విండీస్ స్టార్ ఆల్రౌండర్ జేసన్ హోల్డర్ చరిత్ర సృష్టించాడు. పొట్టి ఫార్మాట్లో ఒకే క్యాలెండర్ సంవత్సరంలో అత్యధిక వికెట్లు తీసిన బౌలర్గా కొత్త రికార్డును నెలకొల్పాడు. 2025 సంవత్సరంలో హోల్డర్ మొత్తం 69 టీ20 మ్యాచ్లు ఆడి 97 వికెట్లు సాధించాడు.
ఇంటర్నేషనల్ లీగ్ టీ20లో గల్ఫ్ జెయింట్స్తో జరిగిన మ్యాచ్ సందర్భంగా ఈ ఘనతను అతడు అందుకున్నాడు. ఆ మ్యాచ్లో అబుదాబీ నైట్రైడర్స్ తరఫున బరిలోకి దిగిన హోల్డర్ రెండు కీలక వికెట్లు తీసి జట్టు విజయంలో ముఖ్య పాత్ర పోషించాడు.
ఇంతకుముందు ఒకే క్యాలెండర్ సంవత్సరంలో అత్యధిక టీ20 వికెట్లు తీసిన రికార్డు ఆఫ్ఘనిస్తాన్ స్టార్ బౌలర్ రషీద్ ఖాన్ పేరిట ఉండేది. రషీద్ ఖాన్ 2018లో 61 మ్యాచ్ల్లో 96 వికెట్లు తీసి ఆ రికార్డును నెలకొల్పాడు.
ఇప్పుడు హోల్డర్ ఆ మార్క్ను దాటి అగ్రస్థానానికి చేరాడు. ఈ జాబితాలో రషీద్ ఖాన్ తర్వాత డ్వేన్ బ్రావో, నూర్ అహ్మద్ ఉన్నారు. బ్రావో 2016లో 72 మ్యాచ్ల్లో 87 వికెట్లు తీయగా, నూర్ అహ్మద్ ఈ ఏడాది 64 మ్యాచ్ల్లో 85 వికెట్లు సాధించాడు.
డెత్ ఓవర్ల స్పెషలిస్ట్గా హోల్డర్
ఇటీవలి కాలంలో జేసన్ హోల్డర్ డెత్ ఓవర్ల స్పెషలిస్ట్గా ప్రత్యేక గుర్తింపు సంపాదించాడు. ఈ ఏడాది అతడు తీసిన 97 వికెట్లలో ఏకంగా 45 వికెట్లు చివరి ఓవర్లలోనే రావడం విశేషం. 2022లో 59 వికెట్లు మాత్రమే తీసిన హోల్డర్, 2025లో తన ప్రదర్శనను మరింత మెరుగుపరుచుకుని వికెట్ల సంఖ్యను భారీగా పెంచాడు. టీ20ల్లో అతడి ప్రభావాన్ని గుర్తించిన గుజరాత్ టైటాన్స్, ఐపీఎల్ 2026 వేలంలో హోల్డర్ను రూ. 7 కోట్ల భారీ ధరకు కొనుగోలు చేసింది.
ఈ ఏడాది హోల్డర్ విండీస్ జాతీయ జట్టుతో పాటు ఐదు వేర్వేరు ఫ్రాంచైజీలకు ప్రాతినిధ్యం వహించాడు. 2025లో అత్యధిక టీ20 వికెట్లు తీసిన బౌలర్ల జాబితాలో హోల్డర్ తర్వాత నూర్ అహ్మద్ 85 వికెట్లు, హసన్ అలీ 71 వికెట్లు, హారిస్ రౌఫ్ 66 వికెట్లు సాధించారు. గాయాల కారణంగా రషీద్ ఖాన్ ఈ ఏడాది కేవలం 63 వికెట్లకే పరిమితమయ్యాడు.
మరిన్నివార్తలుచదవండి: మాక్స్వెల్ మాన్స్టర్ సిక్సర్: స్టేడియం బయట పడిపోయిన బంతి.. వైరల్ వీడియో