Brett Lee Inducted into Australia Cricket Hall of Fame

ఆస్ట్రేలియా ఫాస్ట్‌ బౌలింగ్‌ దిగ్గజం బ్రెట్‌ లీకి అరుదైన, ప్రతిష్టాత్మక గౌరవం లభించింది. తాజాగా ఆయన స్వదేశీ ఆస్ట్రేలియా క్రికెట్ హాల్‌ ఆఫ్‌ ఫేమ్‌లో చోటు దక్కించుకున్నారు. ఈ ఘనత సాధించిన 66వ ఆటగాడిగా బ్రెట్‌ లీ నిలిచాడు. ఇప్పటికే ఈ జాబితాలో ఆస్ట్రేలియా క్రికెట్ చరిత్రను మార్చేసిన అనేక మంది మహానుభావులు ఉన్న సంగతి తెలిసిందే.

2025 సంవత్సరంలోనే లీతో పాటు మాజీ కెప్టెన్ మైఖేల్ క్లార్క్‌, లెజెండరీ బ్యాట్స్‌మన్ మైఖేల్ బెవాన్‌, మహిళా క్రికెట్ దిగ్గజం క్రిస్టినా మాథ్యూస్‌ కూడా హాల్‌ ఆఫ్‌ ఫేమ్‌లోకి ఎంపికయ్యారు. డాన్‌ బ్రాడ్‌మన్‌, అలెన్‌ బోర్డర్‌, షేన్‌ వార్న్‌, రికీ పాంటింగ్‌ వంటి అమరుల సరసన లీ పేరు చేరడం క్రికెట్ అభిమానులకు మరింత ఆనందాన్ని కలిగిస్తోంది.

ప్రస్తుతం 49 ఏళ్ల వయసున్న బ్రెట్‌ లీ, 1999 నుంచి 2012 వరకు దాదాపు దశాబ్దం పైగా తన మెరుపువేగపు బౌలింగ్‌తో ప్రపంచ క్రికెట్‌ను వణికించాడు. ఆ కాలంలో ఆస్ట్రేలియా జట్టు అంతర్జాతీయ క్రికెట్‌లో ఆధిపత్యం చెలాయించడంలో లీ కీలక పాత్ర పోషించాడు.

వికెట్ల కంటే వేగానికే ఎక్కువ గుర్తింపు తెచ్చుకున్న లీ, ఎన్నోసార్లు బౌలింగ్ స్పీడును కొలిచే స్పీడోమీటర్లను సైతం బద్దలు కొట్టిన సందర్భాలు ఉన్నాయి.

బ్రెట్‌ లీ తన కెరీర్‌లో అత్యధికంగా గంటకు 161.1 కిలోమీటర్ల వేగంతో బంతిని సంధించాడు. ఇది ఇప్పటికీ క్రికెట్ చరిత్రలో రెండో అత్యంత వేగవంతమైన బంతిగా గుర్తింపు పొందుతోంది. అతని కంటే కేవలం 0.2 కిలోమీటర్లు ఎక్కువ వేగంతో పాకిస్థాన్‌ స్పీడ్‌స్టర్‌ షోయబ్‌ అక్తర్‌ మొదటి స్థానంలో ఉన్నాడు.

ఈ గౌరవం దక్కిన సందర్భంగా బ్రెట్‌ లీ తన ఆనందాన్ని వ్యక్తం చేశాడు. తాను ఈ స్థాయికి చేరుకోవడానికి ప్రధాన కారణం ఆస్ట్రేలియా పేస్ దిగ్గజం డెన్నిస్ లిల్లీ అని పేర్కొన్నాడు. తొమ్మిదేళ్ల వయసు నుంచే గంటకు 160 కిలోమీటర్ల వేగంతో బంతులు వేయాలనే కల తనలో ఉండేదని, ఆ కలే తనను ఇక్కడి వరకు తీసుకొచ్చిందని లీ భావోద్వేగంగా వెల్లడించాడు.

మరిన్ని వార్తలు చదవండి: న్యూజిలాండ్ వన్డే సిరీస్ నుంచి రిషబ్ పంత్ అవుట్? ఇషాన్ కిషన్‌కు లక్కీ ఛాన్స్