Ashes 3rd Test: Australia Defeat England by 82 Runs at Adelaide, Seal Series 3-0

అడిలైడ్ వేదికగా ఇంగ్లండ్‌తో జరిగిన యాషెస్ మూడో టెస్టులో ఆస్ట్రేలియా 82 పరుగుల తేడాతో ఘన విజయం సాధించింది. దీంతో మరో రెండు మ్యాచ్‌లు మిగిలి ఉండగానే ప్రతిష్టాత్మక యాషెస్ సిరీస్‌ను 3-0 తేడాతో ఆసీస్ సొంతం చేసుకుంది. 435 పరుగుల భారీ లక్ష్యంతో రెండో ఇన్నింగ్స్ ప్రారంభించిన ఇంగ్లండ్, చివరకు 352 పరుగులకే ఆలౌటైంది.

ఇంగ్లండ్ బ్యాటర్లలో జాక్ క్రాలీ (151 బంతుల్లో 85; 8 ఫోర్లు) పోరాట పూరిత ఇన్నింగ్స్ ఆడగా, జేమీ స్మిత్ (60), విల్ జాక్స్ (47), బ్రైడన్ కార్స్ (39) కొంతవరకు అండగా నిలిచారు. అయినప్పటికీ, ఈ ప్రయత్నాలు జట్టును ఓటమి నుంచి కాపాడలేకపోయాయి. రికార్డు లక్ష్యఛేదనలో ఇంగ్లండ్‌కు శుభారంభం దక్కలేదు. రెండో ఓవర్‌లోనే ఓపెనర్ బెన్ డకెట్ (4) ఔటయ్యాడు. కాసేపటికే ఒలీ పోప్ (17) కూడా పెవిలియన్‌కు చేరాడు.

పోరాటానికి మారుపేరైన జో రూట్ (63 బంతుల్లో 39; 5 ఫోర్లు) కీలక దశలో వెనుదిరగడం ఇంగ్లండ్‌కు పెద్ద దెబ్బగా మారింది. ఈ మూడు వికెట్లను ఆసీస్ కెప్టెన్ ప్యాట్ కమిన్స్ తన ఖాతాలో వేసుకున్నాడు. అయితే హ్యారీ బ్రూక్ (56 బంతుల్లో 30; 2 ఫోర్లు) అండతో క్రాలీ ఇన్నింగ్స్‌ను చక్కదిద్దాడు. వీరిద్దరూ నాలుగో వికెట్‌కు 68 పరుగుల భాగస్వామ్యం నెలకొల్పడంతో ఒక దశలో ఇంగ్లండ్ స్కోరు 177/3గా నిలిచి బలంగా కనిపించింది.

అయితే ఆ సమయంలో రంగంలోకి దిగిన ఆసీస్ స్పిన్నర్ నాథన్ లియోన్ మ్యాచ్ దిశనే మార్చేశాడు. స్వల్ప వ్యవధిలోనే మూడు కీలక వికెట్లు పడగొట్టి ఆస్ట్రేలియాకు ఆధిక్యం అందించాడు. బ్రూక్‌తో పాటు కెప్టెన్ బెన్ స్టోక్స్‌ (18 బంతుల్లో 5; 1 ఫోర్)ను క్లీన్ బౌల్డ్ చేశాడు. కాసేపటికే క్రాలీ స్టంపౌట్ కావడంతో ఇంగ్లండ్ 194/6 స్కోరుతో తీవ్ర ఒత్తిడిలో పడింది. తొలి ఇన్నింగ్స్‌లో ఒంటరి పోరాటం చేసిన స్టోక్స్ ఈసారి మాత్రం ప్రభావం చూపలేకపోయాడు.

అయితే జేమీ స్మిత్, విల్ జాక్స్ నిలకడగా ఆడి ఇంగ్లండ్ శిబిరంలో ఆశలు చిగురింపజేశారు. స్మిత్ ఔటైన తర్వాత క్రీజులోకి వచ్చిన బ్రైడన్ కార్స్ కూడా ఆకట్టుకునే ప్రదర్శన చేశాడు. కానీ జాక్స్ ఔటవ్వడంతో ఇంగ్లండ్ ఓటమి ఖాయమైంది. కార్స్ నాటౌట్‌గా నిలవగా, ఆర్చర్ మరియు టంగ్ వరుసగా వికెట్లు కోల్పోయారు. ఆసీస్ బౌలర్లలో మిచెల్ స్టార్క్, ప్యాట్ కమిన్స్, నాథన్ లియోన్ తలా మూడు వికెట్లు సాధించి జట్టును విజయపథంలో నడిపించారు.

హెడ్ భారీ శతకం

ఇంతకుముందు ఆస్ట్రేలియా రెండో ఇన్నింగ్స్‌లో 349 పరుగులకు ఆలౌటైంది. ట్రావిస్ హెడ్ (219 బంతుల్లో 170; 16 ఫోర్లు, 2 సిక్స్‌లు) అద్భుతమైన సెంచరీతో ఆసీస్ ఇన్నింగ్స్‌కు బలమైన పునాది వేశాడు. అలెక్స్ కేరీ (128 బంతుల్లో 72; 6 ఫోర్లు) అర్ధశతకంతో చక్కటి సహకారం అందించాడు. మిగతా బ్యాటర్లు పెద్దగా రాణించకపోవడంతో ఆస్ట్రేలియా ఆశించిన స్కోరు కంటే ముందే ఆలౌటైంది.

జోష్ ఇంగ్లిస్ (10), కెప్టెన్ ప్యాట్ కమిన్స్ (6) నిరాశపరిచారు. ఈ సిరీస్‌లో బ్యాట్‌తోనూ ప్రభావం చూపుతున్న స్టార్ పేసర్ మిచెల్ స్టార్క్ 7 పరుగులతో అజేయంగా నిలిచాడు. ఇంగ్లండ్ బౌలర్లలో జోష్ టంగ్ నాలుగు వికెట్లు పడగొట్టగా, బ్రైడన్ కార్స్ మూడు వికెట్లు తీశాడు.

మరిన్ని వార్తలు చదవండి: కష్టానికి ఫలితం దక్కింది ఇషాన్ టీ20 వరల్డ్ కప్ ఎంపికపై తల్లి మాటలు