Sri Lanka Captain Dasun Shanaka Sets Unwanted Record in T20 World Cup
శ్రీలంక టీ20 జట్టు కెప్టెన్ దసున్ షనక అంతర్జాతీయ టీ20 క్రికెట్లో ఓ అరుదైన కానీ అనవసరమైన ప్రపంచ రికార్డును తన పేరున నమోదు చేసుకున్నాడు. ఐసీసీ టీ20 ప్రపంచకప్లో భాగంగా ఫిబ్రవరి 8న ఐర్లాండ్తో జరిగిన మ్యాచ్లో షనక డకౌట్ అయ్యాడు. దీంతో అతను అంతర్జాతీయ టీ20 క్రికెట్ చరిత్రలో అత్యధిక డకౌట్లు నమోదు చేసిన ఆటగాడిగా నిలిచాడు.
113 ఇన్నింగ్స్ల్లో 16 సార్లు డకౌట్ అయిన షనక ఈ చెత్త రికార్డుతో అగ్రస్థానంలో నిలిచాడు. అతనికి ముందు ఈ రికార్డు జప్పి బిమెన్యిమనా పేరుపై ఉండేది. బిమెన్యిమనా 62 ఇన్నింగ్స్ల్లో 15 సార్లు డకౌట్ అయ్యాడు. ఈ జాబితాలో మూడో స్థానంలో ఐర్లాండ్ బ్యాట్స్మన్ పాల్ స్టిర్లింగ్ ఉన్నాడు. అతను 158 మ్యాచ్ల్లో 14 సార్లు డకౌట్ అయ్యాడు.
మ్యాచ్ సంగతులివే
టాస్ గెలిచిన ఐర్లాండ్ జట్టు ముందుగా బౌలింగ్ ఎంచుకుంది. శ్రీలంక ఇన్నింగ్స్ ఆరంభంలో ఐర్లాండ్ బౌలర్లు కట్టుదిట్టంగా బౌలింగ్ చేసి లంక బ్యాట్స్మన్లను ఒత్తిడిలో పెట్టారు. తొలి 10 ఓవర్లలో శ్రీలంక మూడు వికెట్లు కోల్పోయి కేవలం 68 పరుగులే చేయగలిగింది.
16 ఓవర్ల వరకు కూడా పరిస్థితిలో పెద్ద మార్పు లేదు. ఆ సమయంలో శ్రీలంక నాలుగు వికెట్ల నష్టానికి 104 పరుగులు మాత్రమే చేసింది.
అయితే ఆ తర్వాత ఐర్లాండ్ బౌలర్లు లయ తప్పారు. వరుసగా వైడ్లు వేయడం, సులభమైన బంతుల్లో పరుగులు ఇవ్వడం వల్ల చివరి నాలుగు ఓవర్లలో శ్రీలంక బ్యాట్స్మన్లు 59 పరుగులు సాధించారు. దీంతో నిర్ణీత 20 ఓవర్లలో శ్రీలంక ఆరు వికెట్ల నష్టానికి 163 పరుగులు చేసింది.
ఐర్లాండ్ బౌలర్ల ప్రదర్శన
ఐర్లాండ్ బౌలర్లలో జార్జ్ డాక్రెల్ అద్భుతంగా బౌలింగ్ చేశాడు. అతను నాలుగు ఓవర్లలో 17 పరుగులు మాత్రమే ఇచ్చి రెండు వికెట్లు తీశాడు. మార్క్ అదైర్ నాలుగు ఓవర్లలో 33 పరుగులు ఇచ్చి ఒక వికెట్ సాధించగా, గెరాత్ డెలానీ కూడా ఒక వికెట్ తీసి పర్వాలేదనిపించాడు.
మాథ్యూ హంఫ్రేస్ మరియు బ్యారీ మెక్ కార్తీ మాత్రం ధారాళంగా పరుగులు సమర్పించుకున్నారు. ముఖ్యంగా చివరి ఓవర్లలో వారి బౌలింగ్ శ్రీలంకకు లాభించింది.
శ్రీలంక బ్యాట్స్మన్ల ప్రదర్శన
శ్రీలంక ఇన్నింగ్స్లో కుసాల్ మెండిస్ అజేయంగా 56 పరుగులతో టాప్ స్కోరర్గా నిలిచాడు. ఆఖర్లో మరో కుసాల్ మెండిస్ 44 పరుగులతో మెరుపు ఇన్నింగ్స్ ఆడాడు.
ఇతర బ్యాట్స్మన్లలో నిశాంక 24 పరుగులు చేయగా, కమిల్ మిశారా 14 పరుగులు, పవన్ రత్నాయకే ఐదు పరుగులు, వెల్లాలగే 10 పరుగులు చేశారు. హసరంగ ఒక్క పరుగు మాత్రమే చేయగా, కెప్టెన్ దసున్ షనక డకౌట్ అయ్యాడు.
మరిన్నివార్తలుచదవండి: టీ20 ప్రపంచకప్ 2026 న్యూజిలాండ్ శుభారంభం ఆఫ్ఘనిస్తాన్పై 5 వికెట్ల విజయం