Concern Over Imran Khan Health Former Cricketers Appeal to Pakistan Government
ఇమ్రాన్ ఖాన్ ప్రస్తుతం జైలులో ఉన్న సంగతి తెలిసిందే. అయితే ఇటీవల ఆయన ఆరోగ్య పరిస్థితిపై కుటుంబ సభ్యులు, అభిమానుల్లో తీవ్ర ఆందోళన నెలకొంది. ఇమ్రాన్ ఖాన్ ఆరోగ్యం క్షీణిస్తున్నట్లు ఆయన సోదరి అలీమా ఖనుమ్ వెల్లడించారు. జైలులో ఇమ్రాన్ ఖాన్కు సరైన వైద్య చికిత్స అందడం లేదని ఆమె ఆరోపించారు.
ఇటీవల కోర్టు నియమించిన న్యాయవాది మాట్లాడుతూ జైలులో ఉన్న ఇమ్రాన్ ఖాన్ కుడి కన్నుకు తీవ్రమైన సమస్య తలెత్తిందని తెలిపారు. ఇప్పటికే ఆయన కుడి కన్ను ఎనభై అయిదు శాతం చూపును కోల్పోయిందని చెప్పారు. ఈ సమస్య గురించి ఇమ్రాన్ ఖాన్ గత మూడు నెలలుగా అధికారులకు తెలియజేస్తున్నప్పటికీ ఎలాంటి చర్యలు తీసుకోలేదని ఆరోపణలు వెలువడ్డాయి. దీంతో ఇమ్రాన్ ఖాన్ కుటుంబ సభ్యులతో పాటు ఆయన స్థాపించిన పాకిస్తాన్ తెహ్రీక్ ఎ ఇన్సాఫ్ పార్టీ నేతలు, కార్యకర్తలు తీవ్ర ఆందోళన వ్యక్తం చేశారు. పాకిస్తాన్ ప్రభుత్వ తీరుపై ఆగ్రహం వ్యక్తం చేశారు.
ఈ నేపథ్యంలో ఇమ్రాన్ ఖాన్ ఆరోగ్య పరిస్థితిపై అంతర్జాతీయ క్రికెట్ ప్రపంచం కూడా స్పందించింది. భారత్కు చెందిన సునీల్ గవాస్కర్, కపిల్ దేవ్, ఆస్ట్రేలియాకు చెందిన గ్రెగ్ చాపెల్ సహా ఐదు దేశాలకు చెందిన పద్నాలుగు మంది దిగ్గజ క్రికెటర్లు పాకిస్తాన్ ప్రభుత్వానికి విజ్ఞప్తి చేశారు. ఇమ్రాన్ ఖాన్కు జైలులో అందుతున్న వైద్య సదుపాయాలపై తమకు తీవ్ర ఆందోళన ఉందని తెలిపారు. ఆయనకు తక్షణమే మెరుగైన వైద్య చికిత్స అందించాలని కోరారు.
ఈ అప్పీల్పై సునీల్ గవాస్కర్, కపిల్ దేవ్, మైఖేల్ అథర్టన్, అలన్ బోర్డర్, మైఖేల్ బ్రెయర్లీ, గ్రెగ్ చాపెల్, ఇయాన్ చాపెల్, ఆస్ట్రేలియా మహిళల జట్టు మాజీ కెప్టెన్ బెలిండా క్లార్క్, డేవిడ్ గోవర్, కిమ్ హ్యూస్, నాజర్ హుస్సేన్, క్లైవ్ లాయిడ్, స్టీవ్ వా, జాన్ రైట్ లు సంతకాలు చేశారు. తీవ్ర ఆందోళనతోనే ఈ విజ్ఞప్తి చేస్తున్నట్లు వారు పేర్కొన్నారు.
షెహబాజ్ షరీఫ్ నేతృత్వంలోని పాకిస్తాన్ ప్రభుత్వానికి పంపిన లేఖలో ఇమ్రాన్ ఖాన్ క్రికెట్ ప్రస్థానాన్ని వారు గుర్తు చేశారు. పాకిస్తాన్ క్రికెట్ జట్టు సభ్యుడిగా, కెప్టెన్గా ఆయన చేసిన సేవలను ప్రస్తావించారు. 1992 ప్రపంచ కప్ విజేతగా పాకిస్తాన్ జట్టును నిలబెట్టడంలో ఇమ్రాన్ ఖాన్ కీలక పాత్ర పోషించారని తెలిపారు. తమలో చాలామంది ఆయనతో మైదానంలో పోటీ పడ్డామని, క్రికెట్ ప్రపంచంలో అత్యుత్తమ ఆల్ రౌండర్లు మరియు కెప్టెన్లలో ఒకరిగా ఆయనకు ప్రత్యేక స్థానం ఉందని చెప్పారు.
గత రెండున్నరేళ్లుగా జైలులో ఉన్న ఇమ్రాన్ ఖాన్ ఆరోగ్య పరిస్థితిపై వెలువడుతున్న నివేదికలు తమను కలవరపెడుతున్నాయని పేర్కొన్నారు. అంతర్జాతీయ ప్రమాణాలకు అనుగుణంగా జైలులో పరిస్థితులు కల్పించాలని, నిరంతర వైద్య సాయం అందించాలని పాకిస్తాన్ ప్రభుత్వాన్ని కోరారు. అలాగే ఆయన కుటుంబ సభ్యులు క్రమం తప్పకుండా కలిసేందుకు అనుమతి ఇవ్వాలని విజ్ఞప్తి చేశారు.
ఇదిలా ఉండగా, ఇమ్రాన్ ఖాన్ స్థాపించిన పాకిస్తాన్ తెహ్రీక్ ఎ ఇన్సాఫ్ పార్టీ గత వారం విడుదల చేసిన ప్రకటనలో ఆయన ఆరోగ్య పరిస్థితిపై తీవ్ర ఆందోళన వ్యక్తం చేసింది. వివిధ కేసుల్లో శిక్ష అనుభవిస్తున్న ఇమ్రాన్ ఖాన్ ఎనిమిది వందల రోజులకు పైగా జైలులో ఉన్నారు.
మరిన్నివార్తలుచదవండి: 2026–27 బిగ్ బ్యాష్ లీగ్ తొలి మ్యాచ్ భారత్లో జరిగే అవకాశం