Australian Cricket Legend Damien Martyn in Critical Condition Due to Meningitis
ఆస్ట్రేలియా క్రికెట్ దిగ్గజం డామియన్ మార్టిన్ తీవ్ర అనారోగ్యంతో ఆస్పత్రిలో చికిత్స పొందుతున్నాడు. మెనింజైటిస్ బారిన పడిన మార్టిన్ ప్రస్తుతం క్వీన్స్లాండ్లోని ఓ ఆస్పత్రి ఐసీయూలో ఉన్నాడు. అతడి పరిస్థితి విషమంగా ఉండటంతో వైద్యులు మత్తు మందులు ఇచ్చి, తాత్కాలికంగా కోమాలోకి పంపారు.
మెనింజైటిస్ కారణంగా మెదడు సహా ఇతర కీలక అవయవాలకు నష్టం కలగకుండా ఉండేందుకు ఇది వైద్యపరంగా తీసుకున్న కీలక నిర్ణయమని డాక్టర్లు తెలిపారు. ఇలాంటి సందర్భాల్లో రోగిని తాత్కాలిక కోమాలో ఉంచడం వల్ల గుండెపోటు వంటి ప్రాణాంతక సమస్యలను నివారించే అవకాశం ఉంటుందని వైద్య నిపుణులు వెల్లడించారు.
1992 నుంచి 2006 వరకు ఆస్ట్రేలియా తరఫున అంతర్జాతీయ క్రికెట్లో సేవలందించిన డామియన్ మార్టిన్ గొప్ప ఆటగాడిగా గుర్తింపు పొందాడు. తన కెరీర్లో 67 టెస్టులు, 208 వన్డేలు, 4 టీ20 మ్యాచ్లు ఆడిన అతడు.. టెస్టుల్లో 4406 పరుగులు, వన్డేల్లో 5346 పరుగులు, టీ20ల్లో 120 పరుగులు సాధించాడు. స్థిరమైన బ్యాటింగ్తో జట్టుకు కీలక విజయాలు అందించిన ఆటగాళ్లలో మార్టిన్ ఒకడు.
ఇటీవల ఆస్ట్రేలియా–ఇంగ్లండ్ మధ్య జరుగుతున్న యాషెస్ సిరీస్లో భాగంగా బాక్సింగ్ డే టెస్టుకు ముందు మార్టిన్ సోషల్ మీడియాలో ఓ పోస్టు పెట్టాడు. అయితే, ఆ కొద్దిసేపటికే అతడి ఆరోగ్యంలో అకస్మాత్తుగా మార్పులు రావడంతో హుటాహుటిన ఆస్పత్రికి తరలించారు. ప్రస్తుతం అతడు ఐసీయూలో చికిత్స పొందుతున్నాడన్న వార్తతో క్రికెట్ ఆస్ట్రేలియా వర్గాలు ఒక్కసారిగా కలవరపడ్డాయి.
మార్టిన్ ఆరోగ్యంపై పలువురు క్రికెట్ దిగ్గజాలు స్పందించారు. ఆస్ట్రేలియా మాజీ కోచ్ డారెన్ లెహ్మాన్ మాట్లాడుతూ, “డామియన్ మార్టిన్ ఒక యోధుడు. అతడు ఈ పరిస్థితిని అధిగమించి, త్వరలోనే పూర్తి ఆరోగ్యంతో తిరిగి రావాలని కోరుకుంటున్నాను” అని అన్నారు. మరోవైపు అతడి సన్నిహిత మిత్రుడు ఆడమ్ గిల్క్రిస్ట్ మాట్లాడుతూ, “మార్టిన్కు అత్యుత్తమ వైద్య చికిత్స అందిస్తున్నారు. అతడి కుటుంబానికి మేమంతా అండగా ఉన్నాం. అతడి ఆరోగ్యం కోసం ప్రతి ఒక్కరూ ప్రార్థించాలి” అని కోరాడు.
మెదడు మరియు వెన్నుపాము చుట్టూ ఉండే రక్షణ పొరలను మెనింజెస్ అంటారు. వాటిలో వాపు ఏర్పడితే దాన్ని మెనింజైటిస్గా పిలుస్తారు. సాధారణంగా బ్యాక్టీరియా ఇన్ఫెక్షన్లు దీనికి ప్రధాన కారణం. అధిక జ్వరం, తీవ్రమైన తలనొప్పి, వికారం, మెడ బిగుసుకుపోవడం వంటి లక్షణాలు కనిపిస్తాయి. కొన్ని సందర్భాల్లో ఇది ప్రాణాంతకంగా మారే ప్రమాదం కూడా ఉంది. అందుకే ఇలాంటి లక్షణాలు కనిపించిన వెంటనే వైద్యుడిని సంప్రదించడం అత్యంత అవసరం.
మరిన్ని వార్తలు చదవండి: వరల్డ్ కప్ టార్గెట్: లసిత్ మలింగకు శ్రీలంక క్రికెట్ బోర్డు కీలక బాధ్యత