Desert Vipers Win ILT20 2025-26 Title, Beat MI Emirates in Final

ఇంటర్నేషనల్ లీగ్ టీ20 (ILT20) 2025-26 ఎడిషన్‌లో డెజర్ట్ వైపర్స్ చాంపియన్‌గా నిలిచింది. దుబాయ్ ఇంటర్నేషనల్ స్టేడియం వేదికగా ఆదివారం రాత్రి జరిగిన ఫైనల్ మ్యాచ్‌లో MI ఎమిరేట్స్‌పై 46 పరుగుల తేడాతో ఘన విజయం సాధించి తమ తొలి DP వరల్డ్ ILT20 టైటిల్‌ను సొంతం చేసుకుంది.

ఈ విజయంతో డెజర్ట్ వైపర్స్ జట్టు 7 లక్షల యూఎస్ డాలర్ల నగదు బహుమతితో పాటు ప్రతిష్టాత్మకమైన బ్లాక్ బెల్ట్‌ను అందుకుంది. రన్నరప్‌గా నిలిచిన MI ఎమిరేట్స్‌కు 3 లక్షల యూఎస్ డాలర్ల నగదు బహుమతి లభించింది.

కర్రన్ వన్ మ్యాన్ షో

ఫైనల్ మ్యాచ్‌లో ముందుగా బ్యాటింగ్ చేసిన డెజర్ట్ వైపర్స్ జట్టు, కెప్టెన్ సామ్ కర్రన్ అజేయ అర్ధశతకం ఆధారంగా భారీ స్కోర్ నమోదు చేసింది. కర్రన్ 51 బంతుల్లో 8 ఫోర్లు, 2 సిక్సర్లతో 74 పరుగులు చేసి జట్టును ముందుండి నడిపించాడు. నిర్ణీత 20 ఓవర్లలో వైపర్స్ 4 వికెట్ల నష్టానికి 182 పరుగులు చేసింది.

మ్యాక్స్ హోల్డన్ 41 పరుగులతో కీలకంగా రాణించగా, డాన్ లారెన్స్ 23, ఫకర్ జమాన్ 20, జేసన్ రాయ్ 11 పరుగులు చేశారు. MI ఎమిరేట్స్ బౌలర్లలో ఫజల్ హక్ ఫారూకీ రెండు వికెట్లు పడగొట్టగా, అరబ్ గుల్ ఒక వికెట్ సాధించాడు.

MI ఎమిరేట్స్ పతనం

183 పరుగుల లక్ష్య ఛేదనలో MI ఎమిరేట్స్ జట్టు ప్రారంభం నుంచే తడబడింది. డెజర్ట్ వైపర్స్ బౌలర్లు క్రమశిక్షణతో బౌలింగ్ చేయడంతో 18.3 ఓవర్లలో 136 పరుగులకే ఆ జట్టు ఆలౌటైంది.

నసీమ్ షా (4-0-18-3), డేవిడ్ పేన్ (4-0-42-3), ఖుజామియా తన్వీర్ (3.3-0-22-2), ఉస్మాన్ తారిక్ (4-0-20-2) ప్రత్యర్థి బ్యాటింగ్‌ను పూర్తిగా కట్టడి చేశారు.

MI ఇన్నింగ్స్‌లో షకీబ్ అల్ హసన్ 36 పరుగులతో టాప్ స్కోరర్‌గా నిలువగా, కెప్టెన్ కీరన్ పోలార్డ్ 28, ముహమ్మద్ వసీం 26, తేజిందర్ డిల్లాన్ 12, ఆండ్రీ ఫ్లెచర్ 10 పరుగులు చేశారు.

అవార్డులతో సామ్ కర్రన్ ఆధిపత్యం

టోర్నీ మొత్తం అద్భుతమైన ఆల్‌రౌండ్ ప్రదర్శనతో మెరిసిన సామ్ కర్రన్ (97 పరుగులు, 7 వికెట్లు, 10 క్యాచ్‌లు) రెడ్ బెల్ట్ (MVP)తో పాటు గ్రీన్ బెల్ట్ (Best Batter)ను గెలుచుకున్నాడు.

వైట్ బెల్ట్ (Best Bowler)ను 18 వికెట్లతో వకార్ సలాంఖిల్ (Dubai Capitals) అందుకోగా, బ్లూ బెల్ట్ (Best UAE Player)ను MI ఎమిరేట్స్ ఆటగాడు ముహమ్మద్ వసీం (370 పరుగులు) సొంతం చేసుకున్నాడు.

మరిన్నివార్తలుచదవండి: టీ20 వరల్డ్ కప్ 2026లో భారత్‌లో ఆడబోమన్న బంగ్లాదేశ్, ఐసీసీకి లేఖ