Team India Gets Boost Ahead of Namibia Match: Abhishek Sharma Discharged from Hospital
ఫిబ్రవరి 12న నమీబియాతో జరగబోయే టీ20 ప్రపంచకప్ మ్యాచ్కు ముందు టీమిండియాకు ఊరట కలిగించే వార్త అందింది. కడుపు ఇన్ఫెక్షన్ కారణంగా గత రెండు రోజులుగా ఆసుపత్రిలో చికిత్స పొందుతున్న ఓపెనర్ అభిషేక్ శర్మ డిశ్చార్జ్ అయినట్లు తెలుస్తోంది. ఈ విషయాన్ని టీమిండియా సభ్యుడు తిలక్ వర్మ శుక్రవారం నిర్వహించిన ప్రెస్ కాన్ఫరెన్స్లో వెల్లడించాడు. అయితే అభిషేక్ రేపటి మ్యాచ్లో ఆడతాడా లేదా అనే అంశంపై మాత్రం ఆయన స్పష్టత ఇవ్వలేదు.
అభిషేక్ జట్టుకు అందుబాటులోకి రావడం టీమిండియా మేనేజ్మెంట్కు మరో నిర్ణయాత్మక పరిస్థితిని తెచ్చిపెట్టింది. అభిషేక్ నమీబియాతో మ్యాచ్కు పూర్తిగా ఫిట్గా ఉండకపోవచ్చన్న అంచనాతో ఇప్పటికే సంజూ శాంసన్ను మ్యాచ్కు సిద్ధం చేశారు. సంజూ మరో ఓపెనర్ ఇషాన్ కిషన్తో కలిసి నెట్స్లో కూడా దీర్ఘసమయం సాధన చేశాడు. మ్యాచ్ సమయానికి అభిషేక్ పూర్తిగా ఫిట్గా మారితే, చివరి నిమిషంలో అయినా సంజూకు అవకాశం దక్కకపోవచ్చన్న చర్చ జరుగుతోంది.
ఇక మరోవైపు కీలకమైన పాకిస్తాన్ మ్యాచ్ ఫిబ్రవరి 15న జరగనున్న నేపథ్యంలో, అప్పటివరకు అభిషేక్కు విశ్రాంతి ఇవ్వాలని మేనేజ్మెంట్ భావిస్తే నమీబియాతో మ్యాచ్లో ఇషాన్ కిషన్, సంజూ శాంసన్ భారత ఇన్నింగ్స్ను ప్రారంభించే అవకాశం ఉంది. అయితే సంజూ నమీబియాతో మ్యాచ్లో రాణిస్తే, పాకిస్తాన్ మ్యాచ్కు ముందు అభిషేక్తో అతనికి పోటీ తప్పదని విశ్లేషకులు భావిస్తున్నారు. ఈ నేపథ్యంలో మేనేజ్మెంట్ ఎలాంటి నిర్ణయం తీసుకుంటుందో ఆసక్తిగా మారింది.
ఇటీవలి కాలంలో అద్భుత ఫామ్లో ఉన్న అభిషేక్ శర్మ ఈ ప్రపంచకప్ తొలి మ్యాచ్లో యూఎస్ఏపై గోల్డెన్ డక్గా వెనుదిరిగాడు. అదే మ్యాచ్ సమయంలో అతనికి తొలిసారిగా అస్వస్థత మొదలైంది. అనంతరం టీమ్ కోచ్ గౌతమ్ గంభీర్ నివాసంలో జరిగిన డిన్నర్కు వెళ్లిన సమయంలో పరిస్థితి మరింత క్షీణించడంతో ఆసుపత్రిలో చేర్పించారు.
ఈ ప్రపంచకప్లో అభిషేక్పై భారీ అంచనాలే ఉన్నాయి. అతను తన సహజమైన దూకుడైన ఆటతో ఇచ్చే వేగవంతమైన ఆరంభాలు మ్యాచ్ గమనాన్నే మార్చగలవు. ప్రతి మ్యాచ్లో 30 నుంచి 40 పరుగులు చేసినా టీమిండియా భారీ స్కోర్లు నమోదు చేసే అవకాశం ఉంది.
భారత బౌలింగ్ విభాగం కూడా పటిష్టంగా ఉండటంతో, ఆ స్కోర్లను విజయవంతంగా కాపాడుకునే సామర్థ్యం జట్టుకు ఉంది. అభిషేక్తో పాటు ఇతర ఆటగాళ్లు కూడా ప్రతీ మ్యాచ్లో సత్తా చాటితే, భారత్ మరోసారి ప్రపంచకప్ను గెలుచుకోవడం ఖాయమని క్రికెట్ విశ్లేషకులు అభిప్రాయపడుతున్నారు.
మరిన్నివార్తలుచదవండి: PSL 2026 వేలం: అమ్ముడైన ఆటగాళ్ల పూర్తి జాబితా, డైరెక్ట్ సైనింగ్స్, రిటెన్షన్లు మరియు టీమ్ పర్స్ వివరాలు