SRH’s IPL 2026 Pick Shivang Kumar Creates Buzz in Domestic Cricket
భారత క్రికెట్ గడ్డపై మరో అద్భుతమైన ప్రతిభ వెలుగులోకి వస్తోంది. విజయ్ హజారే ట్రోఫీలో పరుగుల వరద సృష్టిస్తున్న కర్ణాటక బ్యాటింగ్ లైనప్ను మధ్యప్రదేశ్ యువ బౌలర్ శివాంగ్ కుమార్ తన మాయాజాలంతో నిలువరించాడు. అతని అద్భుతమైన స్పిన్ బౌలింగ్ చూసిన క్రికెట్ వర్గాలు, టీమ్ ఇండియాకు మరో కొత్త స్టార్ దొరికాడేమో అన్న ఆశలతో మాట్లాడుకుంటున్నాయి. ముఖ్యంగా శివాంగ్ చైనామన్ బౌలింగ్ శైలి ఇప్పుడు దేశవాళీ క్రికెట్లో హాట్ టాపిక్గా మారింది.
విజయ్ హజారే ట్రోఫీ 2025–26 సీజన్లో కర్ణాటక బ్యాటర్లు మ్యాచ్కు మ్యాచ్కు సెంచరీలతో చెలరేగిపోతున్నారు. అలాంటి ఫామ్లో ఉన్న జట్టును శివాంగ్ కుమార్ తన స్పిన్ మాయతో కేవలం 207 పరుగులకే కట్టడి చేయడం విశేషం. ఈ మ్యాచ్లో అతను 10 ఓవర్లు బౌలింగ్ చేసి కేవలం 45 పరుగులు మాత్రమే ఇచ్చి 5 కీలక వికెట్లు పడగొట్టాడు. ఇందులో మరింత ప్రత్యేకత ఏమిటంటే, అతను వేసిన బంతుల్లో 35 బంతులు డాట్ బాల్స్ కావడం. ఇది అతని నియంత్రణ, ఖచ్చితత్వం ఎంత ఉన్నాయో చెప్పకనే చెబుతోంది.
శివాంగ్ ఒక చైనామన్ బౌలర్. అంటే కుల్దీప్ యాదవ్లా మణికట్టు తిప్పుతో బంతిని అద్భుతంగా మలుపు తిప్పగలడు. ఇదే నైపుణ్యంతో కర్ణాటక మిడిల్ ఆర్డర్ను అతను పూర్తిగా కూల్చేశాడు. అభినవ్ మనోహర్, రవిచంద్రన్ స్మరణ్, శ్రీష ఆచార్, కెఎల్ శ్రీజిత్, శ్రేయస్ గోపాల్ వంటి అనుభవజ్ఞులైన బ్యాటర్లను పెవిలియన్కు పంపించాడు.
ముఖ్యంగా శ్రేయస్ గోపాల్ను క్లీన్ బౌల్ చేసిన తీరు చూస్తే, భారత క్రికెట్ భవిష్యత్తు భద్రమైన చేతుల్లో ఉందనే భావన కలుగుతుంది. ఈ వికెట్కు సంబంధించిన వీడియో ప్రస్తుతం సోషల్ మీడియాలో విపరీతంగా వైరల్ అవుతోంది.
శివాంగ్లోని ప్రతిభను ముందుగానే గుర్తించిన సన్రైజర్స్ హైదరాబాద్ ఫ్రాంచైజీ, ఐపీఎల్ 2026 వేలంలో అతన్ని రూ.30 లక్షలకు సొంతం చేసుకుంది. దేశవాళీ క్రికెట్లో పెద్దగా అనుభవం లేకపోయినా, అతనిలోని ప్రత్యేకతను గమనించిన ఎస్ఆర్హెచ్ ఈ నిర్ణయం తీసుకుంది. ఇప్పటివరకు శివాంగ్ కేవలం మూడు లిస్ట్-ఏ మ్యాచ్లే ఆడినా, అందులోనే 10 వికెట్లు తీసి తన సత్తా చాటాడు. మూడో మ్యాచ్లోనే ఐదు వికెట్లు పడగొట్టడం అతని సామర్థ్యానికి నిదర్శనం.
బౌలింగ్తోనే కాకుండా బ్యాటింగ్లో కూడా శివాంగ్ ఉపయోగపడగలడు. ఇప్పటికే ఒక హాఫ్ సెంచరీ కూడా అతని ఖాతాలో ఉండటం గమనార్హం. యూపీలోని మొరాదాబాద్లో జన్మించిన శివాంగ్ తండ్రి ప్రవీణ్ కుమార్ కూడా ఒక క్రికెటరే.
ఆయన బెంగాల్ తరపున రంజీ ట్రోఫీ ఆడిన అనుభవం కలిగినవాడు, ప్రస్తుతం రైల్వే శాఖలో ఉద్యోగం చేస్తున్నారు. తండ్రి ప్రోత్సాహంతో 2015లో మధ్యప్రదేశ్కు మారిన శివాంగ్, అక్కడ అండర్-16 నుంచి అండర్-23 వరకు అన్ని స్థాయిల్లోనూ రాణించి, ఇప్పుడు సీనియర్ జట్టులో స్థానం సంపాదించాడు.
ఐపీఎల్లో శివాంగ్కు సరైన అవకాశాలు దక్కితే, తన చైనామన్ మాయతో ప్రత్యర్థి జట్ల బ్యాటర్లను గడగడలాడించడం ఖాయమని క్రికెట్ నిపుణులు విశ్లేషిస్తున్నారు. భారత క్రికెట్కు మరో విలువైన రత్నం దొరికినట్టే అన్న భావన ఇప్పుడు బలంగా వినిపిస్తోంది.
మరిన్ని వార్తలు చదవండి: Tilak Varma Injury: టీమిండియా టీ20 బెర్త్ కోసం గిల్కు ఛాన్స్?