Oman Shock Sri Lanka A in T20 World Cup 2026 Warm-up Match
టీ20 ప్రపంచకప్ 2026కు ముందు జరిగిన వార్మప్ మ్యాచ్లో ఒమన్ జట్టు సంచలన విజయాన్ని నమోదు చేసింది. ఆల్రౌండ్ ప్రదర్శనతో రాణించిన ఒమన్, శ్రీలంక ‘ఎ’ జట్టును ఐదు వికెట్ల తేడాతో ఓడించి అందరినీ ఆశ్చర్యానికి గురి చేసింది.
భారత్, శ్రీలంక వేదికలుగా ఫిబ్రవరి 7 నుంచి టీ20 ప్రపంచకప్ 2026 ప్రారంభం కానున్న సంగతి తెలిసిందే. ఈ నేపథ్యంలో సోమవారం నుంచి వార్మప్ మ్యాచ్లు ప్రారంభమయ్యాయి. అందులో భాగంగా మంగళవారం కొలంబో వేదికగా శ్రీలంక ‘ఎ’ జట్టు, ఒమన్తో తలపడింది.
శ్రీలంక ‘ఎ’ 145 పరుగులకే పరిమితం
టాస్ గెలిచిన శ్రీలంక ‘ఎ’ జట్టు తొలుత బ్యాటింగ్ను ఎంచుకుంది. అయితే ఒమన్ బౌలర్ల కట్టుదిట్టమైన దాడికి శ్రీలంక బ్యాటర్లు తట్టుకోలేకపోయారు. ఫలితంగా నిర్ణీత 20 ఓవర్లలో తొమ్మిది వికెట్లు కోల్పోయి కేవలం 145 పరుగులకే పరిమితమయ్యారు.
టాప్ ఆర్డర్లో ఓపెనర్ సినెత్ జయవర్దన (9), వన్డౌన్ బ్యాటర్ పులిందు పెరిరా (9) నిరాశపరిచారు. మరో ఓపెనర్ దుల్నిత్ సిగెర (20) కొంతమేర పోరాడాడు. మధ్య వరుసలో గుణశేఖర (21), వనుజ సహాన్ (29) మాత్రమే చెప్పుకోదగ్గ స్కోర్లు సాధించారు.
ఒమన్ బౌలర్లలో షా ఫైజల్, షకీల్ అహ్మద్, జే ఒడెరా రెండేసి వికెట్లు పడగొట్టగా, నదీం ఖాన్ ఒక వికెట్ సాధించాడు.
ఆమీర్ కలీమ్ మెరుపు ఇన్నింగ్స్తో ఒమన్ విజయం
146 పరుగుల లక్ష్యంతో బరిలోకి దిగిన ఒమన్ జట్టు 18 ఓవర్లలోనే ఐదు వికెట్లు మాత్రమే కోల్పోయి విజయాన్ని అందుకుంది. ఓపెనర్, 44 ఏళ్ల వెటరన్ ఆటగాడు ఆమీర్ కలీమ్ అద్భుతంగా రాణించాడు. 47 బంతుల్లో 80 పరుగులు చేసిన అతడు ఒంటిచేత్తో జట్టును గెలిపించాడు.
అతడికి వికెట్ కీపర్ బ్యాటర్ వినాయక్ శుక్లా చక్కని సహకారం అందించాడు. వినాయక్ 24 బంతుల్లో 39 పరుగులు చేసి నాటౌట్గా నిలిచాడు. మిగతా బ్యాటర్లు సింగిల్ డిజిట్ స్కోర్లకే పరిమితమయ్యారు.
శ్రీలంక బౌలర్లలో వనుజ సహాన్ మూడు వికెట్లు పడగొట్టగా, కెప్టెన్ లాహిరు సమరకూన్, కవిజ గమేజ్ చెరో వికెట్ తీసుకున్నారు. అయినప్పటికీ, ఒమన్ విజయాన్ని అడ్డుకోలేకపోయారు.
మరిన్నివార్తలుచదవండి: IPL 2026 RCB for Sale: దాదాపు 2 బిలియన్ డాలర్ల విలువతో RCB అమ్మకానికి