SA20 Final: Sunrisers Eastern Cape Defeat Pretoria Capitals, Clinch Third Trophy
సౌతాఫ్రికా టీ20 లీగ్లో సన్రైజర్స్ ఈస్టర్న్ కేప్ మరోసారి తమ ఆధిపత్యాన్ని చాటింది. ఆదివారం ప్రిటోరియా క్యాపిటల్స్తో జరిగిన ఫైనల్లో సమిష్టి ప్రదర్శన కనబరిచిన ఈస్టర్న్ కేప్ జట్టు 6 వికెట్ల తేడాతో ఘన విజయం సాధించింది. ఈ విజయంతో ఈ టోర్నీలో మూడోసారి ట్రోఫీని ఎత్తిపట్టి చరిత్ర సృష్టించింది. ఇప్పటికే 2023, 2024 సీజన్లలో ఛాంపియన్గా నిలిచిన ఈ జట్టు, ఈసారి కూడా టైటిల్ను తమ ఖాతాలో వేసుకుంది.
ఫైనల్ మ్యాచ్లో టాస్ గెలిచి ముందుగా బ్యాటింగ్ చేసిన ప్రిటోరియా క్యాపిటల్స్ నిర్ణీత 20 ఓవర్లలో 7 వికెట్ల నష్టానికి 158 పరుగులు చేసింది. డెవాల్డ్ బ్రెవిస్ అద్భుతంగా చెలరేగి సెంచరీతో జట్టును ఆదుకున్నాడు. అతడు 56 బంతుల్లో 8 ఫోర్లు, 7 సిక్స్లతో 101 పరుగులు చేసి ప్రధాన ఆకర్షణగా నిలిచాడు. మరోవైపు బ్రైస్ పార్సన్స్ 30 బంతుల్లో 30 పరుగులు చేసి సహకారం అందించాడు. సన్రైజర్స్ బౌలింగ్ విభాగంలో మార్కో జాన్సన్ అద్భుతంగా బౌలింగ్ చేసి కేవలం 10 పరుగులు ఇచ్చి 3 వికెట్లు పడగొట్టాడు. లుంగి సిపమ్లా, అన్రిచ్ నోర్జే చెరో వికెట్ తీసి కీలక పాత్ర పోషించారు.
159 పరుగుల లక్ష్యంతో బరిలోకి దిగిన సన్రైజర్స్ ఈస్టర్న్ కేప్కు ఆరంభం మాత్రం నిరాశ కలిగించింది. తొలి ఓవర్లోనే జానీ బెయిర్స్టో ఖాతా తెరవకుండానే వెనుదిరిగాడు. అనంతరం క్వింటన్ డికాక్ను లిజాడ్ విలియమ్స్ ఔట్ చేయగా, జోర్డాన్ హన్మన్, జేమ్స్ కోల్స్ కూడా తక్కువ స్కోర్లకే పెవిలియన్ చేరారు. దీంతో 48 పరుగులకే 4 వికెట్లు కోల్పోయి జట్టు తీవ్ర ఒత్తిడిలో పడింది.
ఈ కష్టసమయంలో మాథ్యూ బ్రెట్జ్కీ, ట్రిస్టన్ స్టబ్స్ జట్టుకు అండగా నిలిచారు. ఇద్దరూ బాధ్యతాయుతంగా బ్యాటింగ్ చేస్తూ మ్యాచ్ను పూర్తిగా తమ వైపుకు తిప్పేశారు. బ్రెట్జ్కీ 49 బంతుల్లో 5 ఫోర్లు, 2 సిక్స్లతో 68 పరుగులు చేసి హాఫ్ సెంచరీ సాధించాడు. మరోవైపు ట్రిస్టన్ స్టబ్స్ 41 బంతుల్లో 2 ఫోర్లు, 4 సిక్స్లతో 63 పరుగులు చేసి నాటౌట్గా నిలిచాడు. వీరి అద్భుత భాగస్వామ్యంతో సన్రైజర్స్ ఈస్టర్న్ కేప్ 19.2 ఓవర్లలోనే లక్ష్యాన్ని ఛేదించి విజయం అందుకుంది.
ఈ గెలుపుతో సన్రైజర్స్ ఈస్టర్న్ కేప్ మరోసారి తమ సత్తా నిరూపించగా, వరుసగా మూడో టైటిల్తో సౌతాఫ్రికా టీ20 లీగ్లో ప్రత్యేక స్థానం సంపాదించింది.
మరిన్నివార్తలుచదవండి: టీ20 వరల్డ్ కప్ 2026పై పాకిస్తాన్కు ఐసీసీ హెచ్చరిక, బహిష్కరణ చేస్తే కఠిన ఆంక్షలు