Hardik Pandya returns to domestic cricket to play Vijay Hazare Trophy
టీమిండియా సీమ్ బౌలింగ్ ఆల్రౌండర్ హార్దిక్ పాండ్యా కీలక నిర్ణయం తీసుకున్నాడు. భారత క్రికెట్ నియంత్రణ మండలి సూచనల మేరకు మరోసారి దేశవాళీ క్రికెట్లో ఆడేందుకు సిద్ధమయ్యాడు. ఆసియా టీ20 కప్ 2025 సందర్భంగా గాయపడిన హార్దిక్, సయ్యద్ ముస్తాక్ అలీ ట్రోఫీ ద్వారా మళ్లీ పోటీ క్రికెట్లోకి అడుగుపెట్టాడు.
సొంత జట్టు బరోడా తరఫున దేశవాళీ టీ20 మ్యాచ్లు ఆడిన హార్దిక్ పాండ్యా, తాజాగా విజయ్ హజారే ట్రోఫీ 2025–26లో కూడా పాల్గొననున్నాడు. జనవరి 3 మరియు 8 తేదీల్లో బరోడా జట్టు విదర్భ, చండీగఢ్ జట్లతో తలపడనుంది. ఈ రెండు మ్యాచ్లలో హార్దిక్ పాండ్యా బరిలోకి దిగనున్నట్లు అతడి సన్నిహిత వర్గాలు వెల్లడించాయి.
అయితే, జనవరి 6న బరోడా జట్టు జమ్మూ కశ్మీర్తో ఆడే మ్యాచ్కు మాత్రం హార్దిక్ దూరంగా ఉండనున్నాడు. టీ20 ప్రపంచకప్ 2026 సన్నాహకాల దృష్ట్యా అతడు మధ్యలో విశ్రాంతి తీసుకుని, ఎంపిక చేసిన మ్యాచ్ల్లో మాత్రమే ఆడనున్నాడు.
భారత్ జట్టు తదుపరి స్వదేశంలో న్యూజిలాండ్తో వన్డే సిరీస్ ఆడనుంది. ఈ సిరీస్కు హార్దిక్ పాండ్యాకు విశ్రాంతి ఇవ్వాలని టీమ్ మేనేజ్మెంట్ భావిస్తున్నట్లు సమాచారం. రాబోయే ఐదు టీ20లు మరియు ప్రపంచకప్ను దృష్టిలో ఉంచుకుని ఈ నిర్ణయం తీసుకున్నట్లు తెలుస్తోంది.
అయినప్పటికీ మ్యాచ్ ఫిట్నెస్ కొనసాగించేందుకు హార్దిక్ బరోడా తరఫున ఆడాలని ఆసక్తి చూపుతున్నాడు. చాంపియన్స్ ట్రోఫీ 2025 సందర్భంగా ఈ ఏడాది మార్చిలో అతడు చివరిసారిగా వన్డే మ్యాచ్ ఆడాడు.
ఇదిలా ఉండగా, బీసీసీఐ ఆదేశాల మేరకు భారత బ్యాటింగ్ దిగ్గజాలు రోహిత్ శర్మ, విరాట్ కోహ్లి ఇప్పటికే తమ తమ జట్లు ముంబై, ఢిల్లీ తరఫున రెండేసి విజయ్ హజారే ట్రోఫీ మ్యాచ్లు ఆడారు. యువ ఆటగాడు రిషభ్ పంత్ ఢిల్లీ కెప్టెన్గా, నితీశ్ కుమార్ రెడ్డి ఆంధ్ర జట్టు సారథిగా ఈ టోర్నీలో పాల్గొంటున్నారు. అభిషేక్ శర్మ పంజాబ్ తరఫున బరిలోకి దిగగా, శుబ్మన్ గిల్ మరియు అర్ష్దీప్ సింగ్ కూడా తదుపరి మ్యాచ్లలో పంజాబ్ జట్టుకు ప్రాతినిధ్యం వహించనున్నారు. సంజూ శాంసన్ కేరళ తరఫున, రవీంద్ర జడేజా సౌరాష్ట్ర తరఫున ఆడనున్నారు.
మరిన్నివార్తలుచదవండి: విజయ్ హజారే ట్రోఫీ: 7 వికెట్లతో సంచలనం సృష్టించిన CSK బౌలర్ రామకృష్ణ ఘోష్