ICC Fines Fakhar Zaman After On-Field Dispute in Tri-Series Final

పాకిస్తాన్ ఓపెనర్ ఫఖర్ జమాన్‌కు మ్యాచ్ ఫీలో 10 శాతం జరిమానా పడింది. శ్రీలంకతో జరిగిన ట్రై-సిరీస్ ఫైనల్‌లో అంపైర్ నిర్ణయానికి అసంతృప్తి చూపినందుకు ఐసీసీ ఈ శిక్ష విధించింది. అంపైర్ చెప్పిన మాటకు తలూపడం ఐసీసీ కోడ్ ఆఫ్ కండక్ట్ ఆర్టికల్ 2.8ని ఉల్లంఘించినట్టు కావడంతో ఈ చర్య తీసుకున్నారు.

సంఘటన ఇదీ: శ్రీలంక ఇన్నింగ్స్ 19వ ఓవర్‌లో ఫఖర్ అద్భుతమైన డైవ్ చేసి లో క్యాచ్ పట్టినట్టు అనిపించింది. పాక్ ఆటగాళ్లంతా సంబరంలో మునిగిపోయారు. కానీ ఆన్-ఫీల్డ్ అంపైర్లు థర్డ్ అంపైర్‌కి పంపారు. ఎన్ని రీప్లేలు చూసినా బంతి ముందు నేల ముట్టిందని తేలింది. బ్యాటర్ నాటౌట్!

ఇక ఫఖర్ ఆగలేదు. తల ఊపుతూ, చేతులు ఊపుతూ, అంపైర్లతో గొడవ పడ్డాడు. ఎంత చెప్పినా వినకుండా చాలాసేపు వాదన కొనసాగించాడు. చివరకు మ్యాచ్ అధికారులు ఈ ప్రవర్తనను నోట్ చేసుకున్నారు.

ట్రై-సిరీస్ ఫైనల్: పాకిస్తాన్ 6 వికెట్లతో విజయం

మ్యాచ్ అయిపోయాక ఆన్-ఫీల్డ్ అంపైర్లు అహ్సాన్ రజా, ఆసిఫ్ యాకూబ్, థర్డ్ అంపైర్ రషీద్ రియాజ్, ఫోర్త్ అంపైర్ ఫైసల్ ఆఫ్రిదీలు ఫఖర్ ప్రవర్తనను మ్యాచ్ రెఫరీ రియాన్ కింగ్‌కి రిపోర్ట్ చేశారు. వీడియో చూసిన రెఫరీ, “ఇది హద్దు మీరిన ప్రవర్తన” అని తేల్చి 10 శాతం జరిమానా వేశారు.

ఫఖర్ మాత్రం తప్పు ఒప్పుకుని జరిమానా చెల్లించేశాడు – హియరింగ్ అవసరం లేకుండానే కేసు ముగిసింది. అయినా అతని డిసిప్లినరీ రికార్డులో ఒక డీమెరిట్ పాయింట్ జత అయింది. గత 24 నెలల్లో ఇదే మొదటి పాయింట్.

లెవెల్-1 తప్పిదాలకు హెచ్చరిక నుంచి 50 శాతం వరకు జరిమానా, 1-2 డీమెరిట్ పాయింట్లు వేయొచ్చని ఐసీసీ నిబంధనలు చెబుతున్నాయి. ఈ గందరగోళం అంతా జరిగినా పాకిస్తాన్ మ్యాచ్ మాత్రం సునాయాసంగా గెలిచేసింది – 6 వికెట్ల తేడాతో ట్రై-సిరీస్ ట్రోఫీని సొంతం చేసుకుంది. సాఫ్ట్ సిగ్నల్, అంపైర్ నిర్ణయాలపై అభిమానుల్లో చర్చ జోరుగా సాగినా... ఫఖర్ శిక్ష ఒప్పుకోవడంతో ఈ వివాదం అధికారికంగా ముగిసిపోయింది.