Ravindra Jadeja Joins Kohli & Rohit, Confirms Participation in Vijay Hazare Trophy
టీమిండియా స్టార్ ఆల్రౌండర్ రవీంద్ర జడేజా తన భవిష్యత్పై కీలక అడుగు వేశాడు. అంతర్జాతీయ క్రికెట్కు కొంత విరామం తీసుకుంటూ, దేశవాళీ వన్డే టోర్నమెంట్ అయిన విజయ్ హజారే ట్రోఫీ–2025లో పాల్గొనేందుకు సిద్ధమయ్యాడు. ఈ టోర్నీలో తన స్వస్థల జట్టు సౌరాష్ట్ర తరపున జడేజా రెండు మ్యాచ్లు ఆడనున్నాడు.
ఈ విషయాన్ని సౌరాష్ట్ర క్రికెట్ అసోసియేషన్కు చెందిన ఓ అధికారి ధ్రువీకరించాడు. కర్ణాటకలోని ఆలూర్ వేదికగా జనవరి 6, 8 తేదీల్లో జరగనున్న మ్యాచ్లలో సౌరాష్ట్ర జట్టుకు జడేజా ప్రాతినిధ్యం వహిస్తాడని ఆయన వెల్లడించారు. ఈ మేరకు టైమ్స్ ఆఫ్ ఇండియాతో మాట్లాడిన ఆ అధికారి, జడేజా అందుబాటులో ఉండటం జట్టుకు పెద్ద బలమని పేర్కొన్నారు.
ఇటీవల జరిగిన టీ20 ప్రపంచకప్–2024లో భారత జట్టు చాంపియన్గా నిలిచిన తర్వాత, రవీంద్ర జడేజా అంతర్జాతీయ టీ20 ఫార్మాట్కు వీడ్కోలు పలికిన సంగతి తెలిసిందే. ఆ తర్వాత అతడు వన్డేలు, టెస్టులపైనే పూర్తి స్థాయిలో దృష్టి పెట్టాడు.
అయితే, తాజాగా ఆస్ట్రేలియా పర్యటనకు ఎంపికైన భారత జట్టులో జడేజాకు చోటు దక్కలేదు. ముఖ్యంగా వన్డే జట్టులో అతడి పేరు లేకపోవడం అభిమానుల్లో చర్చనీయాంశంగా మారింది. దీంతో 2027 వన్డే ప్రపంచకప్ ప్రణాళికల్లో జడేజా ఉన్నాడా లేదా అనే సందేహాలు తెరపైకి వచ్చాయి.
ఈ అంశంపై అప్పట్లో చీఫ్ సెలక్టర్ అజిత్ అగార్కర్ స్పందించాడు. “జడేజా మా భవిష్యత్ ప్రణాళికల్లో భాగమే. చాంపియన్స్ ట్రోఫీ జట్టులో కూడా అతడికి స్థానం ఉంది. అయితే, ఆస్ట్రేలియా పర్యటనకు జట్టును ఎంపిక చేసే సమయంలో పిచ్ పరిస్థితులను దృష్టిలో పెట్టుకున్నాం. అక్కడ అదనపు స్పిన్ ఆప్షన్ల అవసరం లేకపోవడంతో వాషింగ్టన్ సుందర్, కుల్దీప్ యాదవ్లతో ముందుకు వెళ్లాలని నిర్ణయించాం.
జట్టులో సమతూకం చాలా కీలకం. కొన్ని సందర్భాల్లో ఆటగాళ్ల మధ్య తీవ్రమైన పోటీ ఉంటుంది. అలాంటి పరిస్థితుల్లో కఠిన నిర్ణయాలు తీసుకోవాల్సి వస్తుంది. ఆస్ట్రేలియా పిచ్లకు అనుగుణంగా జట్టును ఎంపిక చేశాం” అని అగార్కర్ స్పష్టం చేశాడు.
ఇప్పుడు విజయ్ హజారే ట్రోఫీలో జడేజా ఆడటం ద్వారా తన ఫిట్నెస్, ఫామ్ను మరోసారి నిరూపించుకోవాలనే లక్ష్యంతో ఉన్నాడు. దేశవాళీ క్రికెట్లో అతడి ప్రదర్శనపై సెలక్టర్లతో పాటు అభిమానుల దృష్టి కూడా ఉండనుంది.
మరిన్ని వార్తలు చదవండి: కేన్ విలియమ్సన్ అవుట్! వన్డేలకు నో చెప్పిన న్యూజిలాండ్ స్టార్..