Vaibhav Suryavanshi Creates History with 175 in U19 World Cup 2026 Final

అండర్-19 ప్రపంచకప్‌ 2026 ఫైనల్‌లో భారత యువ సంచలనం వైభవ్ సూర్యవంశీ అద్భుత ప్రదర్శనతో క్రికెట్ ప్రపంచాన్ని ఉలిక్కిపడేలా చేశాడు. హరారే స్పోర్ట్స్ క్లబ్ వేదికగా ఇంగ్లండ్‌తో జరుగుతున్న తుది పోరులో వైభవ్ ఆరంభం నుంచే ఎదురుదాడికి దిగాడు. ప్రత్యర్థి బౌలర్లపై ఎలాంటి ఒత్తిడినీ చూపకుండా స్వేచ్ఛగా ఆడుతూ బౌండరీల వర్షం కురిపించాడు. అతడి బ్యాటింగ్ తుఫాన్ ముందు ఇంగ్లండ్ బౌలింగ్ పూర్తిగా చెల్లాచెదురైంది.

ఈ మ్యాచ్‌లో వైభవ్ కేవలం 55 బంతుల్లోనే సెంచరీ పూర్తి చేసి సంచలనం సృష్టించాడు. అండర్-19 ప్రపంచకప్ చరిత్రలో రెండో అత్యంత వేగవంతమైన శతకం చేసిన ఆటగాడిగా అతడు రికార్డుల్లో నిలిచాడు. ఈ జాబితాలో తొలి స్థానంలో ఆస్ట్రేలియాకు చెందిన విల్ మలాజ్జుక్ (51 బంతులు) కొనసాగుతున్నాడు. వైభవ్ ఫామ్‌ను చూస్తే ఈ ఫైనల్‌లో డబుల్ సెంచరీ కూడా సాధిస్తాడని అందరూ భావించారు. కానీ ద్విశతకానికి 25 పరుగుల దూరంలో భారీ షాట్‌కు ప్రయత్నిస్తూ వికెట్ కోల్పోయాడు.

మొత్తంగా 80 బంతులు ఎదుర్కొన్న వైభవ్ సూర్యవంశీ 15 ఫోర్లు, 15 సిక్స్‌లతో 175 పరుగులు చేసి పెవిలియన్‌కు చేరాడు. అతడి విధ్వంసకర ఇన్నింగ్స్ కారణంగా భారత్ కేవలం 25 ఓవర్లలోనే 250 పరుగుల మార్క్‌ను దాటేసింది. కెప్టెన్ ఆయుష్ మాత్రేతో కలిసి రెండో వికెట్‌కు 142 పరుగుల భారీ భాగస్వామ్యాన్ని నెలకొల్పి జట్టును పటిష్ట స్థితిలో నిలబెట్టాడు.

ఈ మ్యాచ్‌తో వైభవ్ సూర్యవంశీ పలు ప్రపంచ రికార్డులను తన ఖాతాలో వేసుకున్నాడు. అండర్-19 ప్రపంచకప్ ఇన్నింగ్స్‌లో అత్యధిక సిక్సర్లు బాదిన ఆటగాడిగా చరిత్ర సృష్టించాడు. ఇంతకుముందు ఈ రికార్డు ఇంగ్లండ్ ఆటగాడు మైఖేల్ హిల్ (12 సిక్సులు) పేరిట ఉండగా, వైభవ్ 15 సిక్స్‌లతో ఆ రికార్డును బద్దలు కొట్టాడు. అంతేకాదు, అండర్-19 ప్రపంచకప్ చరిత్రలో అత్యంత వేగంగా సెంచరీ చేసిన భారత ఆటగాడిగా కూడా వైభవ్ నిలిచాడు. గతంలో ఈ ఘనత రాజ్ అంగద్ బావా పేరిట ఉండగా, అతడు 2022లో ఉగాండాపై 69 బంతుల్లో శతకం సాధించాడు.

ఈ ఫైనల్ ఇన్నింగ్స్‌తో 14 ఏళ్ల వయసులోనే వైభవ్ సూర్యవంశీ తన ప్రతిభకు ప్రపంచ స్థాయిలో ముద్ర వేసుకున్నాడు. భవిష్యత్తులో భారత క్రికెట్‌కు అతడు పెద్ద ఆస్తిగా మారతాడన్న అంచనాలను ఈ ఒక్క ఇన్నింగ్స్‌తోనే నిజం చేశాడు.