Pat Cummins Ruled Out of T20 World Cup 2026, Confirms IPL 2026 Return

టీ20 ప్రపంచకప్‌–2026కు ఆస్ట్రేలియా స్టార్ ఆల్‌రౌండర్ ప్యాట్ కమ్మిన్స్ దూరమైన విషయం తెలిసిందే. తొలుత ప్రకటించిన జట్టులో అతడి పేరు ఉన్నప్పటికీ, గాయం నుంచి ఇంకా పూర్తిగా కోలుకోకపోవడంతో చివరి నిమిషంలో టోర్నీ నుంచి తప్పుకోవాల్సి వచ్చింది. కమ్మిన్స్ స్థానంలో యువ ఆటగాడు బెన్ దుర్హనియస్‌ను సెలెక్టర్లు జట్టులోకి తీసుకున్నారు.

గత జూలై నెల నుంచి కమ్మిన్స్ వెన్ను నొప్పితో ఇబ్బంది పడుతున్నాడు. ఇటీవల జరిగిన యాషెస్ సిరీస్‌లో కూడా అతడు ఒక్క టెస్టు మ్యాచ్‌కే పరిమితమయ్యాడు. ప్రపంచకప్ సమయానికి అతడు పూర్తిగా ఫిట్‌గా మారతాడని క్రికెట్ ఆస్ట్రేలియా ఆశించినప్పటికీ, తాజా వైద్య పరీక్షలు ఆ ఆశలను నీరుగార్చాయి. కమ్మిన్స్‌కు ఇంకా 4 నుంచి 8 వారాల విశ్రాంతి అవసరమని డాక్టర్లు సూచించడంతో, ఈ మెగా టోర్నీకి దూరంగా ఉండక తప్పలేదు.

అయితే ప్రపంచకప్‌కు దూరమైనా, సన్‌రైజర్స్ హైదరాబాద్ అభిమానులకు మాత్రం కమ్మిన్స్ గుడ్ న్యూస్ చెప్పారు. ఐపీఎల్‌–2026 నాటికి తాను పూర్తిగా కోలుకుని అందుబాటులో ఉంటానని స్పష్టమైన సంకేతాలు ఇచ్చాడు.

ఈ విషయంపై ఓ ఇంటర్వ్యూలో స్పందించిన కమ్మిన్స్,
“ప్రపంచకప్ లాంటి పెద్ద టోర్నీకి దూరమవ్వడం నిజంగా బాధాకరం. అడిలైడ్ టెస్టు తర్వాత నా గాయం మళ్లీ తీవ్రతరమైంది. మొదట నాలుగు వారాల్లో కోలుకుంటానని భావించాను. కానీ తాజా స్కాన్‌లో ఇంకొన్ని వారాల విశ్రాంతి అవసరమని తేలింది. అందుకే ఈ టోర్నీ నుంచి తప్పుకోవాల్సి వచ్చింది.

కొన్ని రోజుల్లో మరోసారి స్కాన్ చేయించుకుంటాను. రిపోర్ట్ సానుకూలంగా వస్తే, అప్పటి నుంచి నెమ్మదిగా ప్రాక్టీస్ ప్రారంభిస్తాను. త్వరలోనే మళ్లీ మైదానంలోకి దిగాలని ప్రయత్నిస్తాను” అని చెప్పాడు.

ఇదిలా ఉంటే, ఐపీఎల్‌లో సన్‌రైజర్స్ హైదరాబాద్ కెప్టెన్‌గా కమ్మిన్స్ కొనసాగుతున్న విషయం తెలిసిందే. జట్టు యజమానురాలు కావ్య మారన్ మరోసారి అతడిపై పూర్తి నమ్మకం ఉంచడం ఎస్ఆర్‌హెచ్ అభిమానుల్లో మరింత ఉత్సాహాన్ని నింపుతోంది.