Faf du Plessis ruled out of SA20 2025-26 season due to injury

సౌతాఫ్రికా టీ20 లీగ్ 2025–26 సీజన్‌లో జోబర్గ్ సూపర్ కింగ్స్‌కు పెద్ద ఎదురుదెబ్బ తగిలింది. జట్టు కెప్టెన్ ఫాఫ్ డుప్లెసిస్ గాయంతో మిగిలిన సీజన్ మొత్తానికి దూరమయ్యాడు. జనవరి 10న ఎంఐ కేప్‌టౌన్‌తో జరిగిన మ్యాచ్‌లో ఫీల్డింగ్ చేస్తుండగా అతడికి కుడి చేతి బొటనవేలికి తీవ్ర గాయం అయింది.

గాయం కారణంగా ఆ మ్యాచ్‌లో డుప్లెసిస్ బ్యాటింగ్‌కు కూడా రాలేకపోయాడు. అనంతరం అతడిని ఆసుపత్రికి తరలించి స్కాన్ చేయించగా, బొటనవేలి లిగమెంట్ తెగిపోయినట్లు వైద్యులు నిర్ధారించారు. ఈ నేపథ్యంలో ఫాఫ్ త్వరలోనే శస్త్రచికిత్స చేయించుకోనున్నాడు.

ఈ విషయంపై జోబర్గ్ సూపర్ కింగ్స్ హెడ్ కోచ్ స్టీఫెన్ ఫ్లెమింగ్ స్పందిస్తూ, ప్రస్తుతం ఫాఫ్ బ్యాట్ కూడా పట్టుకోలేని స్థితిలో ఉన్నాడని, అందుకే టోర్నీ నుంచి తప్పుకోవాల్సి వచ్చిందని వెల్లడించాడు. 41 ఏళ్ల డుప్లెసిస్ ఈ సీజన్‌లో ఇప్పటివరకు ఐదు మ్యాచ్‌లు ఆడి 135 పరుగులు చేశాడు. అతడి స్ట్రైక్ రేట్ 151.69గా నమోదైంది.

ఫాఫ్ త్వరగా కోలుకోవాలని ఆకాంక్షిస్తూ జోబర్గ్ సూపర్ కింగ్స్ ఫ్రాంచైజీ ఎక్స్ (ట్విట్టర్) వేదికగా సందేశం విడుదల చేసింది. ప్రస్తుతం జోబర్గ్ సూపర్ కింగ్స్ పాయింట్ల పట్టికలో మూడో స్థానంలో కొనసాగుతోంది. మిగిలిన మ్యాచ్‌లకు జేమ్స్ విన్స్ జట్టుకు నాయకత్వం వహించే అవకాశాలు ఉన్నట్లు సమాచారం.

జోబర్గ్ సూపర్ కింగ్స్ జట్టులో జేమ్స్ విన్స్, మాథ్యూ డి విలియర్స్, వియాన్ ముల్డర్, మైఖేల్-కైల్ పెప్పర్ (వికెట్‌కీపర్), డోనవన్ ఫెరీరా, ప్రెనెలన్ సుబ్రాయన్, డయాన్ ఫారెస్టర్, అకీల్ హోసేన్, నాండ్రే బర్గర్, డేనియల్ వోరల్, శుభమ్ రంజనే, రిచర్డ్ గ్లీసన్, జారెన్ బాచర్, నీల్ టిమ్మర్స్, జాంకో స్మిత్, స్టీవ్ స్టోల్క్, దువాన్ జాన్సెన్, రివాల్డో మూన్సామి వంటి ఆటగాళ్లు ఉన్నారు.

మరిన్ని వార్తలు చదవండి: IPL 2026: చిన్నస్వామి స్టేడియానికి గుడ్‌బై? రెండు కొత్త హోమ్ గ్రౌండ్లలో RCB మ్యాచ్‌లు