IPL 2026 Captains List After Mini Auction Full Details
IPL 2026 Captains List: ఇండియన్ ప్రీమియర్ లీగ్ 2026 మినీ వేలం విజయవంతంగా ముగిసింది. అబుదాబిలోని ఎతిహాద్ అరేనాలో నిర్వహించిన ఈ వేలంలో మొత్తం 369 మంది ఆటగాళ్లు తమ పేర్లు నమోదు చేయగా, అందులో 77 మంది ఆటగాళ్లు వివిధ జట్ల చేతిలో అమ్ముడుపోయారు.
డిసెంబర్ 16న జరిగిన ఈ వేలంలో ఆస్ట్రేలియా స్టార్ ఆల్రౌండర్ కామెరాన్ గ్రీన్ అత్యంత ఖరీదైన ఆటగాడిగా నిలిచాడు. అతడిని కోల్కతా నైట్రైడర్స్ రూ.25.20 కోట్ల భారీ ధరకు సొంతం చేసుకుంది. అదే విధంగా మతీశ పతిరానాను కూడా కేకేఆర్ రూ.18 కోట్లకు కొనుగోలు చేసింది. ఈ ఇద్దరూ ఐపీఎల్ 2026 మినీ వేలంలో అత్యధిక ధర పలికిన ఆటగాళ్లుగా నిలిచారు.
వేలం పూర్తయిన తర్వాత అన్ని జట్లకు సంబంధించిన కెప్టెన్ల వివరాలు కూడా స్పష్టతకు వచ్చాయి. ఇప్పుడు ఒక్కో జట్టు కెప్టెన్ ఎవరో ఒకసారి చూద్దాం.
చెన్నై సూపర్ కింగ్స్ కెప్టెన్గా రుతురాజ్ గైక్వాడ్
ఐపీఎల్ 2026లో చెన్నై సూపర్ కింగ్స్కు రుతురాజ్ గైక్వాడ్ కెప్టెన్గా కొనసాగనున్నాడు. సంజు శాంసన్ జట్టులోకి వచ్చినప్పటికీ, గైక్వాడ్ నాయకత్వంలో ఎల్లో ఆర్మీ చూపిన స్థిరమైన ప్రదర్శన కారణంగా అతనికే కెప్టెన్సీ బాధ్యతలు అప్పగించారు.
ముంబై ఇండియన్స్ కెప్టెన్ ఎవరు?
ఐపీఎల్ 2026లో ముంబై ఇండియన్స్కు హార్దిక్ పాండ్యానే కెప్టెన్గా కొనసాగనున్నాడు. గత సీజన్లో అతని నాయకత్వంలో ముంబై జట్టు అద్భుతమైన పునరాగమనం చేసింది. ఆరంభంలో తడబడినప్పటికీ రెండో క్వాలిఫయర్ వరకు చేరింది. అయితే, పంజాబ్ కింగ్స్ చేతిలో ఓటమితో టైటిల్ రేసు నుంచి తప్పుకుంది. ఈసారి కూడా ముంబై యాజమాన్యం హార్దిక్పైనే పూర్తి నమ్మకం ఉంచుతోంది.
పంజాబ్ కింగ్స్ కెప్టెన్గా శ్రేయాస్ అయ్యర్
ఐపీఎల్ 2025లో శ్రేయాస్ అయ్యర్ నాయకత్వంలో పంజాబ్ కింగ్స్ ఫైనల్ వరకు దూసుకెళ్లింది. అయితే, తుది పోరులో ఆర్సీబీ చేతిలో స్వల్ప తేడాతో ఓటమి పాలైంది. అయినప్పటికీ, దశాబ్దాల తర్వాత జట్టును ఫైనల్కు చేర్చిన కెప్టెన్గా అయ్యర్పై యాజమాన్యం పూర్తి నమ్మకం ఉంచింది. అందుకే 2026లో కూడా అతడే పంజాబ్కు సారథిగా కొనసాగనున్నాడు.
సన్రైజర్స్ హైదరాబాద్ కెప్టెన్గా పాట్ కమ్మిన్స్
హైదరాబాద్ జట్టు 2025 సీజన్ను నిరాశాజనకంగా ముగించింది. పాట్ కమ్మిన్స్ నాయకత్వంలో బ్యాటింగ్, బౌలింగ్ రెండింటిలోనూ జట్టు తడబడింది. అయినప్పటికీ, 2026 సీజన్లో కూడా సన్రైజర్స్ హైదరాబాద్కు కమ్మిన్సే కెప్టెన్గా కొనసాగనున్నట్లు తెలుస్తోంది.
లక్నో సూపర్ జెయింట్స్కు పంత్ నాయకత్వం
ఐపీఎల్ 2026 మినీ వేలంలో లక్నో సూపర్ జెయింట్స్ బలమైన జట్టును నిర్మించుకుంది. వికెట్కీపర్-బ్యాట్స్మన్ రిషబ్ పంత్ వచ్చే సీజన్లో కూడా జట్టుకు నాయకత్వం వహిస్తాడు. గత ఏడాది జట్టు ఆశించిన స్థాయిలో రాణించకపోయినా, ఈసారి టైటిల్ లక్ష్యంగా పంత్ ముందుకెళ్తున్నాడు.
రాయల్ ఛాలెంజర్స్ బెంగళూరు కెప్టెన్ ఫిక్స్
ఐపీఎల్ 2026లో రాయల్ ఛాలెంజర్స్ బెంగళూరు జట్టుకు రజత్ పాటిదార్ కెప్టెన్గా వ్యవహరిస్తాడు. 2025 సీజన్లో అతని సారథ్యంలోనే ఆర్సీబీ తమ తొలి ఐపీఎల్ టైటిల్ను గెలుచుకుంది. 18 ఏళ్ల నిరీక్షణకు ముగింపు పలికిన ఈ విజయంలో పాటిదార్ కెప్టెన్సీ కీలక పాత్ర పోషించింది. అందుకే మరోసారి అతనికే బాధ్యతలు అప్పగించారు.
గుజరాత్ టైటాన్స్ సారథిగా శుభ్మన్ గిల్
భారత వన్డే, టెస్ట్ జట్ల కెప్టెన్ శుభ్మన్ గిల్ ఐపీఎల్ 2026లో గుజరాత్ టైటాన్స్కు నాయకత్వం వహించనున్నాడు. అతని కెప్టెన్సీలో గుజరాత్ 2025 సీజన్లో ప్లేఆఫ్స్కు చేరినా, టైటిల్ను అందుకోలేకపోయింది. ఈసారి మాత్రం ట్రోఫీపై కన్నేసి బరిలోకి దిగనుంది.
కోల్కతా నైట్ రైడర్స్ సారథిగా అజింక్య రహానే
గత సీజన్లో అజింక్య రహానే నాయకత్వంలో కేకేఆర్ పెద్దగా రాణించలేకపోయింది. పాయింట్ల పట్టికలో ఎనిమిదో స్థానంతో సరిపెట్టుకుంది. అయినప్పటికీ, రహానే వ్యక్తిగతంగా చూపిన అద్భుతమైన బ్యాటింగ్ ఫామ్ అతడిని మరోసారి కెప్టెన్గా కొనసాగించేందుకు యాజమాన్యాన్ని ఆకర్షించిన ప్రధాన కారణంగా మారింది.
రాజస్థాన్ రాయల్స్కు కొత్త సారథి
రాజస్థాన్ రాయల్స్ 2026 సీజన్లో కొత్త కెప్టెన్తో బరిలోకి దిగనుంది. రెగ్యులర్ కెప్టెన్ సంజు శాంసన్ చెన్నై సూపర్ కింగ్స్కు మారడంతో, రియాన్ పరాగ్ను పూర్తి స్థాయి కెప్టెన్గా నియమించే ఆలోచనలో జట్టు ఉన్నట్లు తెలుస్తోంది. గత సీజన్లో సంజు గైర్హాజరైన సమయంలో పరాగ్ జట్టును నడిపిన అనుభవం ఉండటంతో, భవిష్యత్తులో అతడికే పూర్తి బాధ్యతలు అప్పగించే అవకాశం ఉంది.
ఢిల్లీ క్యాపిటల్స్కు కొత్త కెప్టెన్?
ఐపీఎల్ 2025లో ఢిల్లీ క్యాపిటల్స్కు అక్షర్ పటేల్, ఫాఫ్ డు ప్లెసిస్ సంయుక్తంగా కెప్టెన్లుగా ఉన్నారు. అయితే, ఈ సీజన్లో ఫాఫ్ జట్టులో లేకపోవడంతో కెప్టెన్సీపై సందిగ్ధత నెలకొంది. తాజా నివేదికల ప్రకారం, కేఎల్ రాహుల్ను ఢిల్లీ క్యాపిటల్స్ కొత్త కెప్టెన్గా నియమించే అవకాశాలు కనిపిస్తున్నాయి.
మరిన్ని వార్తలు చదవండి: IPL 2026: మినీ వేలంలో ఆర్సీబీ దూకుడు.. వెంకటేష్ అయ్యర్ చేరికతో జట్టు మరింత పటిష్టం