ఫిబ్రవరి 25న కొలంబోలోని ఆర్. ప్రేమదాస స్టేడియంలో జరిగిన మ్యాచ్లో న్యూజిలాండ్ జట్టు 61 పరుగుల తేడాతో శ్రీలంకపై ఘన విజయం సాధించింది. కెప్టెన్ మిచెల్ సాంట్నర్ నాయకత్వంలోని కివీస్ పూర్తి ఆధిపత్యం చూపిస్తూ సహ-ఆతిథ్య జట్టును టోర్నీ నుంచి బయటకు నెట్టింది. ఈ ఫలితంతో సూపర్-8 దశలో సెమీఫైనల్ పోరు మరింత ఉత్కంఠభరితంగా మారింది.
ఈ ఓటమితో పాకిస్తాన్ పరిస్థితి క్లిష్టమైంది. తమ చివరి లీగ్ మ్యాచ్లో శ్రీలంకను ఓడించడం తప్పనిసరి. అంతేకాదు, ఇంగ్లాండ్ జట్టు న్యూజిలాండ్ను ఓడించాలని కూడా వారు ఆశించాలి. అయినా సరే, చివరికి నెట్ రన్రేట్ కీలకంగా మారే అవకాశం ఉంది. ఇప్పటికే ఇంగ్లాండ్ సెమీఫైనల్ స్థానం దాదాపు ఖరారు చేసుకోవడంతో, మిగిలిన జట్లు చివరి టికెట్ కోసం తహతహలాడుతున్నాయి.
మొదట బ్యాటింగ్కు దిగిన న్యూజిలాండ్ 7 వికెట్లకు 168 పరుగులు చేసింది. ఆరంభంలో టిమ్ సైఫర్ట్, ఫిన్ అలెన్ జంట వేగంగా 30 పరుగులు జోడించింది. అయితే మహీష్ తీక్షణ, దుశ్మంత చమీర బౌలింగ్తో శ్రీలంక తిరిగి పోటీలోకి వచ్చింది. గ్లెన్ ఫిలిప్స్, రచిన్ రవీంద్ర మూడో వికెట్కు 41 పరుగులు జోడించినా, 75/2 నుంచి 84/6కి కివీస్ కుప్పకూలింది. కేవలం 9 పరుగుల వ్యవధిలో నాలుగు వికెట్లు కోల్పోయింది.
ఆ సమయంలో కోల్ మెకాన్కోనీ, కెప్టెన్ సాంట్నర్ అద్భుత పోరాటం చేశారు. ఏడో వికెట్కు కేవలం 47 బంతుల్లో 84 పరుగుల భాగస్వామ్యం నెలకొల్పి మ్యాచ్ను తారుమారు చేశారు. చివరి ఐదు ఓవర్లలోనే 78 పరుగులు పిండుకున్నారు. సాంట్నర్ 26 బంతుల్లో 47 పరుగులు (నాలుగు సిక్సర్లు) చేసి జట్టును గట్టెక్కించాడు. మెకాన్కోనీ 31 పరుగులతో అజేయంగా నిలిచాడు. తీక్షణ 3/30 గణాంకాలతో మెరిసగా, చమీర కూడా మూడు వికెట్లు తీశాడు.
169 పరుగుల ఛేదనలో శ్రీలంకకు ఆరంభ షాక్
169 పరుగుల లక్ష్యంతో బరిలోకి దిగిన శ్రీలంక ప్రారంభం నుంచే తడబడింది. పతుమ్ నిస్సాంకా గోల్డెన్ డక్గా మ్యాట్ హెన్రీ బౌలింగ్కు బలయ్యాడు. తర్వాత రచిన్ రవీంద్ర బంతితో అద్భుత ప్రదర్శన చేశాడు. తొలి బంతికే కుసాల్ మెండిస్ వికెట్ తీసి, అదే ఓవర్లో మరో వికెట్ దక్కించుకున్నాడు. దసున్ షనాక, దుశన్ హేమంతలను కూడా ఔట్ చేస్తూ నాలుగు వికెట్లతో మెరుపులు మెరిపించాడు.
రవీంద్ర 4/27 గణాంకాలతో మ్యాచ్ను పూర్తిగా న్యూజిలాండ్ వైపుకు తిప్పాడు. 59/6 వద్దే శ్రీలంక కుదేలైంది. కమిందు మెండిస్ 31 పరుగులతో కొంత ప్రతిఘటన చూపినా, అవసరమైన రన్రేట్ పెరుగుతుండటంతో ఒత్తిడి పెరిగింది. చివరికి 20 ఓవర్లలో 8 వికెట్లకు 107 పరుగులకే పరిమితమైంది.
ఈ విజయం న్యూజిలాండ్ను సెమీఫైనల్ అంచున నిలబెట్టగా, 2014 తర్వాత వరుసగా ఐదోసారి ట్వంటీ-ట్వంటీ వరల్డ్ కప్లో సెమీస్ దశ చేరుకోలేకపోయిన శ్రీలంకకు మరో నిరాశ తప్పలేదు.
బ్యాటింగ్లో అభిషేక్ టాప్… బౌలింగ్లో వరుణ్ నంబర్ వన్ – ఐసీసీ తాజా ర్యాంకింగ్స్