Mr 360 Suryakumar Yadav Shines as India Post Respectable Total Against USA in T20 World Cup 2026

టీ20 ప్రపంచకప్ 2026లో ముంబై వేదికగా అమెరికాతో జరిగిన మ్యాచ్‌లో భారత కెప్టెన్ సూర్యకుమార్ యాదవ్ మరోసారి ఎందుకు తనను మిస్టర్ 360 అని పిలుస్తారో నిరూపించాడు. సహచర బ్యాటర్లు వరుసగా పెవిలియన్ చేరుతున్న సమయంలో, జట్టు భారీ ఒత్తిడిలో ఉన్నా సూర్య మాత్రం తన సహజమైన ఆటతీరును కొనసాగించాడు. కీలక సమయంలో బాధ్యత తీసుకుని బ్యాట్ జులిపించి భారత్‌కు గౌరవప్రదమైన స్కోరు అందించాడు.

ఇన్నింగ్స్ చివరి ఓవర్లలో సూర్యకుమార్ యాదవ్ విధ్వంసం సృష్టించాడు. చివరి ఓవర్‌లో రెండు ఫోర్లు, రెండు సిక్సులు బాది అమెరికా బౌలర్లకు చుక్కలు చూపించాడు. అంతకుముందు 19వ ఓవర్‌లో కూడా ఒక ఫోర్, ఒక సిక్స్ బాది స్కోర్‌బోర్డును పరుగులు పెట్టించాడు. మైదానం నలుమూలలా షాట్లు ఆడుతూ ఫీల్డింగ్ సెటప్‌ను చీల్చి చెండాడాడు.

గ్యాప్ చూసి మరీ ఫోర్లు, సిక్సులు బాదుతూ కీలక పరుగులు సాధించాడు. ఆ సమయంలో సూర్య బ్యాటింగ్‌ను చూస్తే నిజంగానే మిస్టర్ 360 అనే బిరుదు అతడికి ఎందుకు వచ్చిందో స్పష్టంగా అర్థమైంది. ఒత్తిడిలోనూ తన స్టైల్‌ను మార్చుకోకుండా ఆడిన అతడి ఇన్నింగ్స్ మ్యాచ్‌కే హైలైట్‌గా నిలిచింది.

సూర్యకుమార్ యాదవ్ చివరి వరకు క్రీజులో నిలిచి 84 పరుగులతో నాటౌట్‌గా నిలిచాడు. 360 డిగ్రీల షాట్లతో ఫీల్డింగ్ పరిమితులను చెరిపేస్తూ ప్రేక్షకులను పూర్తి స్థాయిలో అలరించాడు. మిగతా బ్యాటర్లు త్వరగా ఔటైనా, ఒంటరిగా పోరాడిన సూర్య భారత ఇన్నింగ్స్‌కు ప్రాణం పోశాడు. ఒకవేళ అతడు కూడా తొందరగా ఔటై ఉంటే, భారత్ వంద పరుగుల లోపే ఆలౌట్ అయ్యేది అనడం అతిశయోక్తి కాదు.

ఈ ఇన్నింగ్స్ తర్వాత సూర్యకుమార్ యాదవ్‌పై సోషల్ మీడియాలో ప్రశంసల వర్షం కురుస్తోంది. సూర్య భాయ్ సూపర్, అద్భుతమైన ఇన్నింగ్స్, కెప్టెన్‌కు తగిన ప్రదర్శన అంటూ అభిమానులు కొనియాడుతున్నారు.

అమెరికాతో జరిగిన ఈ మ్యాచ్‌లో భారత్ నిర్ణీత 20 ఓవర్లలో తొమ్మిది వికెట్లు కోల్పోయి 161 పరుగులు చేసింది. టాప్ ఆర్డర్ విఫలమైన వేళ చివరి ఓవర్లలో సూర్య ఆడిన ఈ ఇన్నింగ్స్ జట్టుకు కీలకంగా మారింది. ఒత్తిడిలోనూ బాధ్యత తీసుకుని జట్టును నిలబెట్టగలడని మరోసారి నిరూపించిన సూర్యకుమార్ యాదవ్, నిజంగానే టీమిండియాకు అమూల్యమైన మిస్టర్ 360గా నిలిచాడు.

మరిన్నివార్తలుచదవండి: బీసీసీఐ సెంట్రల్ కాంట్రాక్ట్స్ 2025–26: రోహిత్ శర్మ, విరాట్ కోహ్లీ బీ గ్రేడ్‌కు మార్పు