NZ vs IND T20 Series: Michael Bracewell Ruled Out of First Three T20Is Against India

భారత గడ్డపై తొలిసారి వన్డే సిరీస్‌ను కైవసం చేసుకుని ఉత్సాహంలో ఉన్న న్యూజిలాండ్ జట్టుకు టీ20 సిరీస్‌కు ముందే పెద్ద ఎదురుదెబ్బ తగిలింది. భారత్, న్యూజిలాండ్ జట్ల మధ్య ఐదు మ్యాచ్‌ల టీ20 సిరీస్ బుధవారం (జనవరి 21) నుంచి ప్రారంభం కానుంది. ఈ సిరీస్‌లో తొలి మ్యాచ్ నాగ్‌పూర్ వేదికగా జరగనుంది.

అయితే, ఈ కీలక సిరీస్ ప్రారంభానికి ముందు కివీస్‌కు గట్టి షాక్ తగిలింది. న్యూజిలాండ్ వన్డే కెప్టెన్ మైఖేల్ బ్రేస్‌వెల్ గాయ కారణంగా తొలి మూడు టీ20 మ్యాచ్‌లకు దూరమయ్యాడు. ఈ విషయాన్ని న్యూజిలాండ్ క్రికెట్ బోర్డు అధికారికంగా ప్రకటించింది. భారత్‌తో జరిగిన మూడో వన్డేలో బ్రేస్‌వెల్ గాయపడినట్లు బోర్డు వెల్లడించింది. ప్రస్తుతం అతడు పిక్క గాయంతో బాధపడుతూ వైద్యుల పర్యవేక్షణలో ఉన్నాడని తెలిపింది.

బ్రేస్‌వెల్ స్థానంలో యువ పేస్ ఆల్‌రౌండర్ క్రిస్టియన్ క్లార్క్‌ను తొలి మూడు టీ20 మ్యాచ్‌ల కోసం జట్టులోకి తీసుకున్నట్లు న్యూజిలాండ్ క్రికెట్ బోర్డు ప్రకటించింది. ఇటీవల భారత్‌తో జరిగిన వన్డే సిరీస్ ద్వారానే క్రిస్టియన్ క్లార్క్ అంతర్జాతీయ క్రికెట్‌లో అరంగ్రేటం చేశాడు. ఆ సిరీస్‌లో మూడు మ్యాచ్‌ల్లో 26.14 సగటుతో 7 వికెట్లు తీసి ఆకట్టుకున్నాడు. ఇక దేశవాళీ టీ20ల్లో అతడి ఎకానమీ రేట్ 9.08 కాగా, 22 మ్యాచ్‌ల్లో 24 వికెట్లు పడగొట్టాడు. ఈ నేపథ్యంలో భారత్‌తో జరిగే టీ20 సిరీస్‌లో క్లార్క్ టీ20 అంతర్జాతీయ అరంగ్రేటం చేసే అవకాశం ఉందని అంచనా వేస్తున్నారు.

క్రిస్టియన్ క్లార్క్ ఎంపికపై న్యూజిలాండ్ హెడ్ కోచ్ రాబ్ వాల్టర్ స్పందిస్తూ.. వన్డే సిరీస్‌లో అతడు తన సామర్థ్యాన్ని నిరూపించుకున్నాడని ప్రశంసించాడు. ఒత్తిడి పరిస్థితుల్లోనూ క్లార్క్ ధైర్యంగా బౌలింగ్ చేసి జట్టుకు ఉపయోగపడ్డాడని పేర్కొన్నాడు. అందుకే అతడికి టీ20 జట్టులో అవకాశం కల్పించామని వెల్లడించాడు.

భారత్‌తో టీ20 సిరీస్‌కు న్యూజిలాండ్ నవీకరించిన జట్టు:

మిచెల్ సాంట్నర్ (కెప్టెన్), మైఖేల్ బ్రేస్‌వెల్, మార్క్ చాప్‌మన్, డెవాన్ కాన్వే, జేకబ్ డఫీ, జాక్ ఫౌల్క్స్, మాట్ హెన్రీ, కైల్ జెమీషన్, బెవాన్ జాకబ్స్, డారిల్ మిచెల్, జేమ్స్ నీషమ్, గ్లెన్ ఫిలిప్స్, రచిన్ రవీంద్ర, టిమ్ రాబిన్సన్, ఇష్ సోధి, క్రిస్టియన్ క్లార్క్ (తొలి మూడు మ్యాచ్‌లకు).

మరిన్ని వార్తలు చదవండి: శ్రీలంక vs ఇంగ్లాండ్ 2026 షెడ్యూల్: వన్డే, టీ20 మ్యాచ్‌ల పూర్తి వివరాలు