Asia Cup Rising Stars Final: Pakistan Shaheens Edge Sri Lanka to Enter Final!

ఆసియా కప్ రైజింగ్ స్టార్స్ రెండో సెమీఫైనల్‌లో పాకిస్థాన్ షాహీన్స్ జట్టు ఉత్కంఠభరితంగా ఆడి, శ్రీలంక-ఏ జట్టును 5 పరుగుల తేడాతో ఓడించి ఫైనల్‌కు అర్హత సాధించింది. ఈ మ్యాచ్‌లో మొదట బ్యాటింగ్ చేసిన పాకిస్థాన్ 154 పరుగులు చేసి పోరుకు తగిన స్కోరు అందించింది. అనంతరం ఛేదనలో దిగిన శ్రీలంక 20 ఓవర్లలో 149 పరుగులు మాత్రమే చేయగలిగింది. నవంబర్ 23 (ఆదివారం) జరిగే ఫైనల్‌లో పాకిస్థాన్ బంగ్లాదేశ్‌తో తలపడనుంది.

చివరి ఓవర్లో శ్రీలంక ట్విస్ట్… కానీ ఓటమి!

154 పరుగుల లక్ష్యం ఛేదనకు దిగిన శ్రీలంక దూకుడుగా ఆరంభించింది. ఓపెనర్ లసిత్ క్రోస్పూలే కేవలం 1.3 ఓవర్లలోనే 29 పరుగులు కొట్టి మంచి స్టార్ట్ ఇచ్చాడు. అయితే తర్వాత శ్రీలంక ఇన్నింగ్స్ అంతంత మాత్రంగానే సాగింది. వరుస వికెట్లు జట్టును పతనం దిశగా నడిపించాయి.

మిలన్ ప్రియనాథ్ రత్నాయకే చివరి వరకు పోరాడి 40 పరుగులు చేసి ఆశలు రేపినా… చివరి ఓవర్లో అతడు ఔట్ కావడంతో శ్రీలంక 5 పరుగుల తేడాతో లక్ష్యానికి చేరువలోనే ఆగిపోయింది.

పాకిస్థాన్ 154 – ఘోరీ అద్భుత ఇన్నింగ్స్

ముందుగా బ్యాటింగ్ చేసిన పాకిస్థాన్-ఏ (షాహీన్స్) జట్టు 20 ఓవర్లలో 9 వికెట్లకు 153 పరుగులు చేసింది. టాస్ గెలిచిన శ్రీలంక-ఏ బౌలింగ్ ఎంచుకోవడంతో పాకిస్థాన్ వేగంగా ఆరంభించింది.

ఓపెనర్ మాజ్ సదాకత్ కేవలం 11 బంతుల్లోనే 2 సిక్స్‌లు, 2 ఫోర్లతో 23 పరుగులు చేసి దుమ్ము రేపాడు. మహమ్మద్ నయీమ్ 16 పరుగులు చేశాడు. అయితే ఒక్కసారిగా పాకిస్థాన్ మిడిల్ ఆర్డర్ కుప్పకూలి 62/5 స్థితిలో పడిపోయింది.

ఈ సమయంలో వికెట్ కీపర్ బ్యాటర్ గాజీ ఘోరీ నిలకడగా ఆడి 36 బంతుల్లో నాటౌట్ 39 పరుగులతో జట్టును ఆదుకున్నాడు. సాద్ మసూద్ (22) కూడా కీలక మద్దతు ఇచ్చాడు.

ఇన్నింగ్స్ చివర్లో అహ్మద్ డానియల్ కేవలం 8 బంతుల్లోనే 3 సిక్స్‌లతో 22 పరుగులు చేసి స్కోరును 150 దాటించాడు.

మదూశన్ దుమ్మురేపాడు – 4 వికెట్లు

శ్రీలంక-ఏ తరఫున ప్రమోద్ మదూశన్ అద్భుత ప్రదర్శన కనబరిచి 4 వికెట్లు తీసి పాకిస్థాన్‌ను ఒత్తిడిలోకి నెట్టాడు. స్పిన్నర్ ట్రవీన్ మ్యాథ్యూ కూడా మెరుగైన బౌలింగ్‌తో 3 వికెట్లు తీసి పాకిస్థాన్ టాప్ ఆర్డర్‌ను కుదిపేశాడు.

మరిన్ని వార్తలు చదవండి: ఐపీఎల్ రికార్డులు: 2008–2025 మధ్య ఎవరు ఎక్కువ పరుగులు చేశారు?