Mitchell Starc Wins ICC Men’s Player of the Month – December 2025

ఆస్ట్రేలియా స్టార్ పేసర్ మిచెల్ స్టార్క్‌కు ఐసీసీ నుంచి ప్రతిష్టాత్మక గౌరవం దక్కింది. డిసెంబర్ 2025 నెలకు గాను ఆయనను ‘ఐసీసీ మెన్స్ ప్లేయర్ ఆఫ్ ది మంత్’గా ఎంపిక చేశారు. ఇటీవల ముగిసిన యాషెస్ సిరీస్‌లో స్టార్క్ ప్రదర్శన అసాధారణంగా నిలిచింది. ఐదు టెస్టుల సిరీస్‌ను ఆస్ట్రేలియా 4-1 తేడాతో కైవసం చేసుకోవడంలో ఆయన కీలక పాత్ర పోషించాడు.

ఈ యాషెస్ సిరీస్‌లో స్టార్క్ మొత్తం 31 వికెట్లు పడగొట్టి ప్రత్యర్థి ఇంగ్లాండ్ బ్యాటింగ్‌ను పూర్తిగా కట్టడి చేశాడు. ఆసీస్ రెగ్యులర్ కెప్టెన్ పాట్ కమ్మిన్స్‌తో పాటు జోష్ హాజిల్‌వుడ్ గాయాల కారణంగా సిరీస్‌కు దూరం కావడంతో, పేస్ విభాగాన్ని స్టార్క్ ముందుండి నడిపించాడు. అనుభవంతో పాటు బాధ్యతను మోస్తూ బౌలింగ్‌లో దుమ్మురేపాడు.

బౌలింగ్‌లోనే కాదు, బ్యాటింగ్‌లోనూ స్టార్క్ తన సత్తాను చాటాడు. బ్రిస్బేన్, ఆడిలైడ్ టెస్టుల్లో కీలక హాఫ్ సెంచరీలు సాధించి జట్టుకు విలువైన పరుగులు అందించాడు. ఈ ఆల్‌రౌండ్ ప్రదర్శన కారణంగానే స్టార్క్‌కు ఈ ప్రతిష్టాత్మక ఐసీసీ అవార్డు దక్కింది.

ఈ అవార్డు రేసులో వెస్టిండీస్ ఆల్‌రౌండర్ జస్టిన్ గ్రీవ్స్, న్యూజిలాండ్ బౌలర్ జాకబ్ డఫీ కూడా పోటీ పడ్డారు. అయితే వారి కంటే స్టార్క్ ప్రదర్శన స్పష్టంగా మెరుగ్గా ఉండటంతో ఐసీసీ అవార్డును ఆయన సొంతం చేసుకున్నాడు.

అవార్డు అందుకున్న అనంతరం స్టార్క్ స్పందిస్తూ,
“ఐసీసీ ప్లేయర్ ఆఫ్ ది మంత్‌గా ఎంపిక కావడం చాలా గర్వంగా ఉంది. సొంతగడ్డపై జరిగిన ప్రతిష్టాత్మక యాషెస్ సిరీస్ విజయంలో భాగం కావడం మరింత ఆనందాన్ని ఇచ్చింది. ఇప్పుడు మా దృష్టి పూర్తిగా ఐసీసీ వరల్డ్ టెస్ట్ ఛాంపియన్‌షిప్ ఫైనల్‌పైనే ఉంది” అని పేర్కొన్నాడు.

గమనించాల్సిన మరో విశేషం ఏమిటంటే, రెండేళ్ల తర్వాత ఒక ఆస్ట్రేలియా ఆటగాడు ఈ అవార్డు గెలుచుకోవడం ఇదే తొలిసారి. చివరిసారిగా డిసెంబర్ 2023లో పాట్ కమ్మిన్స్ ఈ గౌరవాన్ని అందుకున్నాడు.

మరిన్ని వార్తలు చదవండి: Washington Sundar గాయం: న్యూజిలాండ్ టీ20 సిరీస్‌కు దూరం.. వరల్డ్‌కప్ అనుమానం