T20 World Cup 2026: Sher Malla Creates History with Wicket on First Ball
నేపాల్ ఆఫ్ బ్రేక్ బౌలర్ శేర్ మల్లా చరిత్ర సృష్టించాడు. తన అంతర్జాతీయ టీ20 కెరీర్లో తొలి బంతికే వికెట్ తీసి అత్యంత అరుదైన జాబితాలో చోటు దక్కించుకున్నాడు. ప్రపంచకప్ లాంటి మెగా టోర్నీలో ఈ ఘనత సాధించడం మల్లాకు మరింత ప్రత్యేకంగా నిలిచింది.
మల్లాకు ముందు ప్రపంచకప్ టోర్నీల్లో కెరీర్ తొలి బంతికే వికెట్ తీసిన ఆటగాళ్లు కేవలం ఐదుగురు మాత్రమే ఉన్నారు. ఫిడేల్ ఎడ్వర్డ్స్, ప్రగ్యాన్ ఓఝా, పరాస్ ఖడ్కా, నదీమ్ అహ్మద్, ఖుర్రమ్ ఖాన్ ఈ జాబితాలో ఉన్నారు. ఇందులో నేపాల్కు చెందిన పరాస్ ఖడ్కా ఉండటం మరో విశేషం.
ఇంకొక ఆసక్తికరమైన విషయం ఏమిటంటే, శేర్ మల్లాకు ముందు కూడా ముగ్గురు నేపాల్ ఆటగాళ్లు తమ అంతర్జాతీయ కెరీర్లో తొలి బంతికే వికెట్ తీశారు. పరాస్ ఖడ్కా, ఆరిఫ్ షేక్, కుశాల్ భుర్టెల్ ఈ అరుదైన ఘనత సాధించిన నేపాల్ ఆటగాళ్లుగా నిలిచారు.
టీ20 ప్రపంచకప్లో భాగంగా నేపాల్ ఇవాళ ఫిబ్రవరి 8న ముంబై వేదికగా ఇంగ్లండ్తో తలపడింది. టాస్ గెలిచిన ఇంగ్లండ్ ముందుగా బ్యాటింగ్ ఎంచుకుని నిర్ణీత ఓవర్లలో 7 వికెట్ల నష్టానికి 184 పరుగులు చేసింది. జేకబ్ బేతెల్ 55 పరుగులు, హ్యారీ బ్రూక్ 53 పరుగులతో అర్ధ శతకాలు సాధించి జట్టును ఆదుకున్నారు.
ఇన్నింగ్స్ చివర్లో విల్ జాక్స్ 38 పరుగులతో నాటౌట్గా నిలిచి మెరుపు ఇన్నింగ్స్ ఆడాడు. ఇతర ఇంగ్లండ్ బ్యాటర్లలో ఫిల్ సాల్ట్ 1, జోస్ బట్లర్ 26, టామ్ బాంటన్ 2, సామ్ కర్రన్ 2, జోఫ్రా ఆర్చర్ ఒక్క పరుగు మాత్రమే చేశారు.
నేపాల్ బౌలర్లలో నందన్ యాదవ్, దీపేంద్ర సింగ్ ఎయిరీ తలో రెండు వికెట్లు తీయగా, శేర్ మల్లా మరియు సందీప్ లామిచ్చేన్ చెరో వికెట్ దక్కించుకున్నారు. శేర్ మల్లా తొలి వికెట్ ఫిల్ సాల్ట్ రూపంలో వచ్చింది.
185 పరుగుల లక్ష్యాన్ని ఛేదించేందుకు బరిలోకి దిగిన నేపాల్, 7 ఓవర్లు ముగిసే సరికి 2 వికెట్ల నష్టానికి 60 పరుగులు చేసింది. కుశాల్ భుర్టెల్ 29 పరుగులు, ఆసిఫ్ షేక్ 7 పరుగుల వద్ద ఔట్ కాగా, రోహిత్ పౌడెల్ 10, దీపేంద్ర సింగ్ ఎయిరీ 10 పరుగులతో క్రీజ్లో ఉన్నారు. ఇంగ్లండ్ బౌలర్లలో డాసన్ మరియు జాక్స్ తలో ఒక వికెట్ తీశారు. ఈ మ్యాచ్లో నేపాల్ విజయం సాధించాలంటే ఇంకా 78 బంతుల్లో 125 పరుగులు చేయాల్సి ఉంది.
మరిన్నివార్తలుచదవండి: రంజీ ట్రోఫీ క్వార్టర్ఫైనల్లో ఉత్తరాఖండ్ ఘన విజయం సెమీఫైనల్కు అర్హత