BBL 2025-26: Finn Allen’s Explosive Century Powers Perth Scorchers to Big Win

బిగ్‌బాష్ లీగ్‌ 2025–26 సీజన్‌లో పెర్త్ స్కార్చర్స్ తరఫున ఆడుతున్న కేకేఆర్ ఆటగాడు ఫిన్ అలెన్ విధ్వంసకర బ్యాటింగ్‌తో అభిమానులను ఉర్రూతలూగించాడు. మెల్‌బోర్న్ రెనెగేడ్స్‌తో జరిగిన కీలక మ్యాచ్‌లో అలెన్ కేవలం 51 బంతుల్లోనే శతకం పూర్తి చేసి మ్యాచ్ గెలుపులో హీరోగా నిలిచాడు. ఈ అద్భుత ఇన్నింగ్స్‌తో స్కార్చర్స్ 50 పరుగుల తేడాతో ఘన విజయం సాధించింది.

పొట్టి ఫార్మాట్‌లో ఫిన్ అలెన్‌కు ఇది ఐదో శతకం కాగా, బిగ్‌బాష్ లీగ్‌లో అతడికి ఇదే తొలి సెంచరీ కావడం విశేషం. ఈ ఇన్నింగ్స్ స్కార్చర్స్ అభిమానులకే కాదు, ఐపీఎల్‌లో కేకేఆర్‌ను అభిమానించే వారికి కూడా ప్రత్యేక ఆనందాన్ని ఇచ్చింది. 2026 ఐపీఎల్ వేలంలో కేకేఆర్ అలెన్‌ను రూ.2 కోట్లకు సొంతం చేసుకున్న సంగతి తెలిసిందే.

ఈ మ్యాచ్‌లో ఆరంభంలో కాస్త జాగ్రత్తగా ఆడిన అలెన్, హాఫ్ సెంచరీ తర్వాత పూర్తిగా గేర్ మార్చాడు. తొలి అర్ధశతకం సాధించాక కేవలం 17 బంతుల్లోనే రెండో అర్ధశతకం పూర్తి చేసి ప్రత్యర్థి బౌలర్లపై విరుచుకుపడ్డాడు. మొత్తం 53 బంతులు ఎదుర్కొన్న అలెన్, 5 ఫోర్లు, 8 సిక్సర్లతో 101 పరుగులు చేశాడు. ముఖ్యంగా గురిందర్ సంధు వేసిన ఇన్నింగ్స్ 11వ ఓవర్‌లో వరుసగా మూడు సిక్సర్లు బాదిన తీరు మ్యాచ్‌కే హైలైట్‌గా నిలిచింది.

ప్లే ఆఫ్స్ అవకాశాలు నిలబెట్టుకోవాలంటే తప్పక గెలవాల్సిన మ్యాచ్‌లో అలెన్ ఊచకోత కోయడంతో స్కార్చర్స్ భారీ విజయాన్ని అందుకుంది. తొలుత బ్యాటింగ్ చేసిన స్కార్చర్స్, అలెన్ శతకంతో నిర్ణీత 20 ఓవర్లలో 7 వికెట్ల నష్టానికి 219 పరుగుల భారీ స్కోర్ నమోదు చేసింది.

అయితే అలెన్ తప్ప మిగతా బ్యాటర్లు పెద్దగా రాణించలేకపోయారు. మిచెల్ మార్ష్ 20, కూపర్ కన్నోలీ 18, ఆరోన్ హార్డీ 22, ఆస్టన్ టర్నర్ 13, లారీ ఇవాన్స్ 21, నిక్ హాబ్సన్ 3 పరుగులకే వెనుదిరిగారు. రెనెగేడ్స్ బౌలర్లలో సామ్ ఇలియట్ 4 వికెట్లు తీసి మెరుగైన ప్రదర్శన కనబరిచాడు.

219 పరుగుల భారీ లక్ష్యంతో బరిలోకి దిగిన మెల్‌బోర్న్ రెనెగేడ్స్ బ్యాటింగ్‌లో తడబడింది. టిమ్ సీఫర్ట్ (66), జేక్ ఫ్రేజర్ (42) మాత్రమే పోరాటం చేయగా, మిగతా బ్యాటర్లు త్వరగానే పెవిలియన్ చేరారు. స్కార్చర్స్ బౌలర్లలో కన్నోలీ, బియర్డ్‌మన్ తలో రెండు వికెట్లు తీయగా, లూక్ హాల్ట్‌, ఆరోన్ హార్డీ చెరో వికెట్ సాధించారు. వారి కట్టుదిట్టమైన బౌలింగ్ ముందు రెనెగేడ్స్ నిర్ణీత ఓవర్లలో 7 వికెట్లు కోల్పోయి 169 పరుగులకే పరిమితమైంది.

మరిన్ని వార్తలు చదవండి: నవీన్ ఉల్ హక్ గాయంతో టీ20 వరల్డ్ కప్‌కు దూరం అఫ్గానిస్తాన్‌కు భారీ ఎదురుదెబ్బ