Jos Buttler Creates Guinness World Record With Stunning 122 Meter Catch
ఇంగ్లండ్ వికెట్కీపింగ్ బ్యాటర్ జోస్ బట్లర్ తన అసాధారణ క్యాచింగ్ నైపుణ్యంతో గిన్నిస్ వరల్డ్ రికార్డ్స్లో చోటు దక్కించుకున్నాడు. ఇటీవల దక్షిణాఫ్రికాలోని కేప్టౌన్లో నిర్వహించిన ఒక ప్రత్యేక కార్యక్రమంలో బట్లర్ అద్భుత ఘనత సాధించాడు. 122 మీటర్ల ఎత్తు నుంచి డ్రోన్ ద్వారా వదిలిన బంతిని పట్టుకుని, ప్రపంచంలోనే అత్యంత ఎత్తు నుంచి క్యాచ్ పట్టిన వ్యక్తిగా గిన్నిస్ వరల్డ్ రికార్డును తన పేరిట నమోదు చేసుకున్నాడు. ఈ ఘనతను సాధించేందుకు గతంలో పలువురు ప్రయత్నించినప్పటికీ ఎవరికీ అది సాధ్యం కాలేదు.
అయితే బట్లర్ తన అద్భుతమైన హ్యాండ్ ఐ కోఆర్డినేషన్తో, బంతిపైనే సంపూర్ణ ఏకాగ్రత పెట్టి అద్భుతమైన క్యాచ్ను అందుకున్నాడు. గతంలో ఈ రికార్డు ఆస్ట్రేలియా వికెట్కీపర్ బ్యాటర్ తిమోతి షానన్ జెబ్సీలన్ పేరిట ఉండేది. 2021లో ఆయన 119.86 మీటర్ల ఎత్తు నుంచి పడిన బంతిని పట్టుకుని రికార్డు సృష్టించాడు. తాజాగా బట్లర్ ఆ రికార్డును అధిగమించి గిన్నిస్ వరల్డ్ రికార్డ్స్లో కొత్త అధ్యాయాన్ని రాశాడు.
ఈ ఫీట్కు క్రికెట్తో నేరుగా సంబంధం లేకపోయినా, ఇది బట్లర్కు మైదానంలో ఎంతో ఉపయోగపడే అనుభవమే. ఫీల్డింగ్ సమయంలో ఇలాంటి కఠిన పరిస్థితులు ఎదురైనా బట్లర్ విజయవంతమయ్యే అవకాశాలు మరింత పెరుగుతాయి. ఇప్పటికే అతను మైదానంలో ఎన్నో అద్భుతమైన క్యాచ్లతో అభిమానులను ఆశ్చర్యపరిచాడు. వికెట్కీపర్గా మాత్రమే కాకుండా, ఫీల్డర్గా కూడా అతనికి విశేష అనుభవం ఉంది. తాజాగా సాధించిన గిన్నిస్ రికార్డు మాత్రం అతన్ని మరింత ప్రత్యేకంగా నిలబెట్టింది. ఈ ఘనతకు సంబంధించిన వీడియో ప్రస్తుతం సోషల్ మీడియాలో వైరల్గా మారింది.
ఇదిలా ఉండగా, బట్లర్ ప్రస్తుతం టీ20 ప్రపంచకప్లో ఇంగ్లండ్ తరఫున ఆడుతున్నాడు. అయితే ఈ విధ్వంసకర బ్యాటర్ ఇటీవలి కాలంలో ఫామ్లేమితో ఇబ్బంది పడుతున్నాడు. ప్రపంచకప్లోనూ అతని పేలవ ప్రదర్శన కొనసాగుతోంది. నేపాల్తో జరిగిన మ్యాచ్లో 26 పరుగులు చేసిన బట్లర్, వెస్టిండీస్తో మ్యాచ్లో 21 పరుగులకే ఔటయ్యాడు. రెండు మ్యాచ్ల్లో శుభారంభాలు లభించినా, వాటిని భారీ స్కోర్లుగా మలచడంలో విఫలమయ్యాడు.
బట్లర్ ఫామ్లాగే, ఈ మెగా టోర్నీలో ఇంగ్లండ్ జట్టు పరిస్థితి కూడా అంతంత మాత్రంగానే ఉంది. తొలుత పసికూన నేపాల్ చేతిలో తృటిలో పరాజయం నుంచి తప్పించుకున్న ఇంగ్లండ్, ఆ తర్వాత వెస్టిండీస్ చేతిలో ఘోర ఓటమిని ఎదుర్కొంది. ఫలితంగా పాయింట్ల పట్టికలో వెస్టిండీస్, స్కాట్లాండ్, ఇటలీ తర్వాత నాలుగో స్థానంలో నిలిచింది.
మరిన్నివార్తలుచదవండి: ఎంఎస్ ధోనీ పది లక్షలు జమ చేయాలని కోర్టు ఆదేశించిన కారణం ఐపీఎల్ బెట్టింగ్ కేసు పూర్తి వివరాలు