Ashes 3rd Test: DRS Blunder Sparks Massive Controversy on Jamie Smith’s Dismissal
ఇంగ్లాండ్–ఆస్ట్రేలియా మధ్య జరుగుతున్న యాషెస్ మూడో టెస్టు తీవ్ర వివాదాలతో కుదిపేస్తోంది. ముఖ్యంగా DRS (డిసిషన్ రివ్యూ సిస్టమ్) విషయంలో వరుస తప్పిదాలు చోటు చేసుకోవడంతో మ్యాచ్పై తీవ్ర విమర్శలు వెల్లువెత్తుతున్నాయి. ఆస్ట్రేలియా DRS ఆపరేటర్ల పనితీరుపై నెటిజన్లు తీవ్ర ఆగ్రహం వ్యక్తం చేస్తున్నారు.
యాషెస్ రెండో రోజు ఆటలో ఇంగ్లాండ్ వికెట్ కీపర్–బ్యాటర్ జెమీ స్మిత్ ఔట్కు సంబంధించి జరిగిన సంఘటన వివాదాస్పదంగా మారింది. స్పష్టంగా నాటౌట్ అనిపించిన సందర్భంలో కూడా అతడిని ఔట్గా ప్రకటించడం అందరినీ ఆశ్చర్యానికి గురిచేసింది.
ప్యాట్ కమ్మిన్స్ బౌలింగ్లో స్మిత్ పుల్ షాట్ ఆడేందుకు ప్రయత్నించగా బంతి బ్యాట్ను మిస్ అయ్యి నేరుగా వికెట్ కీపర్ చేతుల్లోకి వెళ్లింది. బంతి బ్యాట్ను తాకిందా లేదా అనే అనుమానంతో ఆస్ట్రేలియా జట్టు DRS కోరింది. రీప్లేల్లో బ్యాట్, బంతి మధ్య స్పష్టమైన గ్యాప్ కనిపించినప్పటికీ, స్నికోమీటర్లో స్పైక్ చూపించడం తీవ్ర అనుమానాలకు తావిచ్చింది.
దీంతో థర్డ్ అంపైర్ జెమీ స్మిత్ను ఔట్గా ప్రకటించాడు. ఈ నిర్ణయం భారీ వివాదానికి దారి తీసింది. ఇంగ్లాండ్ అభిమానులు ఆగ్రహంతో రగిలిపోయారు. “ఆస్ట్రేలియాలో వాడుతున్న టెక్నాలజీ దారుణం”, “కామన్ సెన్స్ లేకుండా ఇలాంటి ఔట్ ఎలా ఇస్తారు?” అంటూ సోషల్ మీడియాలో మండిపడుతున్నారు.
ఇదే మ్యాచ్లో తొలి రోజు కూడా థర్డ్ అంపైర్ తప్పిదం మరోసారి చర్చనీయాంశమైంది. సెంచరీ చేసి జోరుమీదున్న ఆస్ట్రేలియా వికెట్ కీపర్ బ్యాటర్ను తప్పు నిర్ణయం కారణంగా పెవిలియన్కు పంపించారు. ఈ ఘటన తర్వాత మిచెల్ స్టార్క్ స్టంప్ మైక్లో “స్నికోమీటర్ చెత్త టెక్నాలజీ, దీన్ని తొలగించాలి” అంటూ తీవ్ర అసంతృప్తి వ్యక్తం చేసిన మాటలు వినిపించాయి.
మరోవైపు ఇంగ్లాండ్ కెప్టెన్ బెన్ స్టోక్స్ కూడా అంపైర్ల నిర్ణయాలపై తీవ్ర అసహనం వ్యక్తం చేశాడు. DRS వ్యవస్థ ఘోరంగా విఫలమవుతోందని, ఇది ఆట ఆత్మకు విరుద్ధమని వ్యాఖ్యానించాడు.
మ్యాచ్ పరిస్థితికి వస్తే… తొలుత బ్యాటింగ్ చేసిన ఆస్ట్రేలియా జట్టు 377 పరుగులకు ఆలౌటైంది. అనంతరం తొలి ఇన్నింగ్స్ ప్రారంభించిన ఇంగ్లాండ్ రెండో రోజు ఆట ముగిసే సరికి 8 వికెట్ల నష్టానికి 213 పరుగులు చేసింది. యాషెస్ మూడో టెస్టు కంటే కూడా, DRS వివాదాలే ఇప్పుడు ప్రపంచ క్రికెట్లో ప్రధాన చర్చగా మారాయి.
మరిన్ని వార్తలు చదవండి: Jasprit Bumrah: హెచ్చరించినా వినలేదు.. ఎయిర్పోర్ట్లో బుమ్రా ఆగ్రహం వెనుక అసలు కారణం ఇదే