Aus vs Eng Test: Steve Smith to Lead Australia in Boxing Day Test
సొంతగడ్డపై జరుగుతున్న ప్రతిష్టాత్మక యాషెస్ సిరీస్ను ఇప్పటికే కైవసం చేసుకున్న ఆస్ట్రేలియా జట్టు ఘనోత్సాహంతో ముందుకు సాగుతోంది. పెర్త్, బ్రిస్బేన్, అడిలైడ్ వేదికలపై జరిగిన తొలి మూడు టెస్టుల్లో ఇంగ్లండ్ను ఏకపక్షంగా ఓడించి, ఇంకా రెండు మ్యాచ్లు మిగిలి ఉండగానే ట్రోఫీని రిటైన్ చేసుకుంది. అయితే, ఇక్కడితో ఆగకుండా మిగిలిన నాలుగో, ఐదో టెస్టుల్లోనూ గెలిచి ఇంగ్లండ్కు వైట్వాష్ షాక్ ఇవ్వాలనే లక్ష్యంతో ఆసీస్ సిద్ధమవుతోంది.
ఈ నేపథ్యంలో ఆస్ట్రేలియా-ఇంగ్లండ్ మధ్య మెల్బోర్న్ వేదికగా జరగనున్న బాక్సింగ్ డే టెస్టుపై ఆసక్తి నెలకొంది. అయితే ఈ మ్యాచ్కు రెగ్యులర్ కెప్టెన్ ప్యాట్ కమిన్స్కు విశ్రాంతి ఇవ్వగా, మరోసారి స్టీవ్ స్మిత్ జట్టును నడిపించనున్నాడు. తొలి రెండు టెస్టుల్లో కమిన్స్ స్థానంలో కెప్టెన్గా బాధ్యతలు నిర్వహించి విజయాలు అందించిన స్మిత్, ఈసారి కూడా అదే జోరును కొనసాగించాలని భావిస్తున్నాడు.
అయితే నాలుగో టెస్టుకు ముందు ఆసీస్కు స్వల్ప ఇబ్బందులు ఎదురయ్యాయి. కమిన్స్తో పాటు సీనియర్ స్పిన్నర్ నాథన్ లియోన్ కూడా గాయం కారణంగా ఈ మ్యాచ్కు దూరమయ్యాడు. దీంతో తుది జట్టు కూర్పుపై స్టీవ్ స్మిత్ స్పష్టతకు రాలేకపోయాడు. ఈ పరిస్థితుల్లో బాక్సింగ్ డే టెస్టుకు 12 మంది సభ్యులతో కూడిన జట్టును ఆస్ట్రేలియా ప్రకటించింది.
ప్లేయింగ్ ఎలెవన్లోని రెండు స్థానాల కోసం పేసర్లు బ్రెండాన్ డాగెట్, మైకేల్ నాసర్, జే రిచర్డ్సన్ల మధ్య తీవ్ర పోటీ నెలకొన్నట్లు స్మిత్ వెల్లడించాడు. మెల్బోర్న్ పిచ్ పచ్చగా ఉండటంతో దాని స్వభావాన్ని నిశితంగా పరిశీలించిన తర్వాతే తుది జట్టును ఎంపిక చేస్తామని స్పష్టం చేశాడు. దీంతో మరోసారి స్పిన్నర్ టాడ్ మర్ఫీకి అవకాశం దక్కే అవకాశాలు తక్కువగా కనిపిస్తున్నాయి.
ఇదిలా ఉండగా, మూడో టెస్టులో 82, 40 పరుగులతో కీలక ఇన్నింగ్స్లు ఆడిన ఉస్మాన్ ఖవాజా తన స్థానాన్ని పదిలం చేసుకున్నాడు. అయితే వికెట్ కీపర్ బ్యాటర్ జోష్ ఇంగ్లిస్కు ఈ మ్యాచ్లో చోటు దక్కలేదు.
బాక్సింగ్ డే టెస్టుకు ఆస్ట్రేలియా ప్లేయింగ్ XII:
ట్రవిస్ హెడ్, జేక్ వెదరాల్డ్, మార్నస్ లబుషేన్, స్టీవ్ స్మిత్ (కెప్టెన్), ఉస్మాన్ ఖవాజా, అలెక్స్ క్యారీ (వికెట్ కీపర్), కామెరాన్ గ్రీన్, మిచెల్ స్టార్క్, స్కాట్ బోలాండ్, బ్రెండాన్ డాగెట్, మైకేల్ నాసర్, జే రిచర్డ్సన్.
బాక్సింగ్ డే టెస్టుకు ఆస్ట్రేలియా జట్టు:
స్టీవ్ స్మిత్ (కెప్టెన్), స్కాట్ బోలాండ్, అలెక్స్ క్యారీ, బ్రెండాన్ డాగెట్, కామెరాన్ గ్రీన్, ట్రవిస్ హెడ్, జోష్ ఇంగ్లిస్, ఉస్మాన్ ఖవాజా, మార్నస్ లబుషేన్, టాడ్ మర్ఫీ, మైకేల్ నాసర్, జే రిచర్డ్సన్, మిచెల్ స్టార్క్, జేక్ వెదరాల్డ్, బ్యూ వెబ్స్టర్.
ఇదే సమయంలో, బాక్సింగ్ డే టెస్టుకు ఇంగ్లండ్ కూడా తన తుదిజట్టును ప్రకటించింది. గాయం కారణంగా జోఫ్రా ఆర్చర్ ఈ మ్యాచ్కు దూరమయ్యాడు. అలాగే ఓలీ పోప్ను జట్టులో నుంచి తప్పించారు. వీరి స్థానాల్లో గస్ అట్కిన్సన్, యువ ఆటగాడు జేకబ్ బెతెల్కు అవకాశం కల్పించారు.
బాక్సింగ్ డే టెస్టుకు ఇంగ్లండ్ తుదిజట్టు:
జాక్ క్రాలే, బెన్ డకెట్, జేకబ్ బెతెల్, జో రూట్, హ్యారీ బ్రూక్, బెన్ స్టోక్స్ (కెప్టెన్), జేమీ స్మిత్ (వికెట్ కీపర్), విల్ జాక్స్, గస్ అట్కిన్సన్, బ్రైడన్ కార్స్, జోష్ టంగ్.
మరిన్ని వార్తలు చదవండి: యాషెస్ ఫియాస్కో తర్వాత ఇంగ్లాండ్లో కోచ్ మార్పులు? రవిశాస్త్రి పేరు హాట్ టాపిక్