Australia Women Squads for T20I, ODI and Test Series vs India series
భారత మహిళా జట్టుతో జరగనున్న మల్టీ-ఫార్మాట్ సిరీస్ కోసం క్రికెట్ ఆస్ట్రేలియా తమ జట్లను అధికారికంగా ప్రకటించింది. ఈ సిరీస్తో ఆసీస్ మహిళా జట్టులో కొత్త అధ్యాయానికి శ్రీకారం చుట్టినట్లైంది. స్టార్ ఆల్రౌండర్ సోఫీ మోలినెక్స్ను టీ20 జట్టు కెప్టెన్గా ఎంపిక చేయగా, భవిష్యత్లో మూడు ఫార్మాట్లకూ ఆమెనే జట్టు నాయకత్వ బాధ్యతలు చేపట్టనున్నట్లు స్పష్టమైంది.
భారత్తో సిరీస్ల అనంతరం ప్రస్తుత కెప్టెన్ అలిస్సా హీలీ అంతర్జాతీయ క్రికెట్కు వీడ్కోలు పలికే అవకాశాలు ఉన్న నేపథ్యంలో, ఆమె వారసురాలిగా మోలినెక్స్ను సెలెక్టర్లు ఎంపిక చేశారు. ఇప్పటికే ప్రస్తుత సిరీస్లో టీ20 జట్టును నడిపించనున్న మోలినెక్స్, ఆ తర్వాత వన్డేలు, టెస్టుల్లోనూ కెప్టెన్సీ బాధ్యతలు స్వీకరించనుంది.
ఆసీస్ జట్టులో ఆష్లీ గార్డనర్, తహిలియా మెక్గ్రాత్ వంటి అనుభవజ్ఞులు ఉన్నప్పటికీ, సెలెక్టర్లు మోలినెక్స్పైనే నమ్మకం ఉంచడం గమనార్హం. బిగ్ బాష్ లీగ్లో మెల్బోర్న్ రెనెగేడ్స్ జట్టును విజయవంతంగా నడిపించిన అనుభవం ఆమెకు పెద్ద ప్లస్గా మారింది. అంతేకాదు, దేశవాళీ క్రికెట్లో విక్టోరియా జట్టుకు కెప్టెన్గా వ్యవహరించిన అనుభవం కూడా ఆమె నాయకత్వ సామర్థ్యానికి నిదర్శనంగా నిలుస్తోంది.
ఇక భారత్తో జరగనున్న టెస్టు సిరీస్కు సంబంధించి ఆసీస్ జట్టులో యువ ఆల్రౌండర్ లూసీ హామిల్టన్కు అవకాశం దక్కింది. ఉమెన్స్ నేషనల్ క్రికెట్ లీగ్లో కేవలం 15 ఏళ్ల వయసులోనే క్వీన్స్ల్యాండ్ తరపున అరంగేట్రం చేసి చరిత్ర సృష్టించిన హామిల్టన్, ఆ తర్వాత బిగ్ బాష్ లీగ్లో ఒక మ్యాచ్లో కేవలం 8 పరుగులు మాత్రమే ఇచ్చి 5 వికెట్లు పడగొట్టి అందరి దృష్టిని ఆకర్షించింది. ప్రస్తుతం ఆమె డబ్ల్యూపీఎల్లో ఢిల్లీ క్యాపిటల్స్ జట్టుకు ప్రాతినిధ్యం వహిస్తోంది.
టీ20 జట్టులో చోటు దక్కని స్పిన్నర్ అలానా కింగ్కు వన్డే జట్టులో మాత్రం సెలెక్టర్లు అవకాశం కల్పించారు. అలాగే గాయం కారణంగా డబ్ల్యూపీఎల్ను మధ్యలోనే వీడిన యువ బ్యాటర్ ఫోబ్ లిచ్ఫీల్డ్కు భారత్తో సిరీస్లకు ఎంపికైన జట్లలో చోటు దక్కడం విశేషం. భారత జట్టు ఆస్ట్రేలియా పర్యటన ఫిబ్రవరి 15 నుంచి ప్రారంభం కానుంది. ఈ సిరీస్పై ఇప్పటికే అభిమానుల్లో భారీ అంచనాలు నెలకొన్నాయి.
ఆస్ట్రేలియా టీ20 జట్టు:
డార్సీ బ్రౌన్, నికోలా కేరీ, కిమ్ గార్త్, గ్రేస్ హారిస్, ఫోబ్ లిచ్ఫీల్డ్, బెత్ మూనీ, ఎల్లీస్ పెర్రీ, మేగాన్ షుట్, అనబెల్ సదర్లాండ్, జార్జియా వోల్, జార్జియా వేర్హామ్.
ఆస్ట్రేలియా వన్డే జట్టు:
డార్సీ బ్రౌన్, నికోలా కేరీ, ఆష్లీ గార్డనర్, కిమ్ గార్త్, అలానా కింగ్, ఫోబ్ లిచ్ఫీల్డ్, బెత్ మూనీ, తహిలియా మెక్గ్రాత్, ఎల్లీస్ పెర్రీ, అనబెల్ సదర్లాండ్, జార్జియా వోల్, జార్జియా వేర్హామ్.
ఆస్ట్రేలియా టెస్టు జట్టు:
డార్సీ బ్రౌన్, ఆష్లీ గార్డనర్, కిమ్ గార్త్, లూసీ హామిల్టన్, అలానా కింగ్, ఫోబ్ లిచ్ఫీల్డ్, బెత్ మూనీ, తహిలియా మెక్గ్రాత్, ఎల్లీస్ పెర్రీ, అనబెల్ సదర్లాండ్, జార్జియా వోల్, జార్జియా వేర్హామ్.
మరిన్ని వార్తలు చదవండి: ఆస్ట్రేలియా కొత్త కెప్టెన్గా సోఫీ మోలినెక్స్ ఎంపికకు సిద్ధం