SA20 League: Otniel Baartman Takes Second Hat-Trick of 2025-26 Season

సౌతాఫ్రికా టీ20 లీగ్‌లో మరో అరుదైన ఘట్టం నమోదైంది. 2025-26 సీజన్‌లో రెండో హ్యాట్రిక్‌గా ఈ టోర్నీ చరిత్రలో ఓ ప్రత్యేక గుర్తింపు దక్కింది. జనవరి 15న ప్రిటోరియా క్యాపిటల్స్‌తో జరిగిన మ్యాచ్‌లో పార్ల్ రాయల్స్ బౌలర్ ఓట్నీల్ బార్ట్‌మన్ అద్భుత ప్రదర్శనతో హ్యాట్రిక్ వికెట్లు సాధించాడు. ఇదే సీజన్‌లో కొద్ది రోజుల క్రితం ప్రిటోరియా క్యాపిటల్స్ పేసర్ లుంగి ఎంగిడి లీగ్ తొలి హ్యాట్రిక్ నమోదు చేయగా, ఇప్పుడు బార్ట్‌మన్ రెండో హ్యాట్రిక్‌తో సంచలనం సృష్టించాడు.

ఈ మ్యాచ్‌లో బార్ట్‌మన్ కేవలం హ్యాట్రిక్‌తోనే కాదు, మొత్తం ఐదు వికెట్లు తీసి పార్ల్ రాయల్స్ విజయంలో కీలక పాత్ర పోషించాడు. అతడి ఘాటు బౌలింగ్‌కు ప్రిటోరియా క్యాపిటల్స్ బ్యాటింగ్ లైనప్ పూర్తిగా కుప్పకూలింది. తొలుత బ్యాటింగ్ చేసిన క్యాపిటల్స్ 19.1 ఓవర్లలోనే 127 పరుగులకు ఆలౌట్ అయ్యింది. బార్ట్‌మన్ 4 ఓవర్లలో ఒక మెయిడన్‌తో కేవలం 16 పరుగులు మాత్రమే ఇచ్చి 5 వికెట్లు పడగొట్టాడు. అతడికి తోడుగా హర్డస్ విల్యోన్, సికందర్ రజా చెరో రెండు వికెట్లు తీయగా, ఫోర్టుయిన్ ఒక వికెట్ సాధించాడు.

ప్రిటోరియా ఇన్నింగ్స్‌లో షాయ్ హోప్ (25), డెవాల్డ్ బ్రెవిస్ (21), షెర్ఫాన్ రూథర్‌ఫోర్డ్ (29), ఆండ్రే రసెల్ (15) మాత్రమే కొంత పోరాటం చూపించారు. మిగతా బ్యాటర్లు పూర్తిగా విఫలమయ్యారు. జోర్డన్ కాక్స్, లిజాడ్ విలియమ్స్, లుంగి ఎంగిడి డకౌట్‌గా పెవిలియన్ చేరడం క్యాపిటల్స్ ఇన్నింగ్స్ పతనానికి నిదర్శనంగా నిలిచింది.

అనంతరం స్వల్ప లక్ష్యాన్ని ఛేదించేందుకు దిగిన పార్ల్ రాయల్స్ ఎలాంటి ఒత్తిడి లేకుండా ఆడింది. 15.1 ఓవర్లలోనే లక్ష్యాన్ని చేధించి సులభ విజయాన్ని అందుకుంది. రూబిన్ హెర్మన్ 46 పరుగులతో టాప్ స్కోరర్‌గా నిలవగా, డాన్ లారెన్స్ 41 పరుగులతో సహకరించాడు. అనుభవజ్ఞుడు డేవిడ్ మిల్లర్ 28 పరుగులతో నాటౌట్‌గా నిలిచి జట్టును విజయతీరానికి చేర్చాడు. ప్రిటోరియా బౌలర్లలో లిజాడ్ విలియమ్స్ రెండు వికెట్లు తీయగా, లుంగి ఎంగిడి, పీటర్స్ చెరో వికెట్ సాధించారు.

ఈ మ్యాచ్ ఫలితం ఎలా ఉన్నా పార్ల్ రాయల్స్ ఇప్పటికే ఈ ఎడిషన్ ప్లే ఆఫ్స్‌కు అర్హత సాధించడం విశేషం. రాయల్స్‌తో పాటు సన్‌రైజర్స్ ఈస్ట్రన్ కేప్ కూడా ప్లే ఆఫ్స్ బెర్త్ ఖరారు చేసుకుంది. మిగిలిన స్థానాల కోసం ప్రిటోరియా క్యాపిటల్స్, జోబర్గ్ సూపర్ కింగ్స్ మధ్య ఉత్కంఠభరిత పోటీ కొనసాగుతోంది.

మరిన్ని వార్తలు చదవండి: నవీన్ ఉల్ హక్ గాయంతో టీ20 వరల్డ్ కప్‌కు దూరం అఫ్గానిస్తాన్‌కు భారీ ఎదురుదెబ్బ