KL Rahul Creates History with Century at Rajkot First Indian ODI Batter

టీమిండియా స్టార్ బ్యాటర్ కేఎల్ రాహుల్ మరో అరుదైన ఘనత సాధించాడు. రాజ్‌కోట్‌లోని నిరంజన్ షా స్టేడియంలో శతకం బాదిన తొలి భారత వన్డే బ్యాటర్‌గా రికార్డులకెక్కాడు. న్యూజిలాండ్‌తో జరుగుతున్న మూడు వన్డేల సిరీస్‌లో భాగంగా బుధవారం జరిగిన మ్యాచ్‌లో అజేయ సెంచరీతో రాహుల్ ఈ ఘనత సాధించాడు.

ఈ మ్యాచ్‌లో టాస్ గెలిచి ముందుగా బ్యాటింగ్ చేసిన భారత్ 50 ఓవర్లలో 7 వికెట్లకు 284 పరుగులు చేసింది. విరాట్ కోహ్లీ, రోహిత్ శర్మ, శ్రేయస్ అయ్యర్ నిరాశపరచగా, కేఎల్ రాహుల్ మాత్రం అద్భుతంగా ఆడుతూ 92 బంతుల్లో 11 ఫోర్లు, ఒక సిక్స్‌తో 112 పరుగులు చేసి అజేయంగా నిలిచాడు.

118 పరుగులకే నాలుగు వికెట్లు కోల్పోయి కష్టాల్లో ఉన్న భారత జట్టును ఐదో స్థానంలో బ్యాటింగ్‌కు వచ్చిన రాహుల్ చక్కగా ఆదుకున్నాడు. రవీంద్ర జడేజాతో కలిసి ఐదో వికెట్‌కు 73 పరుగులు, నితీష్ కుమార్ రెడ్డితో ఆరో వికెట్‌కు 57 పరుగులు, మహ్మద్ సిరాజ్‌తో ఏడో వికెట్‌కు 28 పరుగులు జోడించాడు. రాహుల్ 52 బంతుల్లో అర్ధశతకం పూర్తి చేయగా, మరో 30 బంతుల్లోనే సెంచరీని అందుకున్నాడు.

96 పరుగుల వద్ద జెమిసన్ బౌలింగ్‌లో భారీ సిక్సర్ బాది సెంచరీ పూర్తి చేసుకోవడం ప్రత్యేక ఆకర్షణగా నిలిచింది. ఇది రాహుల్‌కు ఎనిమిదవ వన్డే సెంచరీ కావడం గమనార్హం. అంతేకాకుండా ఈ మైదానంలో అత్యధిక వ్యక్తిగత వన్డే స్కోర్ కూడా రాహుల్ ఖాతాలోకే చేరింది. ఈ క్రమంలో అతను 11 ఏళ్ల పాత రికార్డును బద్దలు కొట్టాడు. 2015లో దక్షిణాఫ్రికా ఓపెనర్ క్వింటన్ డికాక్ ఈ మైదానంలో 108 పరుగులు చేశాడు. ఇప్పటివరకు అదే అత్యధిక స్కోర్‌గా ఉండగా, తాజాగా రాహుల్ 112 పరుగులతో ఆ రికార్డును అధిగమించాడు.

ప్రస్తుతం ఈ మైదానంలో అత్యధిక వ్యక్తిగత వన్డే స్కోర్లు చేసిన టాప్ ఐదు బ్యాటర్లు కేఎల్ రాహుల్, క్వింటన్ డికాక్, స్టీవ్ స్మిత్, శిఖర్ ధావన్ మరియు మిచెల్ మార్ష్‌గా కొనసాగుతున్నారు.

రాజ్‌కోట్‌లో అత్యధిక వ్యక్తిగత వన్డే స్కోర్లు

బ్యాటర్	దేశం	ప్రత్యర్థి	స్కోర్	సంవత్సరం
కేఎల్ రాహుల్	భారత్	న్యూజిలాండ్	112 నాటౌట్	2026
క్వింటన్ డికాక్	దక్షిణాఫ్రికా	భారత్	108	2015
స్టీవ్ స్మిత్	ఆస్ట్రేలియా	భారత్	98	2020
శిఖర్ ధావన్	భారత్	ఆస్ట్రేలియా	96	2020
మిచెల్ మార్ష్	ఆస్ట్రేలియా	భారత్	96	2023

మరిన్నివార్తలుచదవండి: విరాట్ కోహ్లీ నుంచి రోహిత్ శర్మ వరకూ: భారత క్రికెట్‌లో టాప్ రిచెస్ట్ ప్లేయర్స్