Indian Cricket in 2025: 10 Legendary Cricketers Who Announced Retirement

2025 సంవత్సరం భారత క్రికెట్ అభిమానులకు భావోద్వేగాల పుటను తెరిచింది. దశాబ్దకాలంగా మైదానాలను ఊపేసిన, కోట్లాది అభిమానుల గుండెల్లో చిరస్థాయిగా నిలిచిన స్టార్ క్రికెటర్లు ఒక్కొక్కరుగా ఆటకు వీడ్కోలు పలకడంతో భారత క్రికెట్ గడ్డపై ఓ గొప్ప శకం ముగిసింది. ఆ 10 మంది దిగ్గజాల రిటైర్మెంట్ ప్రయాణంపై ఓసారి లుక్కేద్దాం.

1. విరాట్ కోహ్లీ

క్రికెట్ చరిత్రలో అత్యంత ప్రభావవంతమైన ఆటగాళ్లలో ఒకరైన విరాట్ కోహ్లీ, 2025 మే 12న టెస్ట్ క్రికెట్‌కు గుడ్‌బై చెప్పారు. ఆధునిక క్రికెట్‌లో టెస్ట్ ఫార్మాట్‌కు బ్రాండ్ అంబాసిడర్‌లా నిలిచిన కోహ్లీ, ఫిట్‌నెస్ పరంగా ఇప్పటికీ యువ ఆటగాళ్లకు సవాల్ విసిరే స్థాయిలో ఉన్నప్పటికీ, యువతకు అవకాశం ఇవ్వాలనే ఉద్దేశంతో వైట్ జెర్సీని పక్కన పెట్టారు. ఇకపై ఆయన వన్డే ఫార్మాట్‌లో మాత్రమే పరుగుల వేట కొనసాగించనున్నారు.

2. రోహిత్ శర్మ

భారత కెప్టెన్ రోహిత్ శర్మ 2025 మే 7న టెస్ట్ క్రికెట్ నుంచి నిష్క్రమించారు. ఓపెనర్‌గా టెస్టుల్లో కొత్త ఒరవడిని సృష్టించిన రోహిత్, కెప్టెన్‌గా భారత్‌ను వరల్డ్ టెస్ట్ ఛాంపియన్‌షిప్ ఫైనల్‌కు చేర్చడంలో కీలక పాత్ర పోషించారు. టెస్టుల్లోనూ తన దూకుడైన బ్యాటింగ్‌తో సిక్సర్ల వర్షం కురిపించిన రోహిత్, ఇకపై తన దృష్టిని 2027 వన్డే వరల్డ్ కప్‌పై కేంద్రీకరించారు.

3. చతేశ్వర్ పుజారా

టీమిండియాకు నమ్మకమైన బ్యాటర్‌గా, రెండో రాహుల్ ద్రవిడ్‌గా గుర్తింపు తెచ్చుకున్న చతేశ్వర్ పుజారా, ఆగస్టు 24న అన్ని ఫార్మాట్ల నుంచి రిటైర్మెంట్ ప్రకటించారు. ఆస్ట్రేలియా గడ్డపై శరీరాన్ని గాయాలకు తూటాల్లాంటి బంతులకు ఎదురొడ్డి నిలబడి భారత్‌కు చారిత్రాత్మక విజయాలు అందించిన ఘనత పుజారాదే. ఓపికకు ప్రతీకగా నిలిచిన ఈ ఆధునిక వాల్ రిటైర్మెంట్ టెస్ట్ క్రికెట్ అభిమానులను తీవ్రంగా కలచివేసింది.

4. అమిత్ మిశ్రా

అంతర్జాతీయ క్రికెట్, ఐపీఎల్‌లో తన గూగ్లీలతో మేటి బ్యాటర్లను సైతం గందరగోళానికి గురిచేసిన అమిత్ మిశ్రా, సెప్టెంబర్ 4న క్రికెట్‌కు వీడ్కోలు పలికారు. 25 ఏళ్లపాటు సాగిన ఆయన సుదీర్ఘ క్రికెట్ ప్రయాణం ఎంతో స్ఫూర్తిదాయకం. ప్రస్తుతం ఆయన కామెంటేటర్‌గా కొత్త ఇన్నింగ్స్ ప్రారంభించి అభిమానులకు మరింత చేరువవుతున్నారు.

5. వృద్ధిమాన్ సాహా

భారత క్రికెట్‌కు చెందిన అత్యుత్తమ వికెట్‌కీపర్లలో ఒకరైన వృద్ధిమాన్ సాహా, ఫిబ్రవరి 1న రిటైర్మెంట్ ప్రకటించారు. వికెట్ల వెనుక మెరుపువేగంతో కదిలే సాహా, స్టంపింగ్స్‌లో ప్రత్యేక నైపుణ్యం కలవాడు. టెస్టుల్లో ధోనీ తర్వాత వచ్చిన లోటును భర్తీ చేసిన సాహా, తన చివరి రంజీ మ్యాచ్ అనంతరం భావోద్వేగంగా మైదానాన్ని వీడారు.

6. పీయూష్ చావ్లా

2007 టీ20 ప్రపంచకప్, 2011 వన్డే ప్రపంచకప్ విజేత జట్లలో భాగమైన పీయూష్ చావ్లా, జూన్ నెలలో క్రికెట్‌కు గుడ్‌బై చెప్పారు. చాలా చిన్న వయసులోనే అంతర్జాతీయ జట్టులోకి అడుగుపెట్టిన చావ్లా, తన లెగ్ స్పిన్‌తో టీమిండియాకు, అలాగే ఐపీఎల్‌లో కోల్‌కతా మరియు ముంబై జట్లకు ఎన్నో విజయాలు అందించారు.

7. ఇషాంత్ శర్మ

300కు పైగా టెస్ట్ వికెట్లు తీసిన టీమిండియా పొడగరి పేసర్ ఇషాంత్ శర్మ, డిసెంబర్ నెలలో టీ20 ఫార్మాట్‌కు వీడ్కోలు పలికారు. 2008 ఆస్ట్రేలియా పర్యటనలో రికీ పాంటింగ్‌ను ఇబ్బంది పెట్టిన ఆయన స్పెల్ ఇప్పటికీ అభిమానుల కళ్లముందు నిలిచే దృశ్యమే. టెస్టుల్లో భారత పేస్ దళానికి ఎన్నో ఏళ్ల పాటు ఆయన నాయకత్వం వహించారు.

8. మోహిత్ శర్మ

2015 వన్డే ప్రపంచకప్‌లో భారత్ తరపున మెరిసిన మోహిత్ శర్మ, డిసెంబర్ 3న అంతర్జాతీయ క్రికెట్‌కు రిటైర్మెంట్ ప్రకటించారు. స్లోయర్ బంతులతో బ్యాటర్లను మోసగించడంలో దిట్ట అయిన మోహిత్, ఐపీఎల్‌లో గుజరాత్ టైటాన్స్ తరపున అద్భుత ప్రదర్శన చేసిన తర్వాత ఆటకు స్వస్తి పలకడం విశేషం.

9. వరుణ్ ఆరోన్

భారత గడ్డపై 150 కిలోమీటర్ల వేగంతో బౌలింగ్ చేయగలనని నిరూపించిన వరుణ్ ఆరోన్, జనవరిలో అన్ని ఫార్మాట్ల నుంచి తప్పుకున్నారు. గాయాల కారణంగా ఆయన కెరీర్ ఆశించిన స్థాయిలో సాగకపోయినా, భారత్ నుంచి వచ్చిన అత్యంత వేగవంతమైన బౌలర్లలో ఒకరిగా ఆయనకు ప్రత్యేక గుర్తింపు ఉంది.

10. రిషి ధావన్

దేశవాళీ క్రికెట్‌లో రారాజులా వెలిగిన హిమాచల్ ప్రదేశ్ ఆల్‌రౌండర్ రిషి ధావన్, జనవరి 5న క్రికెట్‌కు వీడ్కోలు పలికారు. బ్యాట్‌తోనూ, బంతితోనూ జట్టుకు సేవలందించిన రిషి, టీమిండియా తరపున పరిమిత అవకాశాలు మాత్రమే పొందినప్పటికీ, దేశవాళీ క్రికెట్‌లో మాత్రం ఓ లెజెండ్‌గా నిలిచిపోయారు.

మరిన్ని వార్తలు చదవండి: భద్రత కోసమే బుల్లెట్ ప్రూఫ్ కారు: రషీద్ ఖాన్ సంచలన వ్యాఖ్యలు