Vijay Shankar Joins Kandy Royals Days After Retirement Announcement

భారత మాజీ ఆల్‌రౌండర్ విజయ్ శంకర్ త్వరలో ప్రారంభంకానున్న లంక ప్రీమియర్ లీగ్ లో ఆడేందుకు సిద్ధమయ్యాడు. అతడిని కాండీ రాయల్స్ జట్టు తమ స్క్వాడ్‌లోకి తీసుకుంది. అంతర్జాతీయ, దేశీయ క్రికెట్‌కు రిటైర్మెంట్ ప్రకటించిన కొన్ని రోజులకే విజయ్ శంకర్ ఎల్పీఎల్‌లో ఆడబోతుండటం ఆసక్తికరంగా మారింది. ఈ విషయాన్ని కాండీ రాయల్స్ సోషల్ మీడియా ద్వారా ప్రత్యేక యానిమేటెడ్ వీడియో విడుదల చేసి అధికారికంగా ప్రకటించింది.

శుక్రవారం విజయ్ శంకర్ భావోద్వేగ సోషల్ మీడియా పోస్టుతో తన రిటైర్మెంట్‌ను ప్రకటించాడు. ఇకపై కొత్త అవకాశాలను అన్వేషించాలని, మరింత క్రికెట్ ఆడాలని భావిస్తున్నట్లు తెలిపాడు. తన సందేశం చివరలో “యువర్ 3డీ క్రికెటర్” అని పేర్కొనడం ప్రత్యేక ఆకర్షణగా నిలిచింది. 2019 వన్డే వరల్డ్ కప్‌కు అతడి ఎంపిక సమయంలో ఈ “3డీ క్రికెటర్” వ్యాఖ్య విపరీతంగా చర్చనీయాంశమైంది.

విజయ్ శంకర్ భారత జట్టు తరఫున 12 వన్డేలు, 9 టీ20 మ్యాచ్‌లు ఆడాడు. 2018లో శ్రీలంకపై అంతర్జాతీయ అరంగేట్రం చేసిన అతడు, చివరిసారిగా 2019 వన్డే వరల్డ్ కప్‌లో వెస్టిండీస్‌పై భారత జట్టుకు ప్రాతినిధ్యం వహించాడు. అన్ని ఫార్మాట్లలో కలిపి 324 పరుగులు సాధించడంతో పాటు 9 వికెట్లు తీశాడు. ఇందులో పాకిస్థాన్‌పై వరల్డ్ కప్ మ్యాచ్‌లో నమోదు చేసిన 2/22 గణాంకాలు అభిమానులకు ఇప్పటికీ గుర్తుండే ప్రదర్శనగా నిలిచాయి.

ఐపీఎల్‌లో విజయ్ శంకర్ ప్రస్థానం

ఐపీఎల్‌లో కూడా విజయ్ శంకర్ పలు ఫ్రాంచైజీలకు ప్రాతినిధ్యం వహించాడు. మొత్తం 1233 పరుగులు చేయడంతో పాటు 9 వికెట్లు తన ఖాతాలో వేసుకున్నాడు. అతడి చివరి ఐపీఎల్ మ్యాచ్ చెన్నై సూపర్ కింగ్స్ తరఫున ఐపీఎల్ 2025 సీజన్‌లో వచ్చింది.

తన వీడ్కోలు సందేశంలో విజయ్ శంకర్ భావోద్వేగంగా స్పందించాడు. “క్రికెట్ నా జీవితం. 10 ఏళ్ల వయసులో ప్రారంభమైన నా ప్రయాణం 25 ఏళ్ల తర్వాత ఈ స్థాయికి చేరడం అదృష్టంగా భావిస్తున్నాను. భారత జట్టుకు ప్రాతినిధ్యం వహించడం నా జీవితంలో అత్యంత గర్వకారణం,” అని పేర్కొన్నాడు.

తన కెరీర్‌లో సహకరించిన భారత క్రికెట్ నియంత్రణ మండలి, భారత జట్టు మేనేజ్‌మెంట్‌తో పాటు తాను ఆడిన ప్రతి ఫ్రాంచైజీకి విజయ్ శంకర్ కృతజ్ఞతలు తెలిపాడు. గుజరాత్ టైటాన్స్, సన్‌రైజర్స్ హైదరాబాద్, ఢిల్లీ క్యాపిటల్స్, చెన్నై సూపర్ కింగ్స్, తమిళనాడు, త్రిపుర జట్లను ప్రత్యేకంగా ప్రస్తావించాడు. నాగ్‌పూర్‌లో భారత జట్టు 500వ వన్డేలో చివరి ఓవర్ బౌలింగ్ చేయడం, 2019 వరల్డ్ కప్‌లో తొలి బంతికే వికెట్ తీసుకోవడం తన కెరీర్‌లో మరచిపోలేని ఘట్టాలని తెలిపాడు.

తన కెరీర్ మొత్తం సమయంలో అండగా నిలిచిన కోచ్‌లు, ట్రైనర్లు, ఫిజియోలు, డాక్టర్లు, మీడియా సిబ్బంది, స్నేహితులు, ముఖ్యంగా కుటుంబ సభ్యులకు విజయ్ శంకర్ ధన్యవాదాలు తెలిపాడు. విమర్శలు, ప్రతికూల పరిస్థితులు ఎదురైనా ఎప్పుడూ ఆత్మవిశ్వాసం కోల్పోలేదని, కష్టపడుతూ ముందుకు సాగాలని యువ క్రికెటర్లకు సందేశం ఇచ్చాడు.