KS Bharat Announces Retirement from International Cricket, Ends India Journey with Emotional Message

భారత జట్టు తరఫున ఆడిన ఆంధ్రప్రదేశ్ వికెట్‌కీపర్-బ్యాటర్ కేఎస్ భరత్ గురువారం అంతర్జాతీయ క్రికెట్‌కు వీడ్కోలు పలికాడు. తన అంతర్జాతీయ క్రికెట్ ప్రయాణానికి ముగింపు పలుకుతూ ఆయన భావోద్వేగభరితమైన సందేశాన్ని సామాజిక మాధ్యమ వేదికలో పంచుకున్నాడు. భారత జట్టు తరఫున ఆడటం, ముఖ్యంగా టెస్టు క్రికెట్‌లో దేశాన్ని ప్రాతినిధ్యం వహించడం తన జీవితంలో అత్యంత గర్వకారణమని భరత్ పేర్కొన్నాడు.

తన క్రికెట్ ప్రయాణంలో ఎదురైన సవాళ్లు, కష్టాలు, త్యాగాలు తనను మరింత బలంగా తీర్చిదిద్దాయని ఆయన చెప్పాడు. ఈ సందర్భంగా తన కుటుంబ సభ్యులకు ప్రత్యేక కృతజ్ఞతలు తెలిపాడు. తల్లిదండ్రులు, సోదరి అందించిన అండదండలు లేకపోతే ఈ స్థాయికి చేరుకోవడం సాధ్యమయ్యేది కాదని పేర్కొన్నాడు. భారత జట్టుకు ఆడాలన్న కుటుంబ కలే తనకు ఎప్పటికీ ప్రేరణగా నిలిచిందని వెల్లడించాడు.

కేఎస్ భరత్ అంతర్జాతీయ కెరీర్‌లో మొత్తం ఏడు టెస్టు మ్యాచ్‌లు ఆడాడు. ఈ మ్యాచ్‌ల్లో 221 పరుగులు సాధించగా, అతని సగటు 20.09గా నమోదైంది. అత్యధిక స్కోరు 44 పరుగులు. వికెట్‌ల వెనుక కూడా భరత్ విశ్వసనీయ ప్రదర్శన కనబరిచాడు. మొత్తం 21 క్యాచ్‌లు అందుకోవడంతో పాటు ఒక స్టంపింగ్ చేశాడు. అంతర్జాతీయ కెరీర్ ఎక్కువ కాలం కొనసాగకపోయినా, భారత జట్టు తరఫున టెస్టు క్రికెట్ ఆడాలన్న తన కలను నెరవేర్చుకున్నాడు.

ఏసీఏ, వీసీడీసీఏ సేవలను గుర్తు చేసుకున్న భరత్

తన ప్రయాణంలో సహకరించిన భారత క్రికెట్ నియంత్రణ మండలి, కోచ్‌లు, మేనేజర్లు, సెలెక్టర్లు, నిర్వాహకులకు భరత్ ధన్యవాదాలు తెలిపాడు. చిన్న వయసు నుంచే తన ప్రతిభను తీర్చిదిద్దిన ఆంధ్ర క్రికెట్ సంఘం, విశాఖపట్నం జిల్లా క్రికెట్ సంఘాల సేవలను గుర్తుచేసుకున్నాడు. అలాగే మైదాన సిబ్బంది, సహచర ఆటగాళ్ల సహకారం కూడా తన ఎదుగుదలకు ఎంతో ఉపయోగపడిందని పేర్కొన్నాడు.

తన కెరీర్‌పై ప్రభావం చూపిన పలువురు ప్రముఖులకు భరత్ ప్రత్యేకంగా కృతజ్ఞతలు తెలిపాడు. 2021లో రాయల్ ఛాలెంజర్స్ బెంగళూరు తరఫున ఐపీఎల్ అరంగేట్రం చేసే అవకాశం ఇచ్చిన విరాట్ కోహ్లీకి ధన్యవాదాలు తెలిపాడు. అలాగే తన టెస్టు అరంగేట్రం సమయంలో కెప్టెన్‌గా ఉన్న రోహిత్ శర్మకు, ఇండియా-ఏ స్థాయి నుంచి సీనియర్ జట్టుకు చేరుకునే వరకు మార్గనిర్దేశం చేసిన రాహుల్ ద్రావిడ్‌కు కృతజ్ఞతలు తెలిపాడు.

అంతర్జాతీయ క్రికెట్‌కు వీడ్కోలు పలికినా, క్రికెట్‌తో తన అనుబంధం కొనసాగుతుందని భరత్ స్పష్టం చేశాడు. తన చిన్ననాటి కోచ్ జే కృష్ణారావుకు, ఎల్లప్పుడూ అండగా నిలిచిన అభిమానులకు ధన్యవాదాలు తెలిపాడు. యువ క్రికెటర్లు పెద్ద కలలు కనాలని, క్రమశిక్షణతో ముందుకు సాగాలని సూచించిన భరత్, భవిష్యత్తులో కోచింగ్, మార్గదర్శకత్వం ద్వారా తదుపరి తరం ఆటగాళ్లకు సేవ చేయాలని ఆశాభావం వ్యక్తం చేశాడు. భారత జట్టు తరఫున జాతీయ గీతం ఆలకించిన క్షణాలు తన జీవితంలో చిరస్మరణీయమైన జ్ఞాపకాలుగా నిలిచిపోతాయని పేర్కొంటూ తన సందేశాన్ని ముగించాడు.