Rohit Sharma Creates History as Highest Six-Hitting Opener in ODIs

టీమిండియా స్టార్ బ్యాటర్ రోహిత్ శర్మ మరో అరుదైన రికార్డుతో తన పేరు క్రికెట్ చరిత్రలో మరింత బలంగా నిలిపాడు. వన్డే క్రికెట్‌లో ఓపెనర్‌గా అత్యధిక సిక్సర్లు బాదిన ఆటగాడిగా హిట్‌మ్యాన్ కొత్త ఘనతను నెలకొల్పాడు. ఇప్పటివరకు 329 సిక్సర్లతో ఈ రికార్డు సొంతం చేసుకున్న తొలి ఓపెనర్‌గా రోహిత్ నిలిచాడు.

వడోదరలోని బీసీఏ స్టేడియం వేదికగా న్యూజిలాండ్‌తో జరిగిన తొలి వన్డే మ్యాచ్‌లో రెండు భారీ సిక్సర్లు బాదడం ద్వారా రోహిత్ ఈ మైలురాయిని అందుకున్నాడు. ఈ రికార్డు గతంలో వెస్టిండీస్ దిగ్గజం క్రిస్ గేల్ (328 సిక్సర్లు) పేరిట ఉండగా, అతడిని అధిగమించి రోహిత్ అగ్రస్థానానికి చేరుకున్నాడు.

ఇక వన్డే క్రికెట్‌లో మొత్తం అత్యధిక సిక్సర్లు కొట్టిన ఆటగాడిగా కూడా రోహిత్ శర్మ ముందంజలో ఉన్నాడు. ఇప్పటివరకు అతడు 357 సిక్సర్లు బాదగా, పాకిస్తాన్ మాజీ ఆల్‌రౌండర్ షాహిద్ అఫ్రిది 351 సిక్సర్లతో రెండో స్థానంలో కొనసాగుతున్నాడు.

మ్యాచ్ విషయానికి వస్తే, రోహిత్ పెద్ద స్కోర్ చేయలేకపోయాడు. 301 పరుగుల లక్ష్యంతో బ్యాటింగ్ ప్రారంభించిన భారత్‌కు అతడు 21 పరుగులు మాత్రమే చేసి ఔటయ్యాడు. 3 ఫోర్లు, 2 సిక్సర్లతో మంచి టచ్‌లో కనిపించిన హిట్‌మ్యాన్, జేమిసన్ బౌలింగ్‌లో క్యాచ్ ఇచ్చి నిరాశగా క్రీజును విడిచాడు.

అయితే మిగతా బ్యాటర్లు బాధ్యత తీసుకున్నారు. విరాట్ కోహ్లీ అద్భుతమైన 93 పరుగులతో జట్టును ముందుండి నడిపించాడు. కెప్టెన్ శుభ్‌మన్ గిల్ 56 పరుగులతో హాఫ్ సెంచరీ సాధించగా, వైస్ కెప్టెన్ శ్రేయస్ అయ్యర్ 49 పరుగులతో కీలక సహకారం అందించాడు. వీరి సమిష్టి ప్రదర్శనతో టీమిండియా న్యూజిలాండ్‌పై విజయం సాధించింది.

మరిన్ని వార్తలు చదవండి: WPL 2026: డిల్లీ క్యాపిటల్స్ నందని శర్మ హ్యాట్రిక్‌తో చరిత్ర సృష్టించింది