Mohammed Shami Returns: Included in Bengal Squad for Syed Mushtaq Ali Trophy 2025-26

టీమిండియా స్టార్ పేసర్ మహ్మద్ షమీ మరోసారి తన ఫిట్‌నెస్‌ను నిరూపించుకునేందుకు సిద్ధమయ్యాడు. దేశవాళీ టీ20 టోర్నీ సయ్యద్ ముస్తాక్ అలీ ట్రోఫీ 2025–26లో బెంగాల్ తరఫున ఆడనున్నాడు. ఈ టోర్నీ కోసం బెంగాల్ క్రికెట్ అసోసియేషన్ ప్రకటించిన జట్టులో షమీకి స్థానం లభించింది.

ఈ జట్టుకు కెప్టెన్‌గా అనుభవజ్ఞుడు అభిమన్యు ఈశ్వరన్ ఎంపికయ్యాడు. షమీతో పాటు టీమిండియా పేసర్ ఆకాశ్ దీప్ కూడా బెంగాల్ జట్టులో ఉన్నాడు. వికెట్ కీపర్ బాధ్యతలను అభిషేక్ పోరెల్ నిర్వహించనున్నాడు.

గ్రూప్–సిలో ఉన్న బెంగాల్ జట్టు నవంబర్ 26న హైదరాబాద్‌తో తన తొలి మ్యాచ్ ఆడనుంది. ఈ గ్రూపులో బెంగాల్‌తో పాటు పంజాబ్, హిమాచల్ ప్రదేశ్, సర్వీసెస్, పుదుచ్చేరి, హర్యానా జట్లు ఉన్నాయి.

షమీకి రీ-ఎంట్రీ దక్కుతుందా?

ఇటీవలి కాలంగా మహ్మద్ షమీ జాతీయ జట్టుకు దూరంగా ఉన్నాడు. అతను భారత్ తరఫున చివరిసారి ఈ ఏడాది మార్చిలో జరిగిన ఛాంపియన్స్ ట్రోఫీలో ఆడాడు. ఆ తర్వాత షమీ జట్టు వెలుపలే ఉన్నాడు. ఫస్ట్ క్లాస్ క్రికెట్‌లో అద్భుత ప్రదర్శన చేస్తూనే ఉన్నా, సెలక్టర్లు అతన్ని పరిగణనలోకి తీసుకోవడం లేదు.

రంజీ ట్రోఫీ 2025–26 తొలి దశలో షమీ పూర్తి పాల్గొనడంతో పాటు 20 వికెట్లు తీసి తన ఫామ్‌ను చూపించాడు. అయినప్పటికీ ఫిట్‌నెస్ సమస్యల కారణంగా షమీని ఎంపిక చేయలేమని బీసీసీఐ చీఫ్ సెలక్టర్ అజిత్ అగార్కర్ చెప్పుకొస్తున్నాడు.

కానీ ఇటీవల షమీ మాత్రం తాను పూర్తిగా ఫిట్‌గా ఉన్నప్పటికీ కావాలనే తనను పక్కన పెడుతున్నారని పరోక్షంగా సెలక్టర్ల నిర్ణయంపై అసంతృప్తి వ్యక్తం చేశాడు.

ఒకవేళ షమీ ముస్తాక్ అలీ ట్రోఫీలో మెరుగైన ప్రదర్శన ఇస్తే, రాబోయే న్యూజిలాండ్‌తో టీ20 సిరీస్‌కు రీ-ఎంట్రీ దక్కే అవకాశం ఉంది.

బెంగాల్ జట్టు

అభిమన్యు ఈశ్వరన్ (కెప్టెన్), సుదీప్ ఘరామి, అభిషేక్ పోరెల్ (వికెట్ కీపర్), షకీర్ హబీబ్ గాంధీ, యువరాజ్ కేస్వానీ, ప్రియాంషు శ్రీవాస్తవ్, షాబాజ్ అహ్మద్, ప్రదీప్త ప్రమాణిక్, రిటిక్ ఛటర్జీ, కరణ్ లాల్, సాక్షం చౌదరి, మహ్మద్ షమీ, ఆకాశ్ దీప్, సయన్ ఘోష్, కనిష్క్ సేథ్, యుధాజిత్ గుహా, శ్రేయాన్ చక్రవర్తి

మరిన్ని వార్తలు చదవండి: WTC 2025-27: తాజాగా అప్‌డేట్ చేసిన వరల్డ్ టెస్ట్ ఛాంపియన్‌షిప్ పాయింట్ల పట్టిక