బంగ్లాదేశ్ క్రికెట్ బోర్డు (BCB) కష్టాలు రోజురోజుకూ పెరుగుతూనే ఉన్నాయి. ఒకవైపు 2026 టీ20 ప్రపంచకప్లో బంగ్లాదేశ్ ఆడే మ్యాచ్లను భారత్ నుంచి శ్రీలంకకు మార్చాలని ఐసీసీకి పలుమార్లు విజ్ఞప్తి చేసినా ఫలితం లేకుండా పోయింది. దీంతో ప్రపంచకప్ను బహిష్కరించాలా? వద్దా? అన్న సందిగ్ధంలో బీసీబీ పడింది. ఇదే సమయంలో మరో భారీ సమస్యగా ఆటగాళ్లందరూ కలిసి బంగ్లాదేశ్ ప్రీమియర్ లీగ్ (BPL) 2026 సీజన్ను బహిష్కరించడం కలకలం రేపింది.
గురువారం షెడ్యూల్ ప్రకారం మీర్పూర్లో చట్టోగ్రామ్ రాయల్స్, నోఖాలి ఎక్స్ప్రెస్ జట్ల మధ్య మ్యాచ్ జరగాల్సి ఉంది. స్థానిక కాలమానం ప్రకారం మధ్యాహ్నం 12.30 గంటలకు టాస్, 1 గంటకు మ్యాచ్ ప్రారంభం కావాల్సి ఉండగా… ఆశ్చర్యకరంగా ఇరు జట్ల ఆటగాళ్లు ఎవరూ స్టేడియానికి చేరుకోలేదు. వారు హోటల్ గదుల్లోనే ఉండిపోయారు. దీంతో ఒక్కసారిగా బీసీబీ తీవ్ర అయోమయంలో పడిపోయింది. అసలు ఈ పరిణామానికి కారణమేంటి అన్నది చర్చనీయాంశంగా మారింది.
ఈ వివాదానికి మూలకారణం బీసీబీ డైరెక్టర్ ఎం. నజ్ముల్ ఇస్లాం చేసిన వ్యాఖ్యలే. ఆయన బంగ్లాదేశ్ మాజీ కెప్టెన్ తమీమ్ ఇక్బాల్తో పాటు పలువురు సీనియర్ ఆటగాళ్లను ‘ఇండియా ఏజెంట్లు’ అంటూ బహిరంగంగా విమర్శించాడు. ఈ వ్యాఖ్యలపై తీవ్ర ఆగ్రహం వ్యక్తం చేసిన బంగ్లాదేశ్ క్రికెటర్స్ వెల్ఫేర్ అసోసియేషన్ (CWAB) సమ్మెకు పిలుపునిచ్చింది. నజ్ముల్ ఇస్లాం రాజీనామా చేసే వరకూ మ్యాచ్లు ఆడేది లేదని స్పష్టం చేసింది.
పరిస్థితిని చక్కదిద్దేందుకు బీసీబీ, సీడబ్ల్యూఏబీ అధికారుల మధ్య బుధవారం అత్యవసర సమావేశం జరిగింది. అయితే ఈ సమావేశంలో ఎలాంటి సానుకూల ఫలితం కనిపించలేదు. దీనితో గురువారం దేశవ్యాప్తంగా జరగాల్సిన అన్ని దేశీయ మ్యాచ్లతో పాటు బంగ్లాదేశ్ ప్రీమియర్ లీగ్ మ్యాచ్లను కూడా ఆటగాళ్లు పూర్తిగా బహిష్కరించారు. నజ్ముల్ ఇస్లాం రాజీనామా చేసే వరకు వెనక్కి తగ్గేది లేదని వారు గట్టిగా నిర్ణయించుకున్నారు.
ఈ పరిణామం బ్రాడ్కాస్టర్లు, స్పాన్సర్లు, ఇప్పటికే టికెట్లు కొనుగోలు చేసిన అభిమానులకు తీవ్ర నిరాశను మిగిల్చింది. లీగ్ మధ్యలోనే ఇలా మ్యాచ్లు ఆగిపోవడంతో బంగ్లాదేశ్ క్రికెట్ బోర్డుకు భారీ ఆర్థిక నష్టం వాటిల్లే అవకాశాలు ఉన్నాయని సమాచారం.
తాజా పరిస్థితుల నేపథ్యంలో బంగ్లాదేశ్ క్రికెట్ పెద్దలు ఆగమేఘాల మీద ఆటగాళ్లతో చర్చలు జరుపుతున్నారు. ఆలస్యమైనప్పటికీ చట్టోగ్రామ్ రాయల్స్, నోఖాలి ఎక్స్ప్రెస్ జట్ల మధ్య మ్యాచ్ను నిర్వహించేలా ప్రయత్నాలు మొదలుపెట్టినట్లు తెలుస్తోంది. బంగ్లా క్రికెట్ భవితవ్యం ఇప్పుడు ఈ చర్చల ఫలితంపైనే ఆధారపడి ఉంది.
మరిన్ని వార్తలు చదవండి: ఆసియా క్రీడలు 2026 క్రికెట్ షెడ్యూల్ విడుదల – మ్యాచ్ తేదీలు, టైమింగ్స్ వివరాలు