Harry Brook in Nightclub Controversy: ECB Fines England Captain £30,000
ఇంగ్లండ్ వైట్బాల్ కెప్టెన్ హ్యారీ బ్రూక్ తాజాగా ఓ వివాదంలో చిక్కుకున్నాడు. యాషెస్ సిరీస్కు ముందు పరిమిత ఓవర్ల సిరీస్ల కోసం ఇంగ్లండ్ జట్టు న్యూజిలాండ్ పర్యటనకు వెళ్లిన విషయం తెలిసిందే. ఈ టూర్లో భాగంగా నవంబర్ 1న వెల్లింగ్టన్ వేదికగా జరిగిన మూడో వన్డేకు ముందు ఈ ఘటన చోటుచేసుకుంది.
మ్యాచ్కు ముందురోజు రాత్రి ఓ నైట్క్లబ్లోకి వెళ్లేందుకు హ్యారీ బ్రూక్ ప్రయత్నించాడు. అయితే అతడు మద్యం సేవించి ఉన్నాడనే అనుమానంతో అక్కడ విధుల్లో ఉన్న బౌన్సర్ అతడిని అడ్డుకున్నాడు.
దీనిపై బ్రూక్ తీవ్ర అసహనం వ్యక్తం చేస్తూ బౌన్సర్తో వాగ్వాదానికి దిగాడు. ఈ గొడవ కాస్త ఎక్కువగా ముదిరి, చివరకు బౌన్సర్ బ్రూక్పై చేయి చేసుకున్నట్లు సమాచారం. అయితే ఈ ఘటన అప్పట్లో బయటకు రాకుండా రెండు నెలల తర్వాత మాత్రమే వెలుగులోకి వచ్చింది.
ఈ వ్యవహారంపై హ్యారీ బ్రూక్ స్పందిస్తూ బహిరంగంగా క్షమాపణలు తెలిపాడు. యాషెస్ సిరీస్ ఐదో టెస్టు ముగిసిన అనంతరం నిర్వహించిన ప్రీ మ్యాచ్ కాన్ఫరెన్స్లో అతడు తన తప్పును అంగీకరించాడు. “ఆ రోజు నేను హద్దులు దాటి ప్రవర్తించాను. నా ప్రవర్తనకు పూర్తిగా బాధ్యత వహిస్తున్నాను. నా చర్యల వల్ల నా జట్టుకూ, నా దేశానికీ తలవంపులు వచ్చాయి. అందుకు నేను ఎంతో బాధపడుతున్నాను” అని బ్రూక్ పేర్కొన్నాడు.
అంతేకాదు, “ఇంగ్లండ్ క్రికెట్కు అత్యున్నత స్థాయిలో ప్రాతినిధ్యం వహించడం నాకు దక్కిన గొప్ప గౌరవం. ఇకపై మైదానంలోనూ, మైదానం బయట కూడా ఇలాంటి తప్పులు పునరావృతం కాకుండా జాగ్రత్త పడతాను. మరోసారి అందరికీ హృదయపూర్వక క్షమాపణలు కోరుతున్నాను” అంటూ తన మాటలను ముగించాడు.
ఈ ఘటనను ఇంగ్లండ్ క్రికెట్ బోర్డు (ECB) చాలా సీరియస్గా తీసుకుంది. క్రమశిక్షణ ఉల్లంఘనకు గాను హ్యారీ బ్రూక్పై 30,000 పౌండ్ల జరిమానా విధించింది. భారత కరెన్సీలో ఇది దాదాపు 33 లక్షల రూపాయలకు సమానం. అంతేకాదు, ఇదే చివరి హెచ్చరిక అని కూడా ఈసీబీ స్పష్టంగా తెలియజేసింది.
ఇదిలా ఉండగా, యాషెస్ సిరీస్ 2025-26లో ఇంగ్లండ్ జట్టు తీవ్ర నిరాశ కలిగించే ప్రదర్శన చేసింది. ఐదు టెస్టుల సిరీస్ను 4-1 తేడాతో ఇంగ్లండ్ కోల్పోయింది. ఈ ఘోర పరాభవానికి ఆటగాళ్లలో కనిపించిన క్రమశిక్షణా రాహిత్యమే ప్రధాన కారణమని ఇంగ్లండ్ మాజీ క్రికెటర్లు విమర్శలు గుప్పిస్తున్నారు. సిరీస్ మధ్యలో ఇంగ్లండ్ జట్టు చేసిన ‘నూసా’ (Noosa) ట్రిప్ కూడా తీవ్ర విమర్శలకు దారితీసింది.
మరిన్ని వార్తలు చదవండి: రుతురాజ్ గైక్వాడ్ సెంచరీ: విజయ్ హజారేలో చరిత్ర సృష్టించిన మహారాష్ట్ర కెప్టెన్