Ruturaj Gaikwad Breaks Michael Bevan’s List-A Batting Average Record

టీమిండియా స్టార్ ఓపెనర్‌, మహారాష్ట్ర కెప్టెన్‌ రుతురాజ్ గైక్వాడ్ దేశవాళీ క్రికెట్‌లో అద్భుత ఫామ్‌తో దూసుకుపోతున్నాడు. న్యూజిలాండ్‌తో జరగబోయే వన్డే సిరీస్‌కు ఎంపిక కాకపోయినప్పటికీ, ఆ నిరాశను బ్యాట్‌తోనే సమాధానం చెబుతూ రికార్డుల మీద రికార్డులు సృష్టిస్తున్నాడు. విజయ్ హజారే ట్రోఫీ 2025–26 ఏడవ రౌండ్‌లో గోవాతో జరిగిన మ్యాచ్‌లో గైక్వాడ్ అద్భుతమైన సెంచరీతో మహారాష్ట్రను కష్టాల నుంచి బయటపడేశాడు.

ఈ మ్యాచ్‌లో మహారాష్ట్ర ఇన్నింగ్స్ ఒక దశలో పూర్తిగా కుదేలయ్యింది. కేవలం 2 పరుగులకే మూడు కీలక వికెట్లు కోల్పోయింది. కొద్దిసేపటికే 25 పరుగులకే ఐదు వికెట్లు పడిపోయాయి. ఆరో వికెట్ కూడా 52 పరుగుల వద్ద పడటంతో మహారాష్ట్ర 100 పరుగులు దాటుతుందా అనే సందేహం అందరిలోనూ నెలకొంది. అటువంటి పరిస్థితుల్లో కెప్టెన్ గైక్వాడ్ అసాధారణ పట్టుదలతో క్రీజులో నిలబడ్డాడు.

విక్కీ ఓస్త్వాల్‌ (53)తో కలిసి కీలకమైన సెంచరీ భాగస్వామ్యాన్ని నెలకొల్పి జట్టును ఆదుకున్నాడు. ఒత్తిడిలోనూ అద్భుతమైన షాట్లతో స్కోర్‌బోర్డును ముందుకు నడిపించాడు. చివరకు గైక్వాడ్ 131 బంతుల్లో 8 ఫోర్లు, 6 సిక్సర్ల సాయంతో 134 పరుగులు చేసి నాటౌట్‌గా నిలిచాడు. అతడి ఇన్నింగ్స్ కారణంగా మహారాష్ట్ర నిర్ణీత 50 ఓవర్లలో 7 వికెట్ల నష్టానికి 249 పరుగులు చేయగలిగింది.

ఈ సెంచరీతో విజయ్ హజారే ట్రోఫీ చరిత్రలో అత్యధిక సెంచరీలు (15) చేసిన ఆటగాడిగా అంకిత్ బావనే రికార్డును గైక్వాడ్ సమం చేశాడు. ఈ జాబితాలో దేవదత్ పడిక్కల్ (13), మయాంక్ అగర్వాల్ (13)ల కంటే గైక్వాడ్ ఇప్పుడు ముందంజలో నిలిచాడు.

ఇదే కాదు, ఈ ఇన్నింగ్స్‌తో గైక్వాడ్ లిస్ట్-ఏ క్రికెట్‌లో 5000 పరుగుల మైలురాయిని కూడా చేరుకున్నాడు. అంతకంటే గొప్ప విషయం ఏమిటంటే, లిస్ట్-ఏ క్రికెట్ చరిత్రలో అత్యధిక సగటు కలిగిన బ్యాటర్‌గా ప్రపంచ రికార్డును తన పేరిట లిఖించుకున్నాడు. ఇప్పటివరకు ఆస్ట్రేలియా దిగ్గజం మైఖేల్ బెవన్ పేరిట ఉన్న 58.59 సగటును గైక్వాడ్ అధిగమించాడు. ప్రస్తుతం అతడి సగటు 58.83గా ఉంది.

వన్డే ఫార్మాట్‌లో ఇంతటి స్థిరత్వంతో పరుగులు సాధిస్తున్న బ్యాటర్ ప్రస్తుతం ప్రపంచ క్రికెట్‌లో మరెవ్వరూ లేరనడం అతిశయోక్తి కాదు. గైక్వాడ్ ఫామ్ చూస్తుంటే, సెలక్టర్ల నిర్ణయాలపై చర్చ మరింత వేడెక్కడం ఖాయం.

మరిన్ని వార్తలు చదవండి: Tilak Varma Injury: టీమిండియా టీ20 బెర్త్ కోసం గిల్‌కు ఛాన్స్?