Is International Cricket in Danger? The Global Rise of T20 Leagues
జెంటిల్మెన్ గేమ్గా పేరుగాంచిన క్రికెట్కు ప్రపంచవ్యాప్తంగా రోజురోజుకు ఆదరణ విస్తృతంగా పెరుగుతోంది. ఒకప్పుడు యూరప్ దేశాల్లో క్రికెట్ గురించి పెద్దగా తెలియని వారు కూడా, ఇప్పుడు ఈ ఆటపై ఆసక్తి చూపుతున్నారు.
ఐపీఎల్ వంటి లీగ్ల ప్రభావంతో క్రికెట్ అంతర్జాతీయ స్థాయిలో విశేష ప్రసిద్ధి పొందింది. ఐపీఎల్ సక్సెస్ చూసి, అమెరికా, నేపాల్ వంటి కొత్త మార్కెట్లలో కూడా లీగ్లు ప్రారంభమవడం ఈ మార్పుకు నిదర్శనం. తాజాగా న్యూజిలాండ్లో కూడా భారీ స్థాయిలో కొత్త టీ20 లీగ్ను ప్రారంభించేందుకు ఏర్పాట్లు జరుగుతున్నాయి.
ఇప్పటికే ఐపీఎల్, బిగ్ బాష్ లీగ్, సౌతాఫ్రికా టీ20 లీగ్, ఇంటర్నేషనల్ టీ20 లీగ్, బంగ్లాదేశ్ ప్రీమియర్ లీగ్, పాకిస్తాన్ సూపర్ లీగ్, కరీబియన్ ప్రీమియర్ లీగ్, మేజర్ లీగ్ క్రికెట్ వంటి లీగ్లతో క్రికెట్ క్యాలెండర్ బిజిగా మారిపోయింది.
ఈ ప్రైవేట్ లీగ్లలో డబ్బు భారీగా ఉండటంతో, భారత ఆటగాళ్లను మినహాయించి, ఇతర దేశాల ఆటగాళ్లందరూ అంతర్జాతీయ క్రికెట్ కంటే లీగ్లపైనే ఎక్కువ దృష్టి పెట్టడం మొదలుపెట్టారు. నికోలస్ పూరన్, హెన్రిచ్ క్లాసెన్ వంటి స్టార్ ప్లేయర్లు తమ అంతర్జాతీయ కెరీర్లను పాక్షికంగా పక్కనపెట్టి పూర్తిగా లీగ్ క్రికెట్పైనే బిజీగా మారిపోయారు.
ప్రపంచవ్యాప్తంగా ప్రతీరోజూ ఏదో ఒక చోట ఒక లీగ్ జరగడం ఇప్పుడు సహజమే అయిపోయింది. ఈ పరిస్థితుల్లో ఆటగాళ్లు దేశానికి ప్రాతినిధ్యం వహించడానికి కంటే లీగ్ల్లో ఆడేందుకే ముందుకొస్తున్నారు. ప్రతిభావంతమైన ఆటగాళ్లు దేశ జట్టుకు దూరమై ప్రైవేట్ లీగ్లకే ప్రాధాన్యం ఇస్తే, అంతర్జాతీయ క్రికెట్ భవిష్యత్తు ఏమవుతుందనే ప్రశ్న తలెత్తుతోంది.
స్టార్లు లేకుండా జరిగే అంతర్జాతీయ మ్యాచ్లకు ప్రేక్షకుల ఆదరణ తగ్గడం సహజం. ఇప్పటికే లీగ్ల పుట్టుకతో అంతర్జాతీయ షెడ్యూల్ గణనీయంగా తగ్గిపోయింది. ఇలాంటి సమయంలో ఆటగాళ్లు జాతీయ విధులను పక్కనపెట్టి లీగ్లకు ఓటేస్తే, అంతర్జాతీయ క్రికెట్ నిలదొక్కుకోవడం కష్టమని విశ్లేషకులు హెచ్చరిస్తున్నారు.
ఆటగాళ్ల లభ్యత ఒకవైపు సమస్య అయితే, కిక్కిరిసిన షెడ్యూల్ మరో పెద్ద సవాలు. ఉదాహరణకు, ఐపీఎల్ సీజన్ ఒక్కటే దాదాపు రెండు నెలలు సాగుతుంది. ఈ కాలంలో ప్రపంచంలోని అన్ని టాప్ ప్లేయర్లు ఇండియాలోనే ఉంటారు. అలాగే, బిగ్బాష్, సౌతాఫ్రికా లీగ్, కరీబియన్ లీగ్, ఎంఎల్సీ ప్రతి లీగ్ ఒక్కో నెలపడితే, దాదాపు సంవత్సరం పొడవునా లీగ్లకే క్యాలెండర్ నిండిపోతుంది.
అప్పుడు అంతర్జాతీయ మ్యాచ్లు ఎప్పుడు జరుగుతాయి? ఆటగాళ్లు ఎలా అందుబాటులో ఉంటారు? అందుబాటులో ఉన్న రెండో స్థాయి ఆటగాళ్లతో మ్యాచ్లు నిర్వహించినా ప్రేక్షకులు ఎలా ఆకర్షితులవుతారు? ఈ ప్రశ్నలకు ఉదుత్తరాలు కనబడకపోవడం వల్ల అంతర్జాతీయ క్రికెట్ భవిష్యత్తుపై సందేహాలు పెరుగుతున్నాయి.
ప్రస్తుతం భారత్, ఆస్ట్రేలియా, ఇంగ్లాండ్, సౌతాఫ్రికా వంటి కొద్ది దేశాల ఆటగాళ్లు మాత్రమే జాతీయ విధులకు ప్రాధాన్యత ఇస్తున్నారు. కానీ భవిష్యత్తులో ఈ పరిస్థితి ఎలా మారుతుందో చెప్పడం కష్టం. కారణం లీగ్ ఫ్రాంచైజీల నుంచి వచ్చే ఆర్థిక ప్రలోభాలు అపారంగా ఉండటం.
తాజాగా ఒక ఫ్రాంచైజీ, జాతీయ విధులను వదిలేసి తమతోనే ఉండాలంటూ ఇద్దరు ఆస్ట్రేలియా ప్లేయర్లకు కోట్లాది రూపాయల ఆఫర్ ఇచ్చినట్లు వార్తలు వచ్చాయి. ఇలాంటి పరిస్థితుల్లో ఎంత నిబద్ధత ఉన్న ఆటగాళ్లైనా ఆకర్షితులుకాకుండా ఉండటం కష్టమే.
మరిన్ని వార్తలు చదవండి: జస్టిన్ గ్రీవ్స్ డబుల్ సెంచరీతో విండీస్ మెరుపు...న్యూజిలాండ్తో ఉత్కంఠభరిత డ్రా