Casinos, Alcohol & Dressing Room Tensions: Why England Collapsed in Ashes
యాషెస్ సిరీస్లో ఆస్ట్రేలియా చేతిలో ఇంగ్లాండ్ జట్టు 4-1తో ఘోర పరాజయాన్ని ఎదుర్కొంది. అయితే ఈ ఓటమి కన్నా కూడా జట్టు లోపలి క్రమశిక్షణ లోపాలు, ఆటగాళ్ల ప్రవర్తనకు సంబంధించిన అంశాలే ఇప్పుడు పెద్ద చర్చకు దారి తీస్తున్నాయి. ముఖ్యంగా ఇంగ్లాండ్ కెప్టెన్ బెన్ స్టోక్స్, హెడ్ కోచ్ బ్రెండన్ మెకల్లమ్ మధ్య తీవ్రస్థాయిలో విభేదాలు తలెత్తినట్లు వార్తలు వెలుగులోకి వచ్చాయి.
‘ది టెలిగ్రాఫ్’ కథనం ప్రకారం, ఆస్ట్రేలియా పర్యటనలో ఇంగ్లాండ్ జట్టు క్రికెట్ కంటే వివాదాలకే ఎక్కువ ప్రాధాన్యం ఇచ్చినట్లు తెలుస్తోంది. మైదానంలో ప్రాక్టీస్ చేయడం కన్నా ఆటగాళ్లు క్యాసినో టేబుళ్ల వద్దే ఎక్కువ సమయం గడిపినట్లు ఆరోపణలు వినిపిస్తున్నాయి.
క్యాసినోలో మకాం
ఇంగ్లాండ్ జట్టు బస చేసిన ‘క్రౌన్ టవర్స్’ హోటల్ ఒక అత్యంత విలాసవంతమైన క్యాసినో కాంప్లెక్స్. అక్కడ ఆటగాళ్లు తరచూ క్యాసినోకు వెళ్లడం, మద్యం సేవించడం అభిమానులు, మీడియా కళ్లకు పడింది. బాక్సింగ్ డే టెస్టుకు ముందు యువ ఆటగాడు జాకబ్ బెథెల్ వేపింగ్ చేస్తూ కెమెరాకు చిక్కగా, ఓపెనర్ బెన్ డకెట్ మద్యం మత్తులో టాక్సీ ఎక్కలేని స్థితిలో ఉన్న వీడియో సోషల్ మీడియాలో వైరల్గా మారింది.
కొంతమంది ఆటగాళ్లు వరుసగా ఆరు రోజుల పాటు మద్యం సేవించినట్లు సమాచారం. దీని ప్రభావం వారి ఫిట్నెస్పై మాత్రమే కాకుండా, మైదానంలో ప్రదర్శనపైనా తీవ్రంగా పడిందని విశ్లేషకులు చెబుతున్నారు.
బెన్ స్టోక్స్ vs బ్రెండన్ మెకల్లమ్: ముదిరిన విభేదాలు
2022 నుంచి కలిసి పని చేస్తున్న బెన్ స్టోక్స్, బ్రెండన్ మెకల్లమ్ మధ్య ఈ సిరీస్ సందర్భంగా సంబంధాలు గణనీయంగా దెబ్బతిన్నట్లు తెలుస్తోంది. బ్రిస్బేన్ డే-నైట్ టెస్టుకు ముందు స్టోక్స్ కఠినమైన శిక్షణకు మొగ్గు చూపగా, మెకల్లమ్ మాత్రం ఆటగాళ్లకు విశ్రాంతి ఇచ్చి ఒత్తిడి తగ్గించాలని భావించారు.
ఆస్ట్రేలియా టెయిల్ ఎండర్లను ఔట్ చేయడంలో స్టోక్స్ అనుసరించిన రక్షణాత్మక వ్యూహాలు మెకల్లమ్కు నచ్చలేదని నివేదికలు చెబుతున్నాయి. స్టోక్స్ ఒత్తిడిలో తడబడుతున్నాడని మెకల్లమ్ అభిప్రాయపడినట్లు సమాచారం. మరోవైపు, స్టోక్స్ జట్టులోని ఆటగాళ్లను ‘బలహీనులు’ అంటూ విమర్శించగా, మెకల్లమ్ మాత్రం జట్టు అవసరానికి మించి ప్రాక్టీస్ చేసిందని భిన్నమైన వ్యాఖ్యలు చేశారు.
ముగిసిన ‘బ్యాజ్బాల్’ శకమా?
ఆస్ట్రేలియా గడ్డపై కేవలం 11 రోజుల్లోనే ఇంగ్లాండ్ యాషెస్ ట్రోఫీని కోల్పోయింది. ఆటగాళ్లలో పెరిగిన మద్యం అలవాట్లు, జూదం, జట్టు మేనేజ్మెంట్ మధ్య సమన్వయ లోపం కలసి ఇంగ్లాండ్ క్రికెట్ను తీవ్రమైన సంక్షోభంలోకి నెట్టినట్లు కనిపిస్తోంది. ఈ వైఫల్యానికి బాధ్యతగా బ్రెండన్ మెకల్లమ్ పదవి నుంచి తప్పుకోవాల్సి రావచ్చని కూడా వార్తలు వినిపిస్తున్నాయి.
మరిన్ని వార్తలు చదవండి: టీ20 ప్రపంచకప్ 2026పై బంగ్లాదేశ్ ఆరోపణలు ఐసీసీ నుంచి గట్టి కౌంటర్