Australia vs England: After Cummins & Hazlewood, Khawaja in Doubt Too – Major Concern for Australia
ఇంగ్లండ్తో జరగనున్న పింక్ బాల్ టెస్టు మ్యాచ్కు ముందు ఆస్ట్రేలియా జట్టుకు వరుసగా ఎదురుదెబ్బలు తగులుతున్నాయి. ఇప్పటికే కెప్టెన్ ప్యాట్ కమిన్స్, స్పీడ్ స్టార్ జోష్ హాజిల్వుడ్ గాయాల కారణంగా రెండో టెస్టుకు అందుబాటులో ఉండరని క్రికెట్ ఆస్ట్రేలియా అధికారికంగా ప్రకటించింది. తాజాగా, ఈ జాబితాలో ఓపెనర్ ఉస్మాన్ ఖవాజా పేరు కూడా చేరే అవకాశం ఉందన్న వార్త ఆసీస్కు కొత్త తలనొప్పిగా మారింది.
యాషెస్ సిరీస్తో బిజీగా ఉన్న ఆస్ట్రేలియా, పెర్త్లో జరిగిన తొలి టెస్టులో ఇంగ్లండ్పై ఎనిమిది వికెట్ల తేడాతో ఘన విజయం సాధించింది. కమిన్స్ గైర్హాజరీలో స్టీవ్ స్మిత్ జట్టును నడిపించాడు. పిచ్ స్వభావం కారణంగా మ్యాచ్ కేవలం రెండు రోజులకే ముగిసింది. ఇక డిసెంబర్ 4 నుంచి 8 వరకు బ్రిస్బేన్ గాబా స్టేడియంలో రెండో టెస్టు జరగనుంది.
అయితే, ఖవాజా ఫిట్నెస్ ఆస్ట్రేలియాకు ఆందోళన కలిగిస్తోంది. పెర్త్ టెస్టు సమయంలో అతడికి వెన్నునొప్పి తిరగబెట్టింది. తొలి ఇన్నింగ్స్లో ఆలస్యంగా క్రీజులోకి రావడం, రెండో ఇన్నింగ్స్లో ఓపెనింగ్ చేయకపోవడం కూడా దీనివల్లేనని తెలుస్తోంది.
పింక్బాల్ టెస్టు ముందస్తు ప్రాక్టీస్ సమయంలో కూడా ఖవాజా వెన్నునొప్పితో ఇబ్బంది పడ్డాడని క్రికెట్ ఆస్ట్రేలియా వెల్లడించింది. కేవలం 30 నిమిషాల బ్యాటింగ్ సెషన్ కూడా పూర్తిగా ఆడలేకపోయినట్లు సమాచారం.
ఈ పరిస్థితుల్లో ఖవాజా రెండో టెస్టుకు దూరమయ్యే అవకాశం ఉండటంతో ఆసీస్కు పెద్ద షాక్ తగిలినట్లే. గాబాలో జరిగిన గత మూడు పింక్ బాల్ టెస్ట్ మ్యాచ్లలో ఆడిన అనుభవం ప్రస్తుత జట్టులో ఖవాజాకే ఉంది. అతడు లేకపోతే ఆ విలువైన అనుభవం జట్టుకు దొరకదు. ఒకవేళ అతడు అందుబాటులో లేకపోతే బ్యూ వెబ్స్టర్, జోష్ ఇంగ్లిస్లను ఆప్షన్లుగా పరిశీలించే అవకాశం ఉంది.
ఇంగ్లండ్తో పింక్బాల్ టెస్టుకు ఆస్ట్రేలియా జట్టు:
స్టీవ్ స్మిత్ (కెప్టెన్), స్కాట్ బోలాండ్, అలెక్స్ కారీ, బ్రెండన్ డాగెట్, కామెరాన్ గ్రీన్, ట్రావిస్ హెడ్, జోష్ ఇంగ్లిస్, ఉస్మాన్ ఖవాజా, మార్నస్ లబుషేన్, నాథన్ లియోన్, మైఖేల్ నెజర్, మిచెల్ స్టార్క్, జేక్ వెదర్రాల్డ్, బ్యూ వెబ్స్టర్.
మరిన్ని వార్తలు చదవండి: IND vs SA 2nd ODI: సౌతాఫ్రికాకు పెద్ద బూస్ట్! బవుమా–మహారాజ్ రీ ఎంట్రీతో జట్టు బలపడింది