Gautam Gambhir on Virat Kohli and Rohit Sharma: Big Statement on Their Future Ahead of 2027 ODI World Cup

టీమ్ ఇండియా ఆస్ట్రేలియా పర్యటనలో వన్డే సిరీస్‌లో పొందిన ఓటమికి గట్టి సమాధానం చెప్పింది. సౌతాఫ్రికా జట్టుతో విశాఖపట్నంలో జరిగిన మూడవ వన్డేలో భారత్ 9 వికెట్ల తేడాతో విజయం సాధించి, సిరీస్‌ను 2-1తో కైవసం చేసుకుంది. ఈ గెలుపులో విరాట్ కోహ్లీ మరియు రోహిత్ శర్మ మరోసారి తమ అద్భుత ప్రతిభను ప్రదర్శించి జట్టుకు కీలకంగా నిలిచారు.

ఈ ఇద్దరు స్టార్ బ్యాట్స్‌మెన్ ప్రదర్శనపై భారత జట్టు హెడ్ కోచ్ గౌతమ్ గంభీర్ ఆసక్తికర వ్యాఖ్యలు చేశారు. గత రెండు నెలలుగా కోహ్లీ, రోహిత్ వన్డే భవిష్యత్తు గురించి క్రికెట్ వర్గాల్లో అనేక చర్చలు చోటుచేసుకున్నాయి. 2027 వన్డే వరల్డ్ కప్ దృష్ట్యా ఈ ఇద్దరిని పక్కన పెట్టవచ్చన్న వార్తలు కూడా బయటకు వచ్చాయి. కానీ వరుసగా రెండు సిరీస్‌ల్లోనే ఈ ఇద్దరు దిగ్గజాలు అసాధారణ ప్రదర్శనతో తమపై వచ్చిన అనుమానాలన్నింటినీ చెరిపేశారు.

రోహిత్ మరియు విరాట్ చేసిన స్థిరమైన బ్యాటింగ్, జట్టులో వీరి ప్రాముఖ్యతను మరింత బలంగా చాటిచెప్పింది. ఇలాంటి పరిస్థితుల్లో వీరిని జట్టులోంచి తప్పించడం అసాధ్యమనే అభిప్రాయం బలపడింది.

మ్యాచ్ తర్వాత జరిగిన ప్రెస్ కాన్ఫరెన్స్‌లో గౌతమ్ గంభీర్ కూడా ఇదే భావన వ్యక్తం చేశారు. “వారు చాలా కాలంగా భారత జట్టుకు ఇలాంటి ప్రదర్శననే ఇస్తున్నారు. రాబోయే రోజుల్లో కూడా వైట్-బాల్ క్రికెట్‌లో మరింత మెరుగ్గా ఆడుతారని నమ్ముతున్నాను” అని ఆయన అన్నారు.

దాదాపు తొమ్మిది నెలల పాటు అంతర్జాతీయ క్రికెట్‌కు దూరంగా ఉన్న విరాట్ కోహ్లీ, రోహిత్ శర్మ ఆస్ట్రేలియా సిరీస్‌తో తిరిగి మైదానంలోకి వచ్చారు. ఆస్ట్రేలియా సిరీస్‌లో రోహిత్ శర్మ 203 పరుగులు చేసి ప్లేయర్ ఆఫ్ ది సిరీస్ అవార్డు గెలుచుకోగా, విరాట్ చివరి మ్యాచ్‌లో హాఫ్ సెంచరీతో రాణించాడు.

సౌతాఫ్రికా సిరీస్‌లో కోహ్లీ 302 పరుగులతో ప్లేయర్ ఆఫ్ ది సిరీస్ అవార్డు తన ఖాతాలో వేసుకోగా, రోహిత్ రెండు హాఫ్ సెంచరీలు సాధించి జట్టు విజయంలో కీలక పాత్ర పోషించాడు.

మరిన్ని వార్తలు చదవండి: యశస్వీ జైశ్వాల్ అరుదైన ఘనత: మూడు ఫార్మాట్లలో సెంచరీ చేసిన 7వ భారత ఆటగాడు