AUS vs ZIM Highlights: Zimbabwe Stun Australia in T20 World Cup 2026

టీ20 ప్రపంచకప్ 2026లో ఆస్ట్రేలియాపై సంచలన విజయం సాధించి ఉత్సాహంగా ఉన్న జింబాబ్వే జట్టుకు భారీ షాక్ తగిలింది. అనుభవజ్ఞుడైన వికెట్ కీపర్ బ్యాటర్ బ్రెండన్ టేలర్ హామ్ స్ట్రింగ్ గాయంతో టోర్నీ మొత్తానికి దూరమయ్యాడు. ఈ టోర్నీలో జింబాబ్వే ఆడిన తొలి మ్యాచ్ ఒమన్‌పై జరిగింది. ఆ మ్యాచ్‌లో టేలర్ మూడు అద్భుతమైన క్యాచ్‌లు పట్టడంతో పాటు 30 బంతుల్లో 31 పరుగులు చేసి జట్టుకు సహాయపడ్డాడు.

బ్యాటింగ్ చేస్తున్న సమయంలో టేలర్ కుడి కాలి హామ్ స్ట్రింగ్ సమస్యతో బాధపడుతూ రిటైర్డ్ హర్ట్‌గా మైదానం వీడాడు. మొదట గాయం చిన్నదేనని భావించినప్పటికీ వైద్య పరీక్షల అనంతరం పూర్తిగా కోలుకోవడానికి సమయం పడుతుందని వైద్యులు వెల్లడించారు. దీంతో అతడు టోర్నీ మొత్తం ఆడలేడని జింబాబ్వే క్రికెట్ బోర్డు అధికారికంగా ప్రకటించింది. టేలర్ స్థానంలో బెన్ కర్రన్‌ను జట్టులోకి తీసుకుంటున్నట్లు కూడా తెలియజేసింది.

ప్రపంచ క్రికెట్‌లో టేలర్‌కు ప్రత్యేక గుర్తింపు ఉంది. 2007లో జరిగిన తొలి టీ20 ప్రపంచకప్ నుంచి ప్రస్తుత 2026 టోర్నీ వరకు ఆడిన అరుదైన ఆటగాడు ఆయనే. 40 ఏళ్ల వయసులోనూ జట్టుకు కీలక సభ్యుడిగా కొనసాగుతున్న టేలర్ గైర్హాజరు జింబాబ్వేకు పెద్ద లోటుగా మారనుంది.

ఇదిలా ఉండగా ఫిబ్రవరి 13న జరిగిన మ్యాచ్‌లో జింబాబ్వే ఆస్ట్రేలియాపై 23 పరుగుల తేడాతో సంచలన విజయం నమోదు చేసింది. తొలుత బ్యాటింగ్ చేసిన జింబాబ్వే నిర్ణీత 20 ఓవర్లలో రెండు వికెట్ల నష్టానికి 169 పరుగులు చేసింది. కష్టమైన పిచ్‌పై బ్రియాన్ బెన్నెట్ 64 పరుగులతో అజేయంగా నిలవగా మరుమణి 35, ర్యాన్ బర్ల్ 35, సికందర్ రజా 25 పరుగులతో జట్టుకు బలమైన స్కోరు అందించారు.

లక్ష్యాన్ని ఛేదించేందుకు వచ్చిన ఆస్ట్రేలియాను జింబాబ్వే బౌలర్లు అద్భుతంగా కట్టడి చేశారు. ముజరబానీ నాలుగు వికెట్లు తీసి మ్యాచ్‌ను మలుపుతిప్పగా బ్రాడ్ ఈవాన్స్ మూడు వికెట్లతో తోడ్పడ్డాడు. మసకద్జ, ర్యాన్ బర్ల్ తలో వికెట్ సాధించారు.

గ్రేమీ క్రీమర్ కట్టుదిట్టంగా బౌలింగ్ చేశాడు. ఫలితంగా ఆస్ట్రేలియా 19.3 ఓవర్లలో 146 పరుగులకే ఆలౌట్ అయింది. మ్యాట్ రెన్ షా 65 పరుగులు, మ్యాక్స్‌వెల్ 31 పరుగులతో పోరాడినా జట్టును గెలిపించలేకపోయారు.

మరిన్ని వార్తలు చదవండి: ICC T20 World Cup 2026: పాల్ స్టిర్లింగ్ గాయం, ఐర్లాండ్ జట్టులో సామ్ టాపింగ్ ఎంపిక