RCB W vs DC W Highlights: Smriti Mandhana Falls Short of Historic WPL Century Again, Dismissed on 96

మహిళల ప్రీమియర్ లీగ్‌ (WPL)లో ఇప్పటికీ తొలి శతకం కోసం ఎదురుచూపులు కొనసాగుతూనే ఉన్నాయి. ఈ టోర్నీ బ్యాటర్లను ఎన్నోసార్లు అతి దగ్గరికి తీసుకెళ్లి… చివరి క్షణంలో నిరాశపరిచింది. ఇప్పటివరకు WPL చరిత్రలో ఒకే ఇన్నింగ్స్‌లో 90 లేదా అంతకంటే ఎక్కువ పరుగులు చేసిన సందర్భాలు 10 సార్లు నమోదయ్యాయి. కానీ అవేవీ శతకంగా మారలేదు అనేది విశేషం.

జనవరి 17న డీవై పాటిల్ స్పోర్ట్స్ అకాడమీ వేదికగా జరిగిన మ్యాచ్‌లో ఆ నిరీక్షణకు తెరపడుతుందని అందరూ భావించారు. రాయల్ చాలెంజర్స్ బెంగళూరు కెప్టెన్ స్మృతి మంధానా, ఢిల్లీ క్యాపిటల్స్‌పై పూర్తిగా ఆధిపత్యం చెలాయిస్తూ బ్యాటింగ్ చేసింది. ఆమె ఆడుతున్న తీరు చూస్తే WPL చరిత్రలో తొలి సెంచరీ ఖాయమనే అనిపించింది. కానీ అనూహ్యంగా 61 బంతుల్లో 96 పరుగుల వద్ద ఆమె ఔటైంది. దీంతో మరోసారి శతకం అతి దగ్గర్లోనే చేజారిపోయింది.

మంధానా ఇన్నింగ్స్‌ బెంగళూరు విజయంలో కీలక పాత్ర పోషించినప్పటికీ, ‘మిస్సైన సెంచరీ’ కథ మళ్లీ చర్చకు వచ్చింది. ఇప్పటివరకు WPLలో రెండు సార్లు 99 పరుగుల వద్ద బ్యాటర్ ఔటయ్యాడు. ఇక 96 పరుగుల వద్ద ఔటైన మూడో బ్యాటర్‌గా మంధానా నిలిచింది. ప్రస్తుత సీజన్‌లోనే రెండు సార్లు 90 పరుగుల మార్క్ దాటినా… ఇంకా శతకం మాత్రం అందని ద్రాక్షగానే ఉంది.

మ్యాచ్ విషయానికి వస్తే…

ముందుగా బ్యాటింగ్ చేసిన ఢిల్లీ క్యాపిటల్స్ తీవ్ర ఇబ్బందులు ఎదుర్కొంది. ఒక దశలో 10 పరుగులకే 4 వికెట్లు కోల్పోయి కష్టాల్లో పడింది. అప్పుడే మ్యాచ్ త్వరగా ముగిసిపోతుందేమో అనిపించింది. కానీ షఫాలి వర్మ, లూసీ హామిల్టన్ జట్టును ఆదుకున్నారు.
షఫాలి తన సహజ దూకుడును తగ్గించి, ఇన్నింగ్స్‌ను నిలబెట్టే ప్రయత్నం చేసింది. 41 బంతుల్లో 62 పరుగులు చేసి అవుటైంది. మరోవైపు హామిల్టన్ దూకుడుగా ఆడి 19 బంతుల్లో 36 పరుగులు చేసింది. వీరిద్దరి సహకారంతో ఢిల్లీ నిర్ణీత 20 ఓవర్లలో 166 పరుగులు చేసింది.

బెంగళూరు బౌలర్లలో లారెన్ బెల్, సయాలి సాత్ఘరే చెరో మూడు వికెట్లు తీసి సత్తా చాటారు.

లక్ష్య ఛేదనలో RCB బ్యాటర్లు పూర్తిగా ఆధిపత్యం చూపించారు. స్మృతి మంధానా, జార్జియా వోల్ కలిసి రెండో వికెట్‌కు 142 పరుగుల భారీ భాగస్వామ్యం నెలకొల్పారు. మంధానా 96 పరుగులతో తృటిలో సెంచరీ కోల్పోయినా, వోల్ 54 పరుగులతో అజేయంగా నిలిచి జట్టును గెలిపించింది. ఈ విజయంతో బెంగళూరు ఈ సీజన్‌లో వరుసగా నాలుగో గెలుపు సాధించి ఇంకా అజేయంగా కొనసాగుతోంది.

మొత్తంగా, ఈ మ్యాచ్‌ RCB ఆల్‌రౌండ్ ప్రదర్శనకు నిదర్శనంగా నిలిచింది. అదే సమయంలో WPL తొలి శతకం కోసం ఎదురుచూపులు ఇంకా కొనసాగుతూనే ఉన్నాయి.

మరిన్ని వార్తలు చదవండి: IPL 2026కు ముందు ఆర్సీబీ అభిమానులకు శుభవార్త: చిన్నస్వామి స్టేడియానికి గ్రీన్ సిగ్నల్