అఫ్గానిస్తాన్ స్టార్ స్పిన్నర్ రషీద్ ఖాన్ తన స్వదేశంలో తీసుకుంటున్న భద్రతా చర్యల గురించి సంచలన వ్యాఖ్యలు చేశాడు. భద్రతా కారణాల వల్ల తాను ఎప్పుడూ బుల్లెట్ ప్రూఫ్ కారులోనే ప్రయాణిస్తానని రషీద్ వెల్లడించాడు. తనకు ఉన్న ప్రజాదరణతో పాటు అభిమానుల ఉత్సాహం కొన్ని సందర్భాల్లో అనూహ్య పరిస్థితులకు దారి తీయవచ్చని చెబుతూ, ఈ జాగ్రత్తలు తప్పనిసరిగా మారాయని స్పష్టం చేశాడు.
ఈ విషయాలను మాజీ ఇంగ్లండ్ క్రికెటర్ కెవిన్ పీటర్సన్తో కలిసి పాల్గొన్న ది స్విచ్ కార్యక్రమంలో రషీద్ ఖాన్ పంచుకున్నాడు. అఫ్గానిస్తాన్లో తాను సాధారణంగా రోడ్లపై స్వేచ్ఛగా తిరగడం సాధ్యం కాదని, అందుకే ప్రతిసారి కఠినమైన భద్రతా ఏర్పాట్లతోనే బయటకు వెళ్లాల్సి వస్తోందని వివరించాడు. రషీద్ మాటలు విన్న కెవిన్ పీటర్సన్ ఆశ్చర్యానికి గురయ్యాడు. ఈ ఇంటర్వ్యూలో పీటర్సన్ నువ్వు నీ దేశంలో సాధారణంగా రోడ్లపై తిరగగలవా అని ప్రశ్నించాడు.
దీనికి స్పందించిన రషీద్ ఖాన్ నవ్వుతూ అసలు అవకాశం లేదని చెప్పాడు. దానికి పీటర్సన్ నిజమా ఎందుకు అలా అని అడగగా, రషీద్ సమాధానంగా తాను సాధారణ కారులో ప్రయాణించే పరిస్థితి లేదని స్పష్టం చేశాడు. తాను తప్పనిసరిగా బుల్లెట్ ప్రూఫ్ కారులోనే ప్రయాణించాల్సి ఉంటుందని, తన సొంత బుల్లెట్ ప్రూఫ్ కారులోనే తిరుగుతానని వెల్లడించాడు.
ఇది పూర్తిగా తన భద్రత కోసమేనని రషీద్ చెప్పాడు. నన్నెవరూ కాల్చబోరు కానీ తప్పు చోట తప్పు సమయంలో ఉంటే ప్రమాదం జరగవచ్చని, కార్ లాక్ అయి ఉన్నప్పటికీ కొందరు దాన్ని తెరవడానికి కూడా ప్రయత్నిస్తారని వివరించాడు.
తనకే ప్రత్యేకంగా ఈ భద్రతా ఏర్పాట్లు కాదని, అఫ్గానిస్తాన్లోని చాలా మంది ప్రముఖులు ఇలాంటి భద్రతా చర్యలనే పాటిస్తారని రషీద్ ఖాన్ స్పష్టం చేశాడు. తన కారును ప్రత్యేకంగా తయారు చేయించుకున్నానని, చాలా మంది ఇలాంటివే ఉపయోగిస్తారని చెప్పాడు. అఫ్గానిస్తాన్లో ఇది సాధారణ విషయమేనని ఆయన అన్నారు.
ఈ పరిస్థితిపై స్పందించిన కెవిన్ పీటర్సన్ దీనిని చాలా ఆసక్తికరమైన అంశంగా అభివర్ణించాడు.
మరిన్ని వార్తలు చదవండి: మలింగ రికార్డు మాయం.. అంతర్జాతీయ టీ20ల్లో సరికొత్త చరిత్ర.. ఒకే ఓవర్లో ఐదు వికెట్లు!