాటులో ఉంది. క్రీజులో నాథన్ లయన్, బ్రెండన్ డాగెట్ ఉన్నారు. ఇంగ్లండ్ తరఫున స్టోక్స్ 5 వికెట్లు, జోఫ్రా ఆర్చర్ మరియు బ్రైడన్ కార్స్ తలో 2 వికెట్లు తీశారు.

మరిన్ని వార్తలు చదవండి: T20 వరల్డ్ కప్ 2026: భారత్ vs పాకిస్తాన్ మ్యాచ్ ఫిబ్రవరి 15న