Tilak Varma Injury: Who Will Replace Him in India’s T20 Team?
న్యూజిలాండ్తో జరగనున్న టీ20 సిరీస్కు ముందు టీమిండియా యువ స్టార్ బ్యాటర్ తిలక్ వర్మకు గాయం తగిలినట్లు సమాచారం. విజయ్ హజారే ట్రోఫీలో జమ్మూ అండ్ కశ్మీర్తో మ్యాచ్ కోసం రాజ్కోట్లో ఉన్న సమయంలో, తిలక్కు అకస్మాత్తుగా వృషణాల్లో తీవ్రమైన నొప్పి వచ్చింది. వెంటనే అతడిని సమీపంలోని గోకుల్ ఆసుపత్రికి తరలించగా, స్కాన్లు చేసిన వైద్యులు ఇది “టెస్టిక్యులర్ టోర్షన్” అని నిర్ధారించారు.
పరిస్థితి తీవ్రంగా ఉండటంతో హుటాహుటిన శస్త్రచికిత్స చేయగా, ఆ ఆపరేషన్ విజయవంతమైందని డాక్టర్లు వెల్లడించారు. ప్రస్తుతం తిలక్ ఆరోగ్యం నిలకడగా ఉన్నప్పటికీ, అతడు మళ్లీ ఎప్పుడు మైదానంలోకి దిగుతాడన్నది మాత్రం స్పష్టతకు రాలేదు. త్వరలో ప్రారంభం కానున్న న్యూజిలాండ్ టీ20 సిరీస్తో పాటు రానున్న టీ20 ప్రపంచకప్లో అతడి పాల్గొనడం అనుమానంగా మారింది.
ఈ నేపథ్యంలో తిలక్ స్థానంలో ఎవరికి అవకాశం దక్కుతుందన్న అంశంపై చర్చ మొదలైంది. ఇప్పటికే నాలుగు పేర్లు బలంగా వినిపిస్తున్నాయి. అందులో ప్రధానంగా ప్రస్తావనకు వస్తున్నది భారత టెస్ట్, వన్డే జట్టు కెప్టెన్ శుభ్మన్ గిల్ పేరు. ఫామ్ లోపం కారణంగా గిల్కు న్యూజిలాండ్ టీ20 సిరీస్తో పాటు ప్రపంచకప్ జట్టులో చోటు దక్కలేదు. అయితే తిలక్ గాయం కారణంగా అతడికి మరోసారి అవకాశాలు కలిసొచ్చే పరిస్థితి ఏర్పడిందన్న చర్చ సాగుతోంది. బీసీసీఐలో గిల్కు ఉన్న ప్రాధాన్యం దృష్ట్యా, అతడికి టీ20 బెర్త్ దక్కే అవకాశముందని కొందరు విశ్లేషిస్తున్నారు.
అయితే పోటీ గిల్కే పరిమితం కాదు. శ్రేయస్ అయ్యర్, రుతురాజ్ గైక్వాడ్, దేవదత్ పడిక్కల్ కూడా రేసులో ఉన్నారు. తిలక్ సాధారణంగా వన్డౌన్ లేదా నాలుగో స్థానంలో బ్యాటింగ్ చేస్తాడు. గిల్ను ఆ స్థానాల్లో ఆడించటం కొత్త ప్రయోగంగా మారే అవకాశం ఉంది. అందుకే సెలెక్టర్లు మిడిలార్డర్లో అనుభవం ఉన్న రుతురాజ్, పడిక్కల్, శ్రేయస్ల వైపు దృష్టి సారించే అవకాశం కనిపిస్తోంది.
ప్రస్తుతం ఈ ముగ్గురూ అద్భుతమైన ఫామ్లో ఉన్నారు. ముఖ్యంగా విజయ్ హజారే ట్రోఫీలో దేవదత్ పడిక్కల్ ఆకాశమే హద్దుగా చెలరేగుతున్నాడు. ఆరు మ్యాచ్ల్లో నాలుగు సెంచరీలు చేసి టోర్నీలో హాట్ ఫేవరెట్గా మారాడు. మరోవైపు రుతురాజ్ గైక్వాడ్ కూడా ఇటీవల సెంచరీ చేయడంతో పాటు, గత నాలుగు మ్యాచ్ల్లో ఒక సెంచరీ, ఒక అర్ధ సెంచరీతో అద్భుత ప్రదర్శన కనబరుస్తున్నాడు. శ్రేయస్ అయ్యర్కు కూడా మిడిలార్డర్లో తిలక్ స్థానాన్ని భర్తీ చేసే సత్తా ఉందని సెలెక్టర్లు భావిస్తున్నారు.
మొత్తానికి తిలక్ వర్మ న్యూజిలాండ్ టీ20 సిరీస్తో పాటు టీ20 ప్రపంచకప్కు దూరమైతే, అతడి బెర్త్ కోసం నలుగురు మధ్య గట్టి పోటీ తప్పనిసరి. తిలక్ గాయంపై బీసీసీఐ నుంచి అధికారిక ప్రకటన వచ్చిన తర్వాతే ఈ విషయంలో పూర్తి స్పష్టత వచ్చే అవకాశం ఉంది.
మరిన్ని వార్తలు చదవండి: