USA Crush Netherlands by 93 Runs in T20 World Cup Clash in Chennai
శుక్రవారం (ఫిబ్రవరి 13) చెన్నై వేదికగా జరిగిన టీ20 వరల్డ్ కప్ పోరులో యూఎస్ఏ జట్టు నెదర్లాండ్స్పై 93 పరుగుల భారీ విజయం నమోదు చేసింది. ముందుగా బ్యాటింగ్ చేసిన అమెరికా జట్టు 20 ఓవర్లలో 6 వికెట్లకు 196 పరుగులు చేసి భారీ స్కోర్ నిలబెట్టింది. సాయితేజ ముక్కమల్లా 79 పరుగులతో మెరుస్తే, శుభమ్ రంజనే నాటౌట్ 48 పరుగులతో ఇన్నింగ్స్ను దూకుడుగా ముగించాడు. అనంతరం కట్టుదిట్టమైన బౌలింగ్తో డచ్ జట్టును 103 పరుగులకే కట్టడి చేసి టోర్నీలో తొలి విజయాన్ని అందుకుంది.
ఇన్నింగ్స్ ఆరంభం నుంచే యూఎస్ఏ దూకుడు చూపింది. షయాన్ జహంగీర్ పవర్ప్లేలోనే భారీ సిక్సర్లు బాదుతూ బౌలర్లపై ఒత్తిడి తెచ్చాడు. మూడో ఓవర్లో అతను ఔటైనప్పటికీ రన్రేట్ తగ్గలేదు. మోనాంక్ పటేల్, ముక్కమల్లా కలిసి స్ట్రైక్ రొటేట్ చేస్తూ బౌండరీలు సాధించారు. పవర్ప్లే ముగిసే సరికి యూఎస్ఏ 53/1తో బలమైన పునాది వేసింది.
తొమ్మిదో ఓవర్లో బాస్ డి లీడే మోనాంక్ పటేల్ను పెవిలియన్ పంపి 55 పరుగుల భాగస్వామ్యాన్ని చెదరగొట్టినా, అమెరికా బ్యాటర్లు బ్రేక్ ఇవ్వలేదు. ముక్కమల్లా కేవలం 30 బంతుల్లో హాఫ్ సెంచరీ పూర్తి చేసి మ్యాచ్పై పూర్తి పట్టు సాధించాడు. సంజయ్ కృష్ణమూర్తి ఔటైన తర్వాత ముక్కమల్లా–రంజనే జోడీ మరో ఫిఫ్టీ పార్ట్నర్షిప్ నెలకొల్పింది. 17వ ఓవర్లో ముక్కమల్లా ఔటైనా, చివరి ఓవర్లలో రంజనే మూడు ఫోర్లు, రెండు సిక్సర్లతో స్కోర్ను 196కు చేర్చాడు.
లక్ష్య చేధనలోనే డచ్ తడబాటు
లక్ష్య చేధనలో నెదర్లాండ్స్ ప్రారంభం నుంచే తడబడింది. రెండో ఓవర్లోనే తొలి వికెట్ కోల్పోయింది. బాస్ డి లీడే ఒక ఫోర్, ఒక సిక్స్తో ప్రతిఘటించే ప్రయత్నం చేసినా, మరో ఎండ్లో వికెట్లు వరుసగా పడిపోయాయి. పవర్ప్లే ముగిసే సరికి డచ్ జట్టు 51/3తో ఒత్తిడిలో పడింది.
ఏడో ఓవర్లో డి లీడే ఔటవడంతో మ్యాచ్ దాదాపు యూఎస్ఏ వైపే వంగిపోయింది. అవసరమైన రన్రేట్ పెరుగుతుండగా వికెట్లు కూలిపోతూనే ఉన్నాయి. పదో ఓవరుకు ముగింపు వద్ద ఆరో వికెట్ పడిపోవడంతో నెదర్లాండ్స్ 75/6తో కష్టాల్లో చిక్కుకుంది. చివరికి 16వ ఓవర్లోనే మొత్తం జట్టు 103 పరుగులకు ఆలౌట్ అయింది.
బౌలింగ్లో హర్మీత్ సింగ్ 4/21 గణాంకాలతో మెరిపించాడు. షాడ్లీ వాన్ షాల్క్విక్ మూడు వికెట్లు సాధించగా, లెగ్ స్పిన్నర్ మహమ్మద్ మొహ్సిన్ రెండు వికెట్లు తీశాడు. సమిష్టి ప్రదర్శనతో యూఎస్ఏ ఈ టోర్నీలో తొలి విజయాన్ని మాత్రమే కాకుండా, టీ20 అంతర్జాతీయల్లో నెదర్లాండ్స్పై తమ తొలి గెలుపును కూడా నమోదు చేసి ఆత్మవిశ్వాసాన్ని పెంచుకుంది.
టీ ట్వెంటీ ప్రపంచకప్ 2026: దక్షిణాఫ్రికా-న్యూజిలాండ్ మ్యాచ్ ఎప్పుడు, ఎక్కడ?